ସରକାରୀ କର୍ମଚାରୀଙ୍କ ଉପରେ କଟକଣା ପ୍ରାକ୍‌ ଅନୁମତି ବିନା ଗଣମାଧ୍ୟମକୁ ବୟାନ ମନା

କଲକାତା  : ପଶ୍ଚିମବଙ୍ଗ ସରକାରଙ୍କ ପକ୍ଷରୁ କାର୍ଯ୍ୟରତ ସମସ୍ତ ଅଧିକାରୀ ଓ କର୍ମଚାରୀଙ୍କ ଉପରେ ଆଉ ଏକ କଟକଣା ଲାଗୁ କରାଯାଇଛି। କ୍ଷମତାପ୍ରାପ୍ତ ଉଚ୍ଚ କର୍ତ୍ତୃପକ୍ଷଙ୍କ ବିନା ଅନୁମତିରେ କୌଣସି ସରକାରୀ ଅଧିକାରୀ କିମ୍ବା କର୍ମଚାରୀ ଗଣମାଧ୍ୟମକୁ ବୟାନ ଦେଇପାରିବେନି ବୋଲି ଜଣାପଡିଛି। ଏହା ବ୍ୟତୀତ କୌଣସି ସରକାରୀ କର୍ମଚାରୀ ପୂର୍ବ ଅନୁମତି ବିନା ସମ୍ବାଦପତ୍ର, ସାପ୍ତାହିକୀରେ ଲେଖା ପ୍ରକାଶ କରିପାରିବେନି କିମ୍ବା ରେଡିଓ/ଟିଭି କାର୍ଯ୍ୟକ୍ରମରେ ଅଂଶଗ୍ରହଣ କରିପାରିବେନି। ମୁଖ୍ୟ ଶାସନ ସଚିବ ମନୋଜ ଅଗ୍ରୱାଲ ଗୁରୁବାର ଏ ସଂକାନ୍ତ ନିର୍ଦେଶନାମା ଜାରି କରିଛନ୍ତି। ଆଇଏଏସ, ଆଇପିଏସ ଭଳି ସର୍ବଭାରତୀୟ ସେବା ଅଧିକାରୀଙ୍କଠୁ ଆରମ୍ଭ କରି ପ୍ରାଦେଶିକ ସିଭିଲ ସର୍ଭିସ, କର୍ପୋରେସନ, କେନ୍ଦ୍ର/ରାଜ୍ୟ ସରକାରଙ୍କ ଅଧୀନସ୍ଥ ସଂସ୍ଥା ଓ ଅନ୍ୟ ସରକାରୀ କର୍ମଚାରୀ ଏହି ନିୟମ ପରିସରଭୁକ୍ତ ହେବେ ବୋଲି କୁହାଯାଇଛି।