ପ୍ରୟାଗରାଜ: ଉତ୍ତରପ୍ରଦେଶର ପ୍ରୟାଗରାଜରେ ଆୟୋଜିତ ଭବ୍ୟ କୁମ୍ଭ ମେଳାରେ ଜାନୁଆରୀ ୧୩ ତାରିଖରୁ ଏପର୍ଯ୍ୟନ୍ତ ପ୍ରାୟ ୩୭ କୋଟି ଶ୍ରଦ୍ଧାଳୁ ସଙ୍ଗମରେ ସ୍ନାନ କରିସାରିଛନ୍ତି। ତିନୋଟି ଅମୃତ ସ୍ନାନ ସମ୍ପନ୍ନ ହୋଇଛି। ତଥାପି ଶ୍ରଦ୍ଧାଳୁଙ୍କ ଭିଡ଼ ଜାରି ରହିଛି। ସେପଟେ ସାଧୁ ସନ୍ଥ ଓ ସନ୍ନ୍ୟାସୀମାନେ ମହାକୁମ୍ଭସ୍ଥଳରୁ ଫେରିବା ପାଇଁ ପ୍ରସ୍ତୁତି ଆରମ୍ଭ କରିଦେଇଛନ୍ତି । ବାସ୍ତବରେ କୁମ୍ଭ ସମୟରେ ବସନ୍ତ ପଞ୍ଚମୀର ଶୁଭ ସ୍ନାନ ଫେବ୍ରୁଆରି ୩ ତାରିଖରେ ଶେଷ ହୋଇଥିଲା। ସାଧୁ ସନ୍ଥ ଓ ନାଗା ସନ୍ନ୍ୟାସୀମାନେ ସ୍ନାନ କରି ବାରାଣସୀ ଅଭିମୁଖେ ଯାତ୍ରା କରିବାକୁ ପ୍ରସ୍ତୁତ ହେଉଛନ୍ତି। ସେମାନେ ସେଠାରେ ଶିବରାତ୍ରୀ ରୀତିନୀତି କରିବେ ଓ ପରେ ହୋଲି ପାଳନ କରିବେ ଏବଂ ତା’ପରେ ହରିଦ୍ୱାର ଅଭିମୁଖେ ଯାତ୍ରା କରିବେ।
ନିରଞ୍ଜନୀ ଆଖଡ଼ାର ସମ୍ପାଦକ ମହନ୍ତ ରାମ ରତନ ଗିରି ମହାରାଜ କହିଛନ୍ତି ଯେ ଆମର ପୂଜକମାନେ ରୀତିନୀତି କରନ୍ତି ଏବଂ ଆମର ଦେବଦେବୀମାନଙ୍କୁ ପୂଜା କରାଯାଏ । ଆମର ମୁଖ୍ୟ ଉଦ୍ଦେଶ୍ୟ ଥିଲା ତିନୋଟି ଅମୃତ ସ୍ନାନ ସମ୍ପୂର୍ଣ୍ଣ କରିବା, ଯାହା ବର୍ତ୍ତମାନ ଶେଷ ହୋଇଛି । ଆସନ୍ତାକାଲି ଶୁଭ ସମୟ ନିର୍ଦ୍ଧାରଣ କରିବା ପରେ ଆମେ ଅନ୍ୟ ସନ୍ନ୍ୟାସୀ ଓ ଆଖଡ଼ାମାନଙ୍କ ସହ ବାରଣାସୀ ଅଭିମୁଖେ ଯାତ୍ରା କରିବୁ। ମହାଶିବରାତ୍ରୀ ଆସୁଛି ଏବଂ ପ୍ରୟାଗରାଜରୁ ଆମେ ସାଧୁସନ୍ଥମାନଙ୍କ ସହ ବାରଣାସୀ ଯିବୁ । ଆମେ ସେଠାରେ ହୋଲି ପାଳନ କରିବୁ।
