ବେଳେବେଳେ ପରିସ୍ରା କରିବା ସମୟରେ ମୂତ୍ରରୁ ଫେଣ ପଡ଼ୁଥିବାର ଦେଖାଯାଏ । ଏହାକୁ ସାଧାରଣ ଭାବି ଆମେ ଅଣଦେଖା କରିଦେଉ । ପରିସ୍ରାରେ ଫେଣ ପଡ଼ିବା ସ୍ବାଭାବିକ । ହେଲେ ଏହାକୁ ଅଣଦେଖା କରନ୍ତୁ ନାହିଁ । ସ୍ବାସ୍ଥ୍ୟ ବିଶେଷଜ୍ଞ କହିଛନ୍ତି, ବାରମ୍ବାର ଏଭଳି ଘଟିବା ଏକ ଗୁରୁତର ସମସ୍ୟାର ସଙ୍କେତ ହୋଇପାରେ ।
ବେଳେ ବେଳେ କିଡନୀ ସମସ୍ୟା ହେତୁ ପରିସ୍ରାରେ ଫେଣ ବାହାରିପାରେ । ଯଦି ପରିସ୍ରାରେ ବାରମ୍ବାର ଫେଣ ହେଉଥିବାର ଦେଖୁଛନ୍ତି ଏହାକୁ ଗମ୍ଭୀରତାର ସହ ନେଇ ତୁରନ୍ତ ଡାକ୍ତରଙ୍କ ପରାମର୍ଶ ନିଅନ୍ତୁ । ପରିସ୍ରାରେ ଫେଣ ପଡ଼ିବା କ୍ରୋନିକ କିଡନୀ ରୋଗର (Chronic kidney disease) ରୋଗର ଚେତାବନୀ ସଙ୍କେତ ହୋଇପାରେ । ତେଣୁ ଏହାକୁ ଅଣଦେଖା ନକରିବାକୁ ସ୍ୱାସ୍ଥ୍ୟ ବିଶେଷଜ୍ଞମାନେ ପରାମର୍ଶ ଦେଇଛନ୍ତି ।
ପରିସ୍ରାର ରଙ୍ଗ ପରିବର୍ତ୍ତନ, ପରିସ୍ରା ସମୟରେ ଜ୍ବଳନ ହେବା, ପରିସ୍ରା ସମୟରେ ଫେଣ ହେବା, ଡିହାଇଡ୍ରେସନ କିମ୍ବା ମୂତ୍ରନଳୀ ସଂକ୍ରମଣର ମୁଖ୍ୟ କାରଣ ହୋଇପାରେ । ପରିସ୍ରାରେ ପୁସ (PUS) ଥିଲେ ମଧ୍ୟ ପରିସ୍ରାରେ ଫେଣ ହୋଇପାରେ । ଯୋନୀରେ ସଂକ୍ରମଣ, ୟୁରିନ ବ୍ଲାଡର ସଂକ୍ରମଣ, କେଲମାଝଡିଆ (Chlamydia), କିଡନୀ ଷ୍ଟୋନ ଯୋଗୁଁ ଏଭଳି ସମସ୍ୟା ମଧ୍ୟ ହୋଇପାରେ ।
ଅନେକ ସମୟରେ ଏହା ପ୍ରଭାବରେ ସୁଗାର, ହାର୍ଟ ସମ୍ବନ୍ଧୀୟ ରୋଗ ହେବାର ସମ୍ଭାବନା ଥାଏ । ତେଣୁ ଯଦି ଆପଣ କିମ୍ବା ଆପଣଙ୍କ ଆଖ ପାଖରେ କେହି ଏଭଳି ସମ୍ମୁଖୀନ ହେଉଛନ୍ତି ତେବେ ତୁରନ୍ତ ଡାକ୍ତରଙ୍କ ପରାମର୍ଶ ନେବା ପାଇଁ ସ୍ବାସ୍ଥ୍ୟ ବିଶେଷଜ୍ଞମାନେ ପରାମର୍ଶ ଦେଇଛନ୍ତି ।
