ବୋଲଗଡ଼: ବୋଲଗଡ଼ ବ୍ଲକ ସମ୍ମୁଖରେ ଉତ୍ତେଜନା । ବିଡ଼ିଓଙ୍କ ବଦଳି ଦାବିରେ ନଅ ଦିନ ହେବ ଚାଲିଥିବା ଧାରଣା, ଆଜି ରାଜନୈତିକ ରୂପ ନେଇଛି । ଅଭିଯୋଗ ମୁତାବକ ବୋଲଗଡ଼ ବ୍ଲକ ସଭାପତି ଯେତେବେଳେ ବ୍ଲକ ଅଫିସକୁ ଯିବାକୁ ଉଦ୍ୟମ କରିଥିଲେ ସେତେବେଳେ ଅଫିସରେ ତାଲା ପକାଇ ଦିଆଯାଇଥିଲା । ଏହାକୁ ନେଇ ସୃଷ୍ଟି ହୋଇଥିଲା ଉତ୍ତେଜନା । ଦେଖିବାକୁ ମିଳିଥିଲା ଠେଲାପେଲା ।
ବେଶ କିଛି ଦିନ ହେଲା ବୋଲଗଡ଼ ବିଡିଓ ସୁମନସୁଧା କୁଣ୍ଡୁକୁ ନେଇ ବିବାଦ ଲାଗି ରହିଛି। ପଞ୍ଚାୟତ ପ୍ରତିନିଧିଙ୍କ କଥା ଶୁଣୁ ନଥିବା ଏବଂ ମନମାନି କରୁଥିବା ନେଇ ବିଡିଓଙ୍କ ନାଁରେ ଅଭିଯୋଗ ହେଉଥିଲା । ଜାନୁଆରୀ ୨୬ ତାରିଖ ଦିନ ସାଧାରଣତନ୍ତ୍ର ଦିବସ ଆୟୋଜନରେ ଅବ୍ୟବସ୍ଥା ପରେ ବିବାଦ ତୀବ୍ର ରୂପ ନେଇଥିଲା । ଏହାପରଠାରୁ ବିଡ଼ିଓଙ୍କ ବଦଳି ଦାବି ହୋଇ ଆସୁଛି । ନଅ ଦିନ ହେଲା ବିଡ଼ିଓଙ୍କ ବଦଳି ଦାବିରେ ଲୋକେ ଧାରଣା ଦେଉଛନ୍ତି । ଧାରଣାକୁ ସମର୍ଥନ ଦେଇଛନ୍ତି ନୟାଗଡ଼ ବିଧାୟକ ଅରୁଣ ସାହୁ । ଗତକାଲି ସାଂସଦ ସୁଲତା ଦେଓ, ଲେଲିନ ମହାନ୍ତି ପ୍ରମୁଖ ସାମିଲ ହୋଇଥିଲେ । ଭାରତୀୟ ଜନତା ପାର୍ଟିର କିଛି କର୍ମୀ ଆନ୍ଦୋଳନକାରୀଙ୍କୁ ସମର୍ଥନ କରୁଛନ୍ତି । ସେପଟେ ଆଜି ବିଜେପି ନେତା ବିଡିଓଙ୍କ ସମର୍ଥନରେ ବୋଲଗଡରେ ସମନ୍ତରାଳ ଭାବେ ଜନଜାଗରଣ ଶୋଭାଯାତ୍ରା କରୁଛନ୍ତି । ଯାହାକୁ ନେଇ ବୋଲଗଡ଼ରେ ରାଜନୈତିକ ଉଷ୍ମତା ବୃଦ୍ଧି ପାଇଛି । ପରିସ୍ଥିତି ଉତ୍ତେଜନାପୂର୍ଣ୍ଣ ଥିବାରୁ ବୋଲଗଡ ପୋଲିସ ପ୍ରଶାସନ ପକ୍ଷରୁ ଦୁଇ ପ୍ଲାର୍ଟୁନ ଫୋର୍ସ ମୁତୟନ ରଖାଯାଇଛି ।
