ଶରୀରରେ ଏପରି ଅନେକ ସ୍ୱାସ୍ଥ୍ୟ ସମସ୍ୟା ରହିଛି, ଯାହାର ପ୍ରାରମ୍ଭିକ ଲକ୍ଷଣ ପରିସ୍ରା ଜନିତ ଅସୁବିଧାରୁ ଚିହ୍ନଟ କରାଯାଇପାରେ। ବିଶେଷ କରି ୫୦ ବର୍ଷରୁ ଅଧିକ ବୟସ୍କ ପୁରୁଷମାନେ ପରିସ୍ରା ସମ୍ପର୍କିତ କୌଣସି ଅସୁବିଧାକୁ ଆଦୌ ଅଣଦେଖା କରିବା ଉଚିତ୍ ନୁହେଁ।
ଦିଲ୍ଲୀ ଏମ୍ସର ୟୁରୋଲୋଜି ବିଭାଗ ପ୍ରଫେସର ଡାକ୍ତର ଋଷି ନାୟାର୍ ଏମ୍ସର ଅଫିସିଆଲ୍ ଚ୍ୟାନେଲରେ ଏକ ଭିଡିଓ ମାଧ୍ୟମରେ ସୂଚନା ଦେଇଛନ୍ତି ଯେ, ପୁରୁଷମାନେ ପରିସ୍ରା ସହ ଜଡ଼ିତ କେଉଁ କେଉଁ ଲକ୍ଷଣ ପ୍ରତି ସତର୍କ ରହିବା ଦରକାର ଏବଂ ରାତିରେ ବାରମ୍ବାର ପରିସ୍ରା ଲାଗିବା କେଉଁ ରୋଗର ଲକ୍ଷଣ ହୋଇପାରେ।
ବାରମ୍ବାର ପରିସ୍ରା ଲାଗିବାର ସମସ୍ୟା: ଡାକ୍ତର ଋଷି ନାୟାର୍ କହିଛନ୍ତି ଯେ, ଯଦି ଆପଣଙ୍କ ବୟସ ୫୦ ବର୍ଷରୁ ଅଧିକ ଏବଂ ରାତିରେ ଆପଣଙ୍କୁ ବାରମ୍ବାର ପରିସ୍ରା ପାଇଁ ଉଠିବାକୁ ପଡ଼ୁଛି, ପରିସ୍ରାର ଧାର କମିଯାଇଛି କିମ୍ବା ପରିସ୍ରା ଥଳି ସମ୍ପୂର୍ଣ୍ଣ ଖାଲି ନହେବାର ଅନୁଭବ ହେଉଛି, ତେବେ ଆପଣଙ୍କ ଶରୀର, ବିଶେଷ କରି ପରିସ୍ରାମାର୍ଗ ଓ ପ୍ରୋଷ୍ଟେଟ୍ ଗ୍ରନ୍ଥି କୌଣସି ସମସ୍ୟାର ସଙ୍କେତ ଦେଉଛି।
ପ୍ରକୃତରେ ଏହି ଲକ୍ଷଣଗୁଡ଼ିକୁ ‘ଲୋୟର୍ ୟୁରିନାରୀ ଟ୍ରାକ୍ଟ ସିମ୍ପଟମ୍ସ’ କୁହାଯାଏ। ଅଧିକାଂଶ କ୍ଷେତ୍ରରେ ଏହାର ମୁଖ୍ୟ କାରଣ ହେଉଛି ବିନାଇନ୍ ପ୍ରୋଷ୍ଟାଟିକ୍ ହାଇପରପ୍ଲାସିଆ ଅର୍ଥାତ୍ ବଢ଼ିଯାଇଥିବା ପ୍ରୋଷ୍ଟେଟ୍ । ୫୦ ବର୍ଷରୁ ଅଧିକ ବୟସର ପୁରୁଷମାନଙ୍କ କ୍ଷେତ୍ରରେ ଏହା ଅତି ସାଧାରଣ ସମସ୍ୟା।
ଏହି ଲକ୍ଷଣଗୁଡ଼ିକୁ ଅଣଦେଖା କଲେ କ’ଣ ହୁଏ: ଡାକ୍ତର ନାୟାର୍ଙ୍କ ଅନୁସାରେ, ପ୍ରୋଷ୍ଟେଟ୍ ସମସ୍ୟାର ଏହି ଲକ୍ଷଣଗୁଡ଼ିକୁ କେବେ ବି ଅଣଦେଖା କରିବା କଥା ନୁହେଁ। ଏହି ସମସ୍ୟା ଆପଣଙ୍କ ଦୈନନ୍ଦିନ କାର୍ଯ୍ୟ, ନିଦ୍ରା, କାର୍ଯ୍ୟଦକ୍ଷତା ଏବଂ ଜୀବନଶୈଳୀକୁ ଖରାପ ଭାବେ ପ୍ରଭାବିତ କରେ। ଏଥିସହ ବଢ଼ିଯାଇଥିବା ପ୍ରୋଷ୍ଟେଟ୍ ପରବର୍ତ୍ତୀ ସମୟରେ ଅନେକ ଗୁରୁତର ଜଟିଳତା ସୃଷ୍ଟି କରିପାରେ।
