ରାଉରକେଲା: ଆଉ ମାତ୍ର ୫୦୦ ମିଟର ଚାଲି ଯାଇଥିଲେ ସେମାନେ ପହଞ୍ଚି ଯାଇନଥାନ୍ତେ ନିଜ ଘରେ । ହେଲେ ବିଧିର ବିଧାନ ଥିଲା ଭିନ୍ନ । କାଳ ଜଗି ବସିଥିଲା ରାସ୍ତାରେ । ଘରେ ପହଞ୍ଚିବା ପୂର୍ବରୁ ୫୨୦ ଜାତୀୟ ରାଜପଥରେ ଏକ ମର୍ମନ୍ତୁଦ ସଡକ ଦୁର୍ଘଟଣାରେ ୩ ଜଣ ଯୁବକଙ୍କ ଶୋଚନୀୟ ମୃତ୍ୟୁ ହୋଇଥିବା ଦୁଃଖଦ ଖବର ଆଜି ସମଗ୍ର କୋଇଡା ତୋଡା ଅଞ୍ଚଳରେ ଶୋକର ଛାୟା ଖେଳାଇ ଦେଇଛି । ଫୁଟବଲ ଖେଳ ସାରି ନିଜ ଘରକୁ ଗୋଟିଏ ବାଇକରେ ଘରକୁ ଫେରୁଥିବା ବେଳେ କୌଣସି ଏକ ହାଇଓ୍ବା ସେମାନଙ୍କ ଉପରେ ମାଡିଯିବାରୁ ଘଟଣା ସ୍ଥଳରେ ତିନି ଜଣଙ୍କର ମୃତ୍ୟୁ ଘଟିଛି ।
କୋଇଡା ଥାନା ଅନ୍ତର୍ଗତ କାଲଟା ଫାଣ୍ଡି ଅଧିନସ୍ଥ ତୋଡ଼ା ବସ୍ତି ପାଖ ବିଞ୍ଜାଡି ପୋଲ ପାଖରେ ଏହି ମର୍ମନ୍ତୁଦ ଦୁର୍ଘଟଣା ଘଟିଛି । ତୋଡ଼ା ନିକଟସ୍ଥ ଝିରପାଣି ପଡିଆରେ ଫୁଟବଲ ମ୍ୟାଚ ଖେଳି ସାରି ଏହି ୩ ଜଣ ଯୁବକ ବାଇକ ଯୋଗେ ଘରକୁ ଫେରୁଥିବା ବେଳେ ରାଜାମୁଣ୍ତା ଆଡୁ ଆସୁଥିବା ଏକ ହାଇଓ୍ବା ସେମାନଙ୍କୁ ଧକ୍କା ଦେଇଥିଲା । ଧକ୍କାଟି ଏତେ ଜୋର ଥିଲାଯେ ବାଇକରେ ଥିବା ତିନିଜନ ଏଣେ ତେଣେ ଝିଟିକି ପଡ଼ିଥିଲେ । ଏହି ଦୁର୍ଘଟଣାରେ ତୋଡ଼ା ବସ୍ତିର ଦେବେନ୍ଦ୍ର ଦେହୁରୀ (୩୦) ଓ ତାଙ୍କ ଦୁଇ ବନ୍ଧୁ ଘଟଣାସ୍ଥଳରେ ପ୍ରାଣ ହରାଇ ଥିଲେ । ଖବର ପାଇ କାଲଟା ଫାଣ୍ଡି ଅଧିକାରୀ ନିଜ ପୁଲିସ ବାହିନୀ ସହ ଘଟଣାସ୍ଥଳରେ ଶବ ଉଦ୍ଧାର କରି ବ୍ୟବଛେଦ ପାଇଁ କୋଇଡା ସରକାରୀ ଡାକ୍ତରଖାନାକୁ ଆଣିଥିଲେ । ସେପଟେ ହାଇୱା ଡ୍ରାଇଭର କିଛି ଦୂରରେ ଗାଡ଼ି ଛାଡ଼ି ପଳାଇ ଯାଇଛି। ପୁଲିସ୍ ଗାଡ଼ିଟିକୁ ଜବତ କରି ଘଟଣାର ତଦନ୍ତ ଚଳାଇଛି।
