ପାରାଦୀପ : ପାରାଦୀପରେ ନିଶା କାରବାର ଉପରେ ରୋକ ଲାଗି ଅପରେସନ କ୍ଲିନ୍ ସ୍ବିପ୍ । ଗତ ଦୁଇ ଦିନ ମଧ୍ୟରେ ପାରାଦୀପ ଆଦର୍ଶ ଥାନା ଏବଂ ଲକ୍ ଥାନା ଅଞ୍ଚଳରୁ ଦୁଇ ନିଶା ବ୍ୟବସାୟୀଙ୍କୁ ଗିରଫ କରାଗଲାଣି । ଏଥିସହ ଲକ୍ଷାଧିକ ଟଙ୍କାର ବ୍ରାଉନ ସୁଗାର ଓ ଗଞ୍ଜେଇ ଜବତ ହୋଇଛି । ଲକ୍ ଥାନା ଅଞ୍ଚଳରୁ ପ୍ରାୟ ୨୦ ଗ୍ରାମ ବ୍ରାଉନ ସୁଗାର ଜବତ କରାଯାଇଛି । ଯାହାର ଆନୁମାନିକ ବଜାର ମୂଲ୍ୟ ୨ ଲକ୍ଷ ଟଙ୍କା ହେବ ।
ଏହି ଘଟଣାରେ ନିମିଢି ଗାଁର ବଲ୍ଲଭ ସ୍ବାଇଁଙ୍କୁ ଗିରଫ କରାଯାଇଛି । ତା ନିକଟରୁ ଗୋଟିଏ ମୋବାଇଲ ଓ ନଗଦ ୫୦୦ ଟଙ୍କା ଜବତ କରାଯାଇଛି । ସେହିପରି ପାରାଦ୍ଵୀପ ଆଦର୍ଶ ଥାନା ଅଧୀନ କେବିନ୍ ମାର୍କେଟ ନିକଟ ନୂଆ ରାସ୍ତାରୁ ୧୭.୦୩ ଗ୍ରାମର ବ୍ରାଉନ ସୁଗାର ଜବତ ହୋଇଛି । ଏହି ଘଟଣାରେ ଅଠରବାଙ୍କି ଅଞ୍ଚଳର ପ୍ରଦୀପ ମନ୍ତ୍ରୀକୁ ଗିରଫ କରାଯାଇଛି । ତା ନିକଟରୁ ନଗଦ ୨୫ ହଜାର ୮୦୦ ଟଙ୍କା ଏବଂ ଗୋଟିଏ ମୋବାଇଲ ଜବତ କରାଯାଇଛି । ଉଭୟ ଘଟଣାରେ ତଦନ୍ତ ଜାରି ରହିଛି ।