କିଡନୀ ସମସ୍ୟା: କିଡନୀ ଶରୀରର ଏକ ଗୁରୁତ୍ୱପୂର୍ଣ୍ଣ ଅଙ୍ଗ, ଯାହା ରକ୍ତକୁ ଶୁଦ୍ଧ କରିବାରେ ସାହାଯ୍ୟ କରିଥାଏ। ଯଦି କିଡନୀ ସଠିକ୍ ଭାବରେ କାମ କରେନାହିଁ, ତେବେ ଅନେକ ସମସ୍ୟା ଦେଖାଦିଏ, ଯାହାର ମୁଖ୍ୟ ଲକ୍ଷଣ ମଧ୍ୟରୁ ଗୋଟିଏ ହେଉଛି ପରିସ୍ରାରେ ଫେଣ ଆସିବା। କିଡନୀ ସଂକ୍ରମଣ, ପ୍ରଦାହ କିମ୍ବା କ୍ରନିକ୍ ବୃକକ୍ ରୋଗ ପାଇଁ ପରିସ୍ରା ଅସ୍ୱାଭାବିକ ହୋଇପାରେ।
ମଧୁମେହ ରୋଗ: ମଧୁମେହ ରୋଗୀଙ୍କ କ୍ଷେତ୍ରରେ ଉଚ୍ଚ ରକ୍ତରେ ଶର୍କରା କିଡନୀ ଉପରେ ଚାପ ପକାଇଥାଏ। ଏହି ପ୍ରକ୍ରିୟା ପରିସ୍ରାରେ ଫେଣ ସମସ୍ୟା ସୃଷ୍ଟି କରିପାରେ। ବିଶେଷକରି ବର୍ଦ୍ଧିତ ସୁଗାର କିଡନୀକୁ ଦୁର୍ବଳ କରିପାରେ, ଯାହା ପରିସ୍ରାରେ ଫେଣ ସମସ୍ୟା ସୃଷ୍ଟି କରିଥାଏ।
ଶରୀରରେ ପ୍ରୋଟିନ୍ ସ୍ତର ବୃଦ୍ଧି: ଯେତେବେଳେ ଶରୀରରେ ଅତ୍ୟଧିକ ପ୍ରୋଟିନ୍ ସ୍ତର ବଢ଼ିଯାଏ, ବିଶେଷତଃ ଯଦି କିଡନୀରେ କ୍ଷତି ହୁଏ, ପ୍ରୋଟିନ୍ ପରିସ୍ରା ସହିତ ମିଶି ଫେଣ ସୃଷ୍ଟି କରେ। ଏହାକୁ ପ୍ରୋଟିନୁରିଆ କୁହାଯାଏ। ଯେତେବେଳେ କିଡନୀ ଫିଲ୍ଟରଗୁଡିକ ସଠିକ୍ ଭାବରେ କାମ କରେ ନାହିଁ, ପରିସ୍ରାରେ ଅଧିକ ପ୍ରୋଟିନ୍ ଥାଏ, ଯାହା ପରିସ୍ରାରେ ଫେଣ ସମସ୍ୟା କରିଥାଏ।
ମୂତ୍ରନଳୀ ସଂକ୍ରମଣ: ମୂତ୍ରନଳୀ ସଂକ୍ରମଣ (UTI) ହେଉଛି ଏକ ଜୀବାଣୁ ସଂକ୍ରମଣ ଯାହା ୟୁରିନାରୀ ସିଷ୍ଟମରେ ଦେଖାଯାଏ । ମୂତ୍ରନଳୀ ସଂକ୍ରମଣ ମୂତ୍ରାଶୟ ଓ ମୂତ୍ରମାର୍ଗ ନଳୀ (urethra)କୁ ପ୍ରଭାବିତ କରିଥାଏ । ଏହା କିଡନୀ ଓ ୟୁରିନାରୀ ସିଷ୍ଟମକୁ ପ୍ରଭାବିତ କରିଥାଏ ।
