ଉଦଳା: ମହଙ୍ଗା ପଡ଼ିଲା ନକଲି ଦସ୍ତାବିଜ ଦେଇ ଅଧ୍ୟାପକ ଚାକିରି । ଜାଲି ଅଧ୍ୟାପକଙ୍କ ବିରୁଦ୍ଧରେ ଆକ୍ସନ । ଅଧ୍ୟାପକଙ୍କ ଠାରୁ ଗ୍ରାଣ୍ଟ-ଇନ-ଏଡର ସୁବିଧା ଉଠାଇଲା ଉଚ୍ଚଶିକ୍ଷା ବିଭାଗ । ଠକାମି କରି ନେଇଥିବା ଟଙ୍କା ଫେରାଇବାକୁ ନିର୍ଦ୍ଦେଶ ଦିଆଯାଇଛି। ଅଧ୍ୟାପକ ଜଣକ ହେଲେ ଉଦଳା କଲେଜର ଜୁଲୋଜି ବିଭାଗର ପ୍ରଭାକର ସାହୁ । ସେ ୧୯୯୩ ମସିହାରେ ପିଜି ପାସ୍ କରିଛନ୍ତି । କିନ୍ତୁ ୧୯୯୨ ମସିହାରେ ଅଧ୍ୟାପକ ଭାବେ ଚାକିରିରେ ନିଯୁକ୍ତ ହୋଇଥିଲେ । ଜାଲ ଦସ୍ତାବିଜ୍ ଦେଇ ସମସ୍ତଙ୍କୁ ଭୁଆଁ ବୁଲାଇଥିଲେ।
ସରକାରଙ୍କ ଠାରୁ କୋଟି କୋଟି ଟଙ୍କା ମଧ୍ୟ ନେଇଛନ୍ତି । ଏହି ଘଟଣା ସାମ୍ନାକୁ ଆସିବା ପରେ ତଦନ୍ତ ଚାଲିଥିଲା । ଚାକିରିରେ ନିଯୁକ୍ତି ବେଳକୁ ପିଜି ପାସ୍ କରିଥିବା ନେଇ କୌଣସି ତଥ୍ୟ ଦେଇପାରିନଥିଲେ ଅଧ୍ୟାପକ । ଫଳରେ ତାଙ୍କ ଠାରୁ ଗ୍ରାଣ୍ଟ-ଇନ-ଏଡ ସୁବିଧା ଉଠାଇନେଇଛି ଉଚ୍ଚଶିକ୍ଷା ବିଭାଗ । ଏହାସହ ଠକାମୀ କରି ନେଇଥିବା ସମସ୍ତ ଟଙ୍କା ଫେରାଇବାକୁ ନିର୍ଦ୍ଦେଶ ଦିଆଯାଇଛି ।
