ବିଶିଷ୍ଟ ସାହିତ୍ୟିକ ସୁଖେନ୍ଦୁ ମୋହନ ଦାସଙ୍କ ଦେହାନ୍ତ, ପୁରୀ ସ୍ୱର୍ଗଦ୍ୱାରରେ ହେଲା ଶେଷକୃତ୍ୟ ସମ୍ପନ୍ନ

ଭୁବନେଶ୍ୱର  : ବିଶିଷ୍ଟ ସାହିତ୍ୟିକ ତଥା ଅନୁବାଦକ ସୁଖେନ୍ଦୁ ମୋହନ ଦାସଙ୍କ ଦେହାନ୍ତ । ୯୬ ବର୍ଷ ବୟସରେ ପୁରୁଣା ଭୁବନେଶ୍ୱର ସ୍ଥିତ ବାସଭବନରେ ଶେଷ ନିଃଶ୍ୱାସ ତ୍ୟାଗ କରିଛନ୍ତି ସୁଖେନ୍ଦୁ ମୋହନ । ବିଶେଷ କରି ଓଡ଼ିଆ ଭାଷାରୁ ବଙ୍ଗଳା ଓ ବଙ୍ଗଳା ଭାଷାରୁ ଓଡ଼ିଆକୁ ଅନୁବାଦ କରିବାରେ ସିଦ୍ଧହସ୍ତ ଥିଲେ ସୁଖେନ୍ଦୁ ମୋହନ । ସେ ପ୍ରଖ୍ୟାତ ସାହିତ୍ୟିକ ନିତ୍ୟାନନ୍ଦ ମହାପାତ୍ରଙ୍କ ଘରଡିହ ଉପନ୍ୟାସର ବେଙ୍ଗଲୀ ରୂପାନ୍ତର ଭିଟେ ପାଇଁ ପ୍ରସିଦ୍ଧି ଅର୍ଜନ କରିଥିଲେ । ଏହା ବ୍ୟତୀତ ରାମାୟଣ କଥା, ମହାଭାରତର କଥା, ରବୀନ୍ଦ୍ର କବିତା ଚୟନ ଆଦି 10 ଖଣ୍ଡ ପୁସ୍ତକର ରଚନା କରିଛନ୍ତି । ଶ୍ରୀଅରବିନ୍ଦଙ୍କ ଅନୁରାଗୀ ସ୍ୱର୍ଗତ ଦାସଙ୍କୁ ଧର୍ମ ପୁସ୍ତକର ଅନୁବାଦ ପାଇଁ ରାଜଧାନୀ ପୁସ୍ତକମେଳା ପୁରସ୍କାର ମିଳିଥିଲା । ପୁରୀ ସ୍ୱର୍ଗଦ୍ୱାରରେ ତାଙ୍କର ଶେଷକୃତ୍ୟ ସମ୍ପନ୍ନ ହୋଇଛି ।