ଭୁବନେଶ୍ୱର : ବାଲିଅନ୍ତା ସୌମ୍ୟ ରଞ୍ଜନ ମୃତ୍ୟୁ ମାମଲାରେ ଚିହ୍ନଟ ହେଲେ ସବୁ ଅଭିଯୁକ୍ତ। ସିସିଟିଭିରୁ ଚିହ୍ନଟ ହୋଇଛନ୍ତି ସବୁ ଅଭିଯୁକ୍ତ। କ୍ରାଇମବ୍ରାଞ୍ଚ ଡିଜି ବିନୟ ତୋଷ ମିଶ୍ର ଏ ନେଇ ସୂଚନା ଦେଇଛନ୍ତି । ସେ କହିଛନ୍ତି, ବାଲିଅନ୍ତା ବର୍ବର କାଣ୍ଡର ସମସ୍ତ ଅଭିଯୁକ୍ତଙ୍କୁ ଚିହ୍ନଟ କରିବା ପ୍ରକ୍ରିୟା ଶେଷ ହୋଇଛି। ସିସିଟିଭି ଫୁଟେଜ୍ ଏବଂ ଅନ୍ୟାନ୍ୟ ଭିଡିଓ ରେକର୍ଡିଂରୁ ମଜଭୁତ ପ୍ରମାଣ ମିଳିଛି। ବର୍ତ୍ତମାନ କ୍ରାଇମବ୍ରାଞ୍ଚର ଫୋକସରେ ଅଭିଯୁକ୍ତମାନଙ୍କୁ ଗିରଫ କରିବା। ତଦନ୍ତରେ ବୈଜ୍ଞାନିକ ପଦ୍ଧତି ବ୍ୟବହାର କରାଯାଉଛି। ତଦନ୍ତକୁ ନେଇ ଯେପରି କୌଣସି ସନ୍ଦେହ ନରହେ, ସେଥିପାଇଁ ବିଳମ୍ବ ହେଉଛି। ସମସ୍ତଙ୍କୁ ଗିରଫ କରାଯିବ।
ତେବେ ସମସ୍ତ ଅଭିଯୁକ୍ତ ଚିହ୍ନଟ ହୋଇ ସାରିଥିଲେ ମଧ୍ୟ ଏବେ କ୍ରାଇମବ୍ରାଞ୍ଚ ସମ୍ମୁଖରେ ରହିଛି ୪ଟି ମୁଖ୍ୟ ଚ୍ୟାଲେଞ୍ଜ। ପ୍ରଥମ ଚ୍ୟାଲେଞ୍ଜ ତଦନ୍ତର ଗୁଣବତ୍ତା ବନାମ ଜନଅସନ୍ତୋଷ । ଡିଜି ସ୍ପଷ୍ଟ କରିଛନ୍ତି ଯେ ତଦନ୍ତକୁ ନିଖୁଣ ଓ ପ୍ରମାଣଭିତ୍ତିକ କରିବା ପାଇଁ ସମୟ ଲାଗୁଛି। ଯେପରି କୋର୍ଟରେ କୌଣସି ପ୍ରଶ୍ନ ନଉଠେ। କିନ୍ତୁ ଅନ୍ୟପଟେ, ଲୋକଙ୍କ ମଧ୍ୟରେ ଥିବା ଆକ୍ରୋଶ ଏବଂ ତୁରନ୍ତ ନ୍ୟାୟ ଦାବି ମଧ୍ୟରେ ଏକ ସନ୍ତୁଳନ ରକ୍ଷା କରି କାମ କରିବା ପୋଲିସ ପାଇଁ ଏକ ବଡ଼ ଚ୍ୟାଲେଞ୍ଜ ହେବ। ଦ୍ବିତୀୟ ଚ୍ୟାଲେଞ୍ଜ ଅଭିଯୁକ୍ତଙ୍କୁ ଗିରଫ କରିବା।
ଭିଡିଓରୁ ଚିହ୍ନଟ କରିବା କେବଳ ପ୍ରଥମ ପଦକ୍ଷେପ। ଯଦି ଅଭିଯୁକ୍ତମାନେ ଫରାର ଅଛନ୍ତି, ରାଜ୍ୟ ବାହାରକୁ ପଳାଇଛନ୍ତି କିମ୍ବା ସ୍ଥାନୀୟ ସ୍ତରରେ କାହାର ସହଯୋଗ ପାଉଛନ୍ତି, ତେବେ ସେମାନଙ୍କୁ ଖୋଜି ବାହାର କରିବା ଏବଂ ଗିରଫ କରିବା ପାଇଁ ବ୍ୟାପକ ସମନ୍ୱୟର ଆବଶ୍ୟକତା ରହିଛି। ତୃତୀୟ ଚ୍ୟାଲେଞ୍ଜ ପରିବାରର ଦାବି ଓ ସୀମିତ ତଦନ୍ତ ପରିସର। ଡିଜି କହିଛନ୍ତି ପରିବାରର ଅଭିଯୋଗ କ୍ରାଇମବ୍ରାଞ୍ଚର ପରିସରଭୁକ୍ତ ନୁହେଁ। ଏହି ନିଷ୍ପତ୍ତି ଯୋଗୁଁ ଆଗକୁ ପୀଡ଼ିତ ପରିବାର ଏବଂ ତଦନ୍ତକାରୀ ସଂସ୍ଥା ମଧ୍ୟରେ ଅସନ୍ତୋଷ ବଢ଼ିପାରେ।
ଯାହା ମାମଲାକୁ ଆଇନଗତ ଭାବେ ଜଟିଳ କରିପାରେ। ଦୁଇଟି ସଂସ୍ଥାର ସମାନ୍ତରାଳ ତଦନ୍ତ କ୍ରାଇମବ୍ରାଞ୍ଚ ପାଇଁ ଅନ୍ୟତମ ଚ୍ୟାଲେଞ୍ଜ। ଏହି ଘଟଣାରେ କ୍ରାଇମବ୍ରାଞ୍ଚ ଅପରାଧିକ ମାମଲାର ତଦନ୍ତ କରୁଥିବା ବେଳେ କମିଶନରେଟ୍ ପୋଲିସ ନିଜ କର୍ମଚାରୀଙ୍କ ବିରୋଧରେ ବିଭାଗୀୟ ଯାଞ୍ଚ କରୁଛି। ଦୁଇଟିଯାକ ତଦନ୍ତ ପ୍ରକ୍ରିୟା ମଧ୍ୟରେ ଉଚିତ୍ ସମନ୍ୱୟ ରକ୍ଷା କରିବା ଏବଂ କୌଣସି ପ୍ରମାଣ ନଷ୍ଟ ନହେବା ସୁନିଶ୍ଚିତ କରିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ।
