ଜଳେଶ୍ବର: ଅଳଙ୍କାର ସଫେଇ ବାହାନାରେ ୨ ଲକ୍ଷ ଟଙ୍କାର ଗହଣା ଲୁଟି ନେଲେ ଦୁର୍ବୃତ୍ତ । ବାଲେଶ୍ବର ଜିଲ୍ଲା ଜଳେଶ୍ବର ଥାନା ପଥରପୁରା ଗାଁରେ ଶାଶୂ ବୋହୂଙ୍କ ଠାରୁ ଅଳଙ୍କାର ଲୁଟି ନେଇ ଥାନାରେ ମାମଲା ହୋଇଛି । ଜଳେଶ୍ବର ଥାନା ପୋଲିସ ସିସିଟିଭି ଫୁଟେଜ ଆଧାର ତଦନ୍ତ ଜାରି ରଖିଛି । ଅଭିଯୋଗ ଅନୁଯାୟୀ ପଥରପୁରା ଗାଁର ବୋହୂ ସସ୍ମିତା ବେହେରା ଓ ଶାଶୂ କବିତା ବେହେରା ଘରେ ଥିବା ବେଳେ ୨ ଜଣ ଅଜଣା ଯୁବକ ବାଇକ୍ ଯୋଗେ ଗହଣା ସଫା ବାହାନାରେ ଆସିଥିଲେ ।
ବୋହୂ ସସ୍ମିତା ଯୁବକଙ୍କ କଥାକୁ ବିଶ୍ଵାସ କରି ଗୋଟିଏ ସୁନା ହାର, ଦୁଇଟି ସୁନା କାନଫୁଲ ଓ ଗୋଟିଏ ସୁନା ମୁଦି ସଫା କରିବା ପାଇଁ ଦେଇଥିଲେ । ଯୁବକମାନେ ଅଳଙ୍କାର ଗୁଡ଼ିକୁ ସଫା କରିବା ବାହାନାରେ ଏକ ପାଉଡର ମିଶ୍ରିତ ପ୍ୟାକେଟ ବାହାର କରିଥିଲେ । କିଛି ସମୟ ପରେ ପ୍ଯାକେଟ ଖୋଲିବା ପାଇଁ କହି ଚଞ୍ଚକତାର ସହ ଗହଣା ଗୁଡିକ ନେଇ ଚମ୍ପଟ ମାରିଥିଲେ । ତେବେ ପ୍ୟାକେଟ ଖୋଲିବା ପରେ ଗହଣା ନଥିବା ଦେଖି ଶାଶୂ ବୋହୂ ଠକାମିର ଶିକାର ହୋଇଥିବା ଜାଣିବାକୁ ପାଇଥିଲେ । ଲୁଟ୍ ଅଳଙ୍କାରର ମୂଲ୍ୟ ଆନୁମାନିକ ୨ ଲକ୍ଷ ଟଙ୍କାରୁ ଅଧିକ ହେବ ।
