ପାରାଦୀପ : ପାରାଦୀପ ଉପକୂଳରେ ଭାରତୀୟ ତଟରକ୍ଷୀ ବାହିନୀର ବଡ଼ ବଡ଼ ଧରଣର ସମୁଦ୍ର ଉଦ୍ଧାର ଅଭ୍ୟାସ । ଭାରତୀୟ ତଟରକ୍ଷୀ ବାହିନୀ ବା ଇଣ୍ଡିଆନ୍ କୋଷ୍ଟଗାର୍ଡ ପକ୍ଷରୁ ଦ୍ୱାଦଶ ଜାତୀୟ ସାମୁଦ୍ରିକ ସନ୍ଧାନ ଓ ଉଦ୍ଧାର ଅଭ୍ୟାସ ‘ସାରେକ୍ସ-୨୦୨୬’ ଆୟୋଜିତ ହୋଇଛି । ଜାତୀୟ ସାମୁଦ୍ରିକ ସନ୍ଧାନ ଓ ଉଦ୍ଧାର ବୋର୍ଡ ବା NMSARB ତତ୍ତ୍ୱାବଧାନରେ ଅଭ୍ୟାସ ହୋଇଛି । ପ୍ରତି ଦୁଇବର୍ଷରେ ଥରେ ଜାତୀୟସ୍ତରୀୟ ଅଭ୍ୟାସ ଆୟୋଜନ କରାଯାଇଥାଏ ।
ଚଳିତବର୍ଷର ମୁଖ୍ୟ ବିଷୟବସ୍ତୁ ରହିଛି, ଆଧୁନିକ ପ୍ରଯୁକ୍ତିବିଦ୍ୟାର ବ୍ୟବହାର ମାଧ୍ୟମରେ ସମୁଦ୍ରରେ ଉଦ୍ଧାର କାର୍ଯ୍ୟର ପ୍ରସ୍ତୁତି ଓ ସୁରକ୍ଷା ବ୍ୟବସ୍ଥାକୁ ଅଧିକ ମଜଭୁତ କରିବା। ସମୁଦ୍ରରେ ଜାହାଜ ଦୁର୍ଘଟଣା, ମତ୍ସ୍ୟଜୀବୀଙ୍କ ବୋଟ୍ ବିପଦରେ ପଡ଼ିବା କିମ୍ବା କୌଣସି ବ୍ୟକ୍ତି ନିଖୋଜ ହେବା ଭଳି ପରିସ୍ଥିତିରେ କିପରି ଶୀଘ୍ର ସନ୍ଧାନ ଓ ଉଦ୍ଧାର କାର୍ଯ୍ୟ କରାଯାଇପାରିବ, ତାହା ଅଭ୍ୟାସର ମୁଖ୍ୟ ଉଦ୍ଦେଶ୍ୟ ।
ବିଶେଷକରି ଜରୁରୀ ପରିସ୍ଥିତିରେ ଆଧୁନିକ ଯୋଗାଯୋଗ ବ୍ୟବସ୍ଥା, ସମୁଦ୍ରରେ ନିରୀକ୍ଷଣ ଓ ବିଭିନ୍ନ ଉଦ୍ଧାରକାରୀ ସଂସ୍ଥା ମଧ୍ୟରେ ସମନ୍ୱୟକୁ ଅଧିକ ସୁଦୃଢ଼ କରିବା ଉପରେ ଗୁରୁତ୍ୱ ଦିଆଯାଇଛି । ଓଡ଼ିଶାର ପାରାଦୀପ ଉପକୂଳରେ ଏଭଳି ଜାତୀୟସ୍ତରୀୟ ଅଭ୍ୟାସ ସାମୁଦ୍ରିକ ସୁରକ୍ଷା ଦୃଷ୍ଟିରୁ ଗୁରୁତ୍ୱପୂର୍ଣ୍ଣ । ବିଶେଷକରି ବାତ୍ୟା, ସମୁଦ୍ରରେ ଦୁର୍ଘଟଣା ଓ ଅନ୍ୟାନ୍ୟ ଜରୁରୀ ପରିସ୍ଥିତିରେ ଉଦ୍ଧାର କାର୍ଯ୍ୟକୁ ଅଧିକ ଦ୍ରୁତ ଓ ପ୍ରଭାବଶାଳୀ କରିବା ଦିଗରେ ଅଭ୍ୟାସ ସହାୟକ ହେବ ।
