ମୁମ୍ବାଇ : ପୂର୍ବତନ କେନ୍ଦ୍ରମନ୍ତ୍ରୀ ତଥା ବରିଷ୍ଠ କଂଗ୍ରେସ ନେତା ସୁରେଶ କଲମାଡିଙ୍କର ପରଲୋକ । ଦୀର୍ଘ ଦିନର ଅସୁସ୍ଥତା ପରେ ୮୨ ବର୍ଷ ବୟସରେ ମହାରାଷ୍ଟ୍ରର ପୁଣେର ଦୀନନାଥ ମଙ୍ଗେଶକର ହସ୍ପିଟାଲରେ ଶେଷ ନିଶ୍ୱାସ ତ୍ୟାଗ କରିଛନ୍ତି । ତାଙ୍କ ପାର୍ଥିବ ଶରୀର ଆଜି ଅପରାହ୍ନ ୨ଟା ପର୍ଯ୍ୟନ୍ତ ପୁଣେର ଏରାଣ୍ଡୱାନେର କଲମାଡି ହାଉସରେ ରଖାଯିବ । ଅପରାହ୍ନ ପ୍ରାୟ ୩:୩୦ ରେ ପୁଣେର ନାଭି ପେଠର ବୈକୁଣ୍ଠ ଶ୍ମଶାନରେ ତାଙ୍କର ଶେଷକୃତ୍ୟ ସମ୍ପନ୍ନ ହେବ ।
ସୁରେଶ କଲମାଡି ଜଣେ କ୍ରୀଡା ପ୍ରଶାସକ, ପୂର୍ବତନ କେନ୍ଦ୍ରମନ୍ତ୍ରୀ, ବରିଷ୍ଠ କଂଗ୍ରେସ ନେତା ଏବଂ ସାଂସଦ ଥିଲେ । ରାଜନୀତିରେ ପ୍ରବେଶ କରିବା ପୂର୍ବରୁ, ସେ ୧୯୬୪ ରୁ ୧୯୭୨ ପର୍ଯ୍ୟନ୍ତ ଭାରତୀୟ ବାୟୁସେନାରେ ସ୍କ୍ୱାର୍ଡନ ଲିଡର ଭାବରେ କାର୍ଯ୍ୟ କରିଥିଲେ । ୧୯୬୦ ଦଶକରେ ଏନଡିଏ ପାସ୍ କରିବା ପରେ ସେ ବାୟୁସେନାରେ ଯୋଗ ଦେଇଥିଲେ । ଛଅ ବର୍ଷ ବାୟୁସେନାରେ ସେବା କରିବା ପରେ, ସେ ୧୯୭୪ ମସିହାରେ ଏନଡିଏରେ ତାଲିମ ମଧ୍ୟ ନେଇଥିଲେ । ବାୟୁସେନାରେ ଥିବା ସମୟରେ, ସୁରେଶ କଲମାଡି ୧୯୬୫ ଏବଂ ୧୯୭୧ ଯୁଦ୍ଧରେ ମଧ୍ୟ ଅଂଶଗ୍ରହଣ କରିଥିଲେ ।
ସୁରେଶ କଲମାଡିଙ୍କ ନାମ ମୁଖ୍ୟତଃ ୨୦୧୦ ରାଜ୍ୟଗୋଷ୍ଠୀ କ୍ରୀଡାର ଆୟୋଜନ ସହିତ ଜଡିତ ଥିଲା । ତାଙ୍କ ଉପରେ ବ୍ୟାପକ ଦୁର୍ନୀତି, ଠକେଇ ଏବଂ ଇଭେଣ୍ଟ ପରିଚାଳନା ଏବଂ ଚୁକ୍ତିନାମା ପ୍ରଦାନରେ ଆର୍ଥିକ ଅନିୟମିତତା ଅଭିଯୋଗ ଆସିଥିଲା । ଫଳରେ ତାଙ୍କୁ ଗିରଫ କରାଯାଇଥିଲା ଏବଂ ଅପରାଧିକ ଷଡ଼ଯନ୍ତ୍ର ଅଭିଯୋଗ କରାଯାଇଥିଲା । ସେ ଦୀର୍ଘ ସମୟ ଧରି ଭାରତୀୟ ଅଲିମ୍ପିକ୍ ସଂଘର ସଭାପତି ଭାବରେ କାର୍ଯ୍ୟ କରିଥିଲେ ।