ବିନାଇନ୍ ପ୍ରୋଷ୍ଟାଟିକ୍ ହାଇପରପ୍ଲାସିଆ କ’ଣ: ପ୍ରୋଷ୍ଟେଟ୍ ହେଉଛି ଏକ ଛୋଟ ଅଖରୋଟ ଆକାରର ଗ୍ରନ୍ଥି, ଯାହା ପରିସ୍ରା ଥଳିର ଠିକ୍ ତଳେ ୟୁରେଥ୍ରାକୁ ଚାରିପାଖରୁ ଘେରି ରହିଥାଏ। ବୟସ ବଢ଼ିବା ସହିତ ପ୍ରୋଷ୍ଟେଟ୍ର ଆକାର ପ୍ରାକୃତିକ ଭାବେ ବୃଦ୍ଧି ପାଏ। ଅନେକ ପୁରୁଷଙ୍କ କ୍ଷେତ୍ରରେ ଏହି ବୃଦ୍ଧି ଯୋଗୁଁ ମୂତ୍ରନଳୀ ଉପରେ ଚାପ ପଡ଼ିଥାଏ, ଯାହା ଫଳରେ ପରିସ୍ରା ସମ୍ପର୍କିତ ସମସ୍ୟା ଧୀରେ ଧୀରେ ବଢ଼ିବାକୁ ଲାଗେ।
BPH କ’ଣ କ୍ୟାନ୍ସର ଅଟେ: ବିନାଇନ୍ ପ୍ରୋଷ୍ଟାଟିକ୍ ହାଇପରପ୍ଲାସିଆ (BPH) ଆଦୌ କ୍ୟାନ୍ସର ନୁହେଁ ଏବଂ ଏହା କ୍ୟାନ୍ସରରେ ପରିଣତ ହୁଏନାହିଁ। କିନ୍ତୁ ଏହାର ସଠିକ୍ ସମୟରେ ଚିକିତ୍ସା ନକଲେ ଏହା ଜୀବନଶୈଳୀକୁ ଗୁରୁତର ଭାବେ ପ୍ରଭାବିତ କରିଥାଏ।
ଅନେକ କ୍ଷେତ୍ରରେ ଏହା ୟୁରିନ୍ ଇନ୍ଫେକ୍ସନ୍, ପରିସ୍ରା ସମ୍ପୂର୍ଣ୍ଣ ବନ୍ଦ ହୋଇଯିବା ଏବଂ କିଡ୍ନୀ ଖରାପ ହେବା ଭଳି ସମସ୍ୟା ସୃଷ୍ଟି କରିପାରେ। ଅନେକ ରୋଗୀ ଦୀର୍ଘ ଦିନ ଧରି ଏହି ସମସ୍ୟା ଭୋଗିବା ପରେ ବହୁ ବିଳମ୍ବରେ ଡାକ୍ତରଙ୍କ ପାଖକୁ ଯାଆନ୍ତି, ଯେତେବେଳକୁ କିଡ୍ନୀର କାର୍ଯ୍ୟକ୍ଷମତା ବହୁତ କମିଯାଇଥାଏ।
ଏହି ଲକ୍ଷଣଗୁଡ଼ିକ ଉପରେ ଦିଅନ୍ତୁ ବିଶେଷ ଧ୍ୟାନ: ୫୦ ବର୍ଷରୁ ଊର୍ଦ୍ଧ୍ୱ ପୁରୁଷମାନଙ୍କଠାରେ ଏହି ସମସ୍ତ ଲକ୍ଷଣ ଦେଖାଗଲେ ତୁରନ୍ତ ୟୁରୋଲୋଜିଷ୍ଟଙ୍କ ପରାମର୍ଶ ନେବା ଜରୁରୀ:
- ରାତିରେ ୨ କିମ୍ବା ତା’ଠାରୁ ଅଧିକ ଥର ପରିସ୍ରା ପାଇଁ ଉଠିବା
- ପରିସ୍ରା ଅଟକି ଅଟକି ଆସିବା ବା ଧାର ଦୁର୍ବଳ ହେବା
- ପରିସ୍ରା ହେବା ବେଳେ କଷ୍ଟ ଅନୁଭବ ହେବା
- ପରିସ୍ରା ଥଳି ସମ୍ପୂର୍ଣ୍ଣ ଖାଲି ନହେବା ପରି ଲାଗିବା
- ହଠାତ୍ ଅତି ଜୋରରେ ପରିସ୍ରା ଲାଗିବା ଏବଂ ରୋକି ନପାରିବା
ଏହି ଲକ୍ଷଣଗୁଡ଼ିକ ପ୍ରାରମ୍ଭରେ ସାମାନ୍ୟ ଥିବାରୁ ପ୍ରାୟତଃ ଅଣଦେଖା ହୋଇଯାଏ। କିନ୍ତୁ ଯେତେ ଶୀଘ୍ର ଏହାର ଯାଞ୍ଚ କରାଯିବ, ଚିକିତ୍ସାର ବିକଳ୍ପ ସେତେ ଅଧିକ ଏବଂ ସହଜ ହୋଇଥାଏ।
