ଅନୁଗୁଳ: ମହାନଦୀ ଗଣ୍ଡରେ ବଢିଛି କୁମ୍ଭୀର ସଂଖ୍ୟା । ଅନୁଗୁଳ ଜିଲ୍ଲା ସାତକୋଶିଆର ମହାନଦୀ ଗଣ୍ଡରେ ମୋଟ୍ ୧୧୦ଟି କୁମ୍ଭୀର ଗଣନା କରାଯାଇଛି । ଚଳିତବର୍ଷ ମହାନଦୀ ଗଣ୍ଡରେ ୮୮ଟି ମଗର ଏବଂ ୨୨ଟି ବିଲୁପ୍ତ ପ୍ରାୟ ଘଡ଼ିଆଳ କୁମ୍ଭୀର ରହିଛନ୍ତି । ଚଳିତ ମାସ ୬ ତାରିଖରୁ କୁମ୍ଭୀର ଗଣନା ଆରମ୍ଭ ହୋଇଥିଲା । ସାତକୋଶିଆ ମହାନଦୀ ଗଣ୍ଡର ପ୍ରାୟ ୨୨ କିମି ପର୍ଯ୍ୟନ୍ତ ଏହି ଗଣନା କରାଯାଇଥିଲା ।
ଏଥିପାଇଁ ୧୪ଟି ଟିମ୍ ଗଠନ ହୋଇଥିଲା । ପ୍ରାୟ ୭୦ ଜଣ ବନ କର୍ମଚାରୀ, ଗବେଷକ ସାମିଲ ହୋଇଥିଲେ । ଗତବର୍ଷ ଏହି ଗଣ୍ଡରେ ୭୫ଟି କୁମ୍ଭୀର ରହିଥିଲେ । ସେମାନଙ୍କ ମଧ୍ୟରେ ୫୯ଟି ମଗର ଓ ୧୬ଟି ଘଡ଼ିଆଳ ରହିଥିଲେ । ଗତବର୍ଷ ତୁଳନାରେ ଉଭୟ ଘଡ଼ିଆଳ ଓ ମଗର ସଂଖ୍ୟା ବୃଦ୍ଧି ପାଇଛି । ମହାନଦୀ ଗଣ୍ଡର ଉତ୍ତମ ବାତାବରଣ ଯୋଗୁଁ କୁମ୍ଭୀର ସଂଖ୍ୟା ବଢ଼ିଥିବା ଜଣାପଡ଼ିଛି ।
