ଭୁବନେଶ୍ବର : ପୋଲିସ SI ନିଯୁକ୍ତି ପରୀକ୍ଷା ଦୁର୍ନୀତି ମାମଲାରେ ସିବିଆଇ ଗତକାଲି ୪ ଜଣ ଆଶାୟୀଙ୍କୁ ମାରାଥନ ଜେରା କରିଛି । ଭୁବନେଶ୍ବର ସିବିଆଇ ଅଫିସରେ ଅଧିକାରୀମାନେ ପରୀକ୍ଷାର୍ଥୀଙ୍କୁ ମୁହାଁମୁହିଁ ଜେରା କରିଥିଲେ । ରାକେଟ ସଂପର୍କରେ ସିବିଆଇ ହାତରେ ବହୁ ଗୁରୁତ୍ବପୂର୍ଣ୍ଣ ତଥ୍ୟ ଲାଗିଥିବା କୁହାଯାଉଛି । ୮ ଘଣ୍ଟା ଜେରା ପରେ ସେମାନଙ୍କୁ ଛାଡ଼ିଥିଲା ସିବିଆଇ ।
ସୂଚନା ଅନୁଯାୟୀ, ସିବିଆଇ ପକ୍ଷରୁ ୧୦ ଜଣଙ୍କୁ ସମନ କରାଯାଇଥିଲା । ଆଜି ଅନ୍ୟମାନେ ହାଜର ହେବେ । ଓଡ଼ିଶା ପୋଲିସରେ ସବ୍-ଇନ୍ସପେକ୍ଟର ଓ ଅନ୍ୟ ପଦବୀରେ ନିଯୁକ୍ତି ପାଇଁ ଉଦ୍ଦିଷ୍ଟ କମ୍ବାଇନଡ ପୋଲିସ୍ ସର୍ଭିସ୍ ଏକଜାମିନେସନ୍-CPSE ଅକ୍ଟୋବର ୫-୬ ତାରିଖରେ ହେବାର ଥିଲା । ତେବେ ଦୁର୍ନୀତି ଯୋଗୁ ପରୀକ୍ଷାକୁ ଅନିର୍ଦ୍ଦିଷ୍ଟ କାଳ ପାଇଁ ସ୍ଥଗିତ ରଖାଯାଇଛି।
ଏହି ମାମଲାରେ ପ୍ରଶ୍ନପତ୍ର ଲିକ୍, ନିର୍ଦ୍ଦିଷ୍ଟ ପ୍ରଶ୍ନଗୁଡ଼ିକ ଉପରେ ସଂଗଠିତ କୋଚିଂ ଆନ୍ଧ୍ରପ୍ରଦେଶ ଓ ପଶ୍ଚିମବଙ୍ଗ ପର୍ଯ୍ୟନ୍ତ ବ୍ୟାପିଛି । ଜଣେ ଡିଏସପିଙ୍କ ନେତୃତ୍ବରେ ସିବିଆଇ ଟିମ୍ କେଳେଙ୍କାରୀର ତଦନ୍ତ କରୁଛନ୍ତି । ଏହି ଦୁର୍ନୀତିରେ ପ୍ରାୟ ୧,୦୦୦ କୋଟି ଟଙ୍କାର କାରବାର ହୋଇଥିବା କୁହାଯାଉଛି ।
