ଭୁବନେଶ୍ୱର: ରାଜଧାନୀରେ ପୁଣି ହିଟ୍ ଆଣ୍ଡ ରନ୍। ୪ କାଉଡ଼ିଆଙ୍କୁ ପିଟି ଫେରାର ହୋଇଗଲା କାର। ଭୁବନେଶ୍ୱର ସତସଙ୍ଗ ବିହାର ଫ୍ଲାଏଓଭର ଉପରେ ଦୁର୍ଘଟଣା । ଆଜି ଭୋର ୪.୩୦ ରେ ଏଭଳି ଦୁର୍ଘଟଣା ଘଟିଛି। ଏଥିରେ ୪ ଜଣ ଆହତ ହୋଇଛନ୍ତି। ସମସ୍ତଙ୍କୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଛି। କଟକ ମହାନଦୀରୁ ପାଣି ଉଠାଇ ଲିଙ୍ଗରାଜଙ୍କୁ ଜଳାଭିଷେକ କରିବାକୁ ଯାଉଥିଲେ ପୂରା ପରିବାର। ବାଟରେ ଧକ୍କା ଦେଇ ଫେରାର ହୋଇଗଲା କାର୍ । ଆହତଙ୍କ ମଧ୍ୟରେ ଜଣେ ନାବାଳକ ଅଛନ୍ତି।
ସୂଚନା ଅନୁସାରେ, ଆଜି ଭୋର ପ୍ରାୟ ୪ଟା ୩୦ ସମୟରେ ଏହି ଦୁର୍ଘଟଣା ଘଟିଥିଲା । ଆହତ କାଉଡ଼ିଆମାନେ କଟକ ମହାନଦୀରୁ ପାଣି ଉଠାଇ ଭୁବନେଶ୍ୱର ଲିଙ୍ଗରାଜ ମନ୍ଦିରରେ ଜଳାଭିଷେକ କରିବା ପାଇଁ ଯାଉଥିଲେ । ସେମାନେ ପରିବାର ସହ ଧାର୍ମିକ ଯାତ୍ରାରେ ବାହାରିଥିଲେ । ତେବେ ଭୁବନେଶ୍ୱରର ସତସଙ୍ଗ ବିହାର ଫ୍ଲାଏଓଭର ଉପରେ ପହଞ୍ଚିବା ପରେ ହଠାତ୍ ଏକ କାର ଦ୍ରୁତ ଗତିରେ ଆସି ସେମାନଙ୍କୁ ଧକ୍କା ଦେଇଥିଲା । କାରଟି ଧକ୍କା ଦେବା ପରେ ଘଟଣାସ୍ଥଳରେ ନ ରହି ତୁରନ୍ତ ଫେରାର ହୋଇଯାଇଥିଲା। ଦୁର୍ଘଟଣା ପରେ ଆହତମାନଙ୍କୁ ତୁରନ୍ତ ଉଦ୍ଧାର କରାଯାଇ କ୍ୟାପିଟାଲ ହସ୍ପିଟାଲକୁ ନିଆଯାଇଥିଲା। ସେଠାରେ ସମସ୍ତ ୪ ଜଣଙ୍କୁ ଚିକିତ୍ସା ପାଇଁ ଭର୍ତ୍ତି କରାଯାଇଛି।
