ସୋର : ସାବଧାନ, ବାଲେଶ୍ବରରେ ମାତିଛନ୍ତି ଲୁଟେରା । ଗୋଟିଏ ରାତିରେ ସହରର ପୃଥକ ପୃଥକ ୨ଟି ସ୍ଥାନରୁ ଦୁଇ ମହିଳାଙ୍କ ଠାରୁ ଲୁଟ୍ ଅଭିଯୋଗ । ବାଲେଶ୍ୱର ଜିଲ୍ଲା ସୋର ତୁଡିଗଡ଼ିଆ ରାସ୍ତା ସରଶଙ୍ଖ ଛକରେ ଜଣେ ମହିଳାଙ୍କ ସ୍କୁଟିକୁ ୨ ଦୁର୍ବୃତ୍ତ ପିଛା କରି ଅଟକାଇଥିଲେ । ପରେ ମହିଳାଙ୍କ ଗାଲକୁ ଚାପୁଡ଼ା ମାରି ମୋବାଇଲ ଓ ୫ଗ୍ରାମ ସୁନାର ମଙ୍ଗଳସୂତ୍ର ଛଡ଼ାଇ ନେଇ ଚମ୍ପଟ ମାରିଛନ୍ତି । ମହିଳା ଜଣକ ହେଲେ ତୁଡ଼ିଗାଡ଼ିଆ ଗାଁର ବାସନ୍ତୀ ପଣ୍ଡା । ଲୁଟ୍ ବେଳର ଦୃଶ୍ୟ ସିସି କ୍ୟାମେରାରେ କଏଦ ହୋଇଛି ।
ସେହିପରି ଥାନା ରାସ୍ତାରେ ମୋବାଇଲରେ କଥା ହୋଇ ଯାଉଥିବା ବରଖୁଡି ଗ୍ରାମର ଘନ ସିଂଙ୍କ ସ୍ତ୍ରୀ ମାମିନା ହାତରୁ ମୋବାଇଲ ନେଇ ଦୁଇ ଲୁଟେରା ଚମ୍ପଟ ମାରିଛନ୍ତି । NH ୧୬ ପୋଲିସ ପାଟ୍ରୋଲିଂ ଗାଡି ଲୁଟେରାଙ୍କ ପିଛା କରିଥିଲେ ହେଲେ ଲୁଟେରା ଖସି ପଳାଇଥିଲେ । ଲୁଟ୍ ବେଳେ ଦୁର୍ବୃତ୍ତଙ୍କ ହାତରୁ ଏକ ମୋବାଇଲ ଖସି ପଡ଼ିଥିଲା । ଯାହାକୁ ପୋଲିସ ଜବତ କରି ତଦନ୍ତ ଚଳାଇଛି । ଉଭୟ ମହିଳା ସୋର ଥାନାରେ ଅଭିଯୋଗ କରିଛନ୍ତି ।
