ନୂଆଦିଲ୍ଲୀ: ଭାରତୀୟ ଜନତା ପାର୍ଟିର କେନ୍ଦ୍ରୀୟ ନିର୍ବାଚନ କମିଟି ରବିବାର (ଅକ୍ଟୋବର ୪) ଦିନ ରାଜ୍ୟସଭା ନିର୍ବାଚନ ପାଇଁ ଦୁଇଜଣ ପ୍ରମୁଖ ପ୍ରାର୍ଥୀଙ୍କ ନାମ ଘୋଷଣା କରିଛି। ବିଜେପି ଉତ୍ତରାଖଣ୍ଡରୁ ଦିନେଶ ଆର୍ଯ୍ୟ ଏବଂ ପଶ୍ଚିମବଙ୍ଗରୁ ରୁକ୍ମିଣୀ ମଲ୍ଲିକ (କୋଏଲ୍ ମଲ୍ଲିକ)ଙ୍କୁ ପ୍ରାର୍ଥୀ କରିଛି। ଉଲ୍ଲେଖନୀୟ ଯେ, କୋଏଲ୍ ପୂର୍ବରୁ ତୃଣମୂଳ କଂଗ୍ରେସ ସହ ଜଡ଼ିତ ଥିଲେ କିନ୍ତୁ ପରେ ବିଜେପିରେ ଯୋଗ ଦେଇଥିଲେ।
କୋଏଲ୍ ମଲ୍ଲିକ, ଯିଏ ପୂର୍ବରୁ ତୃଣମୂଳ କଂଗ୍ରେସର ପ୍ରତିନିଧିତ୍ୱ କରି ରାଜ୍ୟସଭା ସାଂସଦ ହୋଇଥିଲେ, ସେ କିଛି ଦିନ ପୂର୍ବେ ନିଜ ପଦରୁ ଇସ୍ତଫା ଦେଇଥିଲେ; ବର୍ତ୍ତମାନ ବିଜେପି ତାଙ୍କୁ ନିଜର ପ୍ରାର୍ଥୀ କରିଛି। ସେ ଏପ୍ରିଲ୍ ମାସରେ ଶପଥ ଗ୍ରହଣ କରିଥିଲେ ମଧ୍ୟ ଜୁଲାଇରେ ମୌସୁମୀ ଅଧିବେଶନ ଆରମ୍ଭ ହେବା ପୂର୍ବରୁ ଇସ୍ତଫା ଦେଇଥିଲେ | ତୃଣମୂଳ କଂଗ୍ରେସ ସାଂସଦ ଭାବରେ ସେ ଗୋଟିଏ ଦିନ ପାଇଁ ମଧ୍ୟ ଅଧିବେଶନରେ ଯୋଗ ଦେଇନଥିଲେ। କୋଏଲ୍ ଜଣେ ଅଭିନେତ୍ରୀ ଏବଂ ସେ ଅନେକ ବଙ୍ଗଳା ଚଳଚ୍ଚିତ୍ରରେ କାମ କରିଛନ୍ତି।
ଆପଣଙ୍କ ସୂଚନା ପାଇଁ ଜଣାଇଦେଉଛୁ ଯେ, କୋଏଲ ଓଡ଼ିଆ ସିନେମା ‘ମହାନାୟକ’ରେ ମୁଖ୍ୟ ଅଭିନେତ୍ରୀ ଭାବେ ଅଭିନୟ କରିଥିଲେ | ଏହି ସିନେମାରେ ତାଙ୍କ ବିପକ୍ଷରେ ଅନୁଭବ ମହାନ୍ତି ମୁଖ୍ୟ ଅଭିନେତା ଭାବେ ଅଭିନୟ କରିଥିଲେ | ଏହି ଫିଲ୍ମର ନିର୍ଦ୍ଦେଶନା ଦେବୁ ପଟ୍ଟନାୟକ ଓ ସୁଧାଂଶୁ ମୋହନ ସାହୁ ଦେଇଥିଲେ |
ଅନ୍ୟପଟେ କହିବାକୁ ଗଲେ ବିଜେପି ଉତ୍ତରାଖଣ୍ଡରୁ ଦିନେଶ ଆର୍ଯ୍ୟଙ୍କୁ ରାଜ୍ୟସଭା ପ୍ରାର୍ଥୀ ଭାବରେ ମନୋନୀତ କରିଛି। ଆଗାମୀ ବିଧାନସଭା ନିର୍ବାଚନକୁ ଦୃଷ୍ଟିରେ ରଖି ତାଙ୍କର ଏହି ମନୋନୟନକୁ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି। ଦିନେଶ ଆର୍ଯ୍ୟ ପୂର୍ବରୁ ବିଜେପିର ନୈନିତାଲ ଜିଲ୍ଲା ସଭାପତି ଭାବରେ କାର୍ଯ୍ୟ କରିଛନ୍ତି ଏବଂ ଉତ୍ତରାଖଣ୍ଡରେ ରାଜ୍ୟ ମନ୍ତ୍ରୀ ପାହ୍ୟା ପାଇଛନ୍ତି। ପୂର୍ବରୁ ଏଭଳି ଚର୍ଚ୍ଚା ହେଉଥିଲା ଯେ ଗତ ବିଧାନସଭା ନିର୍ବାଚନ ସମୟରେ ଟିକେଟ୍ ନ ପାଇବାରୁ ସେ ଅସନ୍ତୁଷ୍ଟ ଥିଲେ; ତଥାପି, ଦଳ ବର୍ତ୍ତମାନ ତାଙ୍କୁ ଏକ ବଡ଼ ସୁଯୋଗ ପ୍ରଦାନ କରିଛି।
