ପୂଜା ପାଇଁ ରାଜଧାନୀରେ ପୁଲିସର ଫ୍ଲାଗମାର୍ଚ୍ଚ, ବିଶୃଙ୍ଖଳା କଲେ କଡ଼ା କାର୍ଯ୍ୟାନୁଷ୍ଠାନ

ଭୁବନେଶ୍ୱର: ଦଶହରା ପାଇଁ ରାଜଧାନୀରେ ପୂଜା ପେଣ୍ଡାଲ ଓ ପୂଜା ମଣ୍ଡପ ପୁରା ପ୍ରସ୍ତୁତ। ଲକ୍ଷାଧିକ ଲୋକଙ୍କ ସମାଗମକୁ ଦୃଷ୍ଟିରେ ରଖି ଆଇନଶୃଙ୍ଖଳା ପରିସ୍ଥିତି, ଟ୍ରାଫିକ ସମସ୍ୟା ଓ ଅପରାଧୀଙ୍କ ଉପରେ କଡା କାର୍ଯ୍ୟାନୁଷ୍ଠାନ ନେଇ କମିଶନରେଟ ପୁଲିସ ପକ୍ଷରୁ ସ୍ୱତନ୍ତ୍ର ଡ୍ରାଇଭ ଆରମ୍ଭ ହୋଇଛି। ନୂଆ ପୁଲିସ ଡିସିପି ପିନାକ ମିଶ୍ରଙ୍କ ନେତୃତ୍ୱରେ ବିଏସଏଫ ଯବାନ ଓ ଲକ୍ଷ୍ମୀସାଗର ଥାନା ଆଇଆଇସିଙ୍କ ସମେତ ଥାନାକର୍ମଚାରୀ ସାମିଲ ହୋଇଥିଲେ। ଲକ୍ଷ୍ମୀସାଗର ଥାନାରୁ ଏହି ଫ୍ଲାଗ ମାର୍ଚ୍ଚ ଆରମ୍ଭ ହୋଇ ଝାରପଡା ଓ ଲକ୍ଷ୍ମୀସାଗରର ବିଭିନ୍ନ ଆଞ୍ଚଳ ଓ ବସ୍ତି ପରି ଭ୍ରମଣ କରି ଲୋକଙ୍କୁ କ୍ରାଇମଠୁ ଦୂରରେ ରହିବା ପାଇଁ ସଚେତନତା କରାଯାଇଥିଲା। ପୂଜା ସମୟରେ କିଭଳି ରାଜଧାନୀବାସିନ୍ଦା ନିର୍ଭୟରେ ପୂଜା ମଣ୍ଡପ ଦର୍ଶନ କରିବାସହ ଶାନ୍ତି ଓ ଶୃଙ୍ଖଳାରେ ଘରକୁ ଫେରିବେ ଏ ନେଇ ପୁଲିସ ସଜାଗ ରହିଛି। ଅପରାଧିକ କାର୍ଯ୍ୟକଲାପ ଉପରେ ତୀକ୍ଷ୍ଣ ନଜର ରଖିଛି କମିଶନରେଟ ପୁଲିସ। ଚଳିତ ବର୍ଷ ଦୂର୍ଗା ପୂଜାକୁ ସମସ୍ତେ ଶାନ୍ତିଶୃଙ୍ଖଳାରେ ପାଳନ କରିବାସହ ଜନସାଧାରଣଙ୍କୁ ସହଯୋଗ କରିବାକୁ ନିବେଦନ କରିଛନ୍ତି ଭୁବନେଶ୍ୱର ଡିସିପି ପିନାକ ମିଶ୍ର।