ବିହାରରେ ଜାରି ରହିବ ଭୋଟର ତାଲିକା ସଂଶୋଧନ

ନୂଆଦିଲ୍ଲୀ : ବିହାରରେ ଭୋଟର ତାଲିକା ସମୀକ୍ଷା ଜାରି ରହିବ। ନିର୍ବାଚନ କମିଶନଙ୍କୁ ସୁପ୍ରିମକୋର୍ଟରୁ ସବୁଜ ସଙ୍କେତ ମିଳିଛି। ଗୁରୁବାର ଦିନ ହୋଇଥିବା ଶୁଣାଣିରେ ସୁପ୍ରିମକୋର୍ଟ ଏହି ପ୍ରକ୍ରିୟା ବନ୍ଦ କରିବାକୁ ମନା କରିଦେଇଥିଲେ। ସୁପ୍ରିମକୋର୍ଟ କହିଛନ୍ତି ଯେ ଗଣତାନ୍ତ୍ରିକ ପ୍ରକ୍ରିୟାକୁ କାର୍ଯ୍ୟକାରୀ କରାଯାଉଛି। ନିର୍ବାଚନ କମିଶନ ଏକ ସାମ୍ବିଧାନିକ ପ୍ରାଧିକରଣ। ଆମେ ଏହାକୁ ପ୍ରକ୍ରିୟା ଚଳାଇବାରୁ ବାରଣ କରିବୁ ନାହିଁ। କୋର୍ଟର ଏହି ନିଷ୍ପତ୍ତି ବିରୋଧୀଙ୍କ ପାଇଁ ଏକ ଝଟକା, କାରଣ ଏହା ନିର୍ବାଚନ କମିଶନଙ୍କ ଏହି ପଦକ୍ଷେପକୁ ବନ୍ଦ କରିବାକୁ କଂଗ୍ରେସ, ଆରଜେଡି ପ୍ରଭୃତି ବିରୋଧୀ ଦଳମାନେ ଅଭିଯାନ ଚଳାଇଥିଲେ। ତଥାପି, ସୁପ୍ରିମକୋର୍ଟ ସ୍ପଷ୍ଟ ଭାବରେ ନିର୍ବାଚନ କମିଶନଙ୍କୁ ପରିଚୟ ପତ୍ର ଭାବରେ ଆଧାର କାର୍ଡ, ରାସନ କାର୍ଡ ଏବଂ ଭୋଟର ପରିଚୟ ପତ୍ର ଅନ୍ତର୍ଭୁକ୍ତ କରିବାକୁ କହିଛନ୍ତି। ସୁପ୍ରିମକୋର୍ଟ କହିଛନ୍ତି ଯେ ଅଣ-ନାଗରିକଙ୍କ ନାମ ଭୋଟର ତାଲିକାରେ ନ ରହିବା ନିଶ୍ଚିତ କରିବା ପାଇଁ ଏକ ସଘନ ପ୍ରକ୍ରିୟା ମାଧ୍ୟମରେ ଭୋଟର ତାଲିକାକୁ ନିର୍ଭୁଲ କରିବାରେ କୌଣସି ଭୁଲ ନାହିଁ। କିନ୍ତୁ ପ୍ରସ୍ତାବିତ ନିର୍ବାଚନର ମାତ୍ର କିଛି ମାସ ପୂର୍ବରୁ ଯଦି ଆପଣ ଏହି ନିଷ୍ପତ୍ତି ନିଅନ୍ତି ତେବେ ତାହାକୁ କ’ଣ ବୋଲି ଧରାଯିବ? ସୁପ୍ରିମକୋର୍ଟ ବିହାରରେ ଭୋଟର ତାଲିକାର ସ୍ୱତନ୍ତ୍ର ପୁଂଖାନୁଫୁଂଖ ସଂଶୋଧନ (ଏସଆଇଆର) ନିଷ୍ପତ୍ତି ବିରୋଧରେ ଦାୟର ଆବେଦନଗୁଡ଼ିକର ଶୁଣାଣି କରିଥିଲେ।