ସୁନ୍ଦରଗଡ଼: ସ୍କୁଲ ରୋଷଇ ଘରେ ଲାଗିଲା ନିଆଁ । ସୁନ୍ଦରଗଡ଼ ଜିଲ୍ଲା କୁତ୍ରା ବ୍ଲକ ବାଇଲାମା ଉଚ୍ଚ ପ୍ରାଥମିକ ସ୍କୁଲର ରୋଷଇ ଘରେ ଅଚାନକ ଅଗ୍ନିକାଣ୍ଡ ଘଟିଥିଲା । ସୌଭାଗ୍ୟବଶତଃ ସେହି ସମୟରେ ସ୍କୁଲରେ ଛାତ୍ରଛାତ୍ରୀ ନ ଥିବାରୁ କୌଣସି କ୍ଷୟକ୍ଷତି ହୋଇନାହିଁ। ସ୍କୁଲର ମଧ୍ୟାହ୍ନ ଭୋଜନ ପାଇଁ ବ୍ୟବହୃତ ରୋଷଇ ଘରରେ ହଠାତ୍ ନିଆଁ ଲାଗିଥିଲା । ଦେଖିବାକୁ ମିଳିଥିଲା ଯେ ରୋଷଇ ଘରେ ଥିବା ସାମଗ୍ରୀ ଦ୍ରୁତ ଗତିରେ ଜଳିବାକୁ ଲାଗିଥିଲା । ସ୍ଥାନୀୟ ଲୋକମାନେ ପ୍ରଥମେ ନିଆଁ ଦେଖି ତୁରନ୍ତ ଅଗ୍ନିଶମ ବାହିନୀକୁ ସୂଚନା ଦେଇଥିଲେ ।
ଅଗ୍ନିଶମ ବାହିନୀ ଶୀଘ୍ର ପଦକ୍ଷେପ ଗ୍ରହଣ କରି ନିଆଁକୁ ଆୟତ୍ତ କରିଥିଲେ । ନିଆଁ ଅନ୍ୟ ଆଡ଼କୁ ବ୍ୟାପିନଥିଲା । ଘଟଣା ସମୟରେ ସ୍କୁଲରେ ଛାତ୍ରଛାତ୍ରୀ ଉପସ୍ଥିତ ନଥିବାରୁ ବଡ଼ ଦୁର୍ଘଟଣା ଟଳିଯାଇଛି । ତେବେ ନିଆଁ କିପରି ଲାଗିଲା ଓ ଏହାର ପ୍ରକୃତ କାରଣ କଣ, ସେନେଇ ଅଗ୍ନିଶମ ବିଭାଗ ଓ ସ୍ଥାନୀୟ ପ୍ରଶାସନ ପକ୍ଷରୁ ତଦନ୍ତ ଜାରି ରହିଛି ।
