ନୂଆଦିଲ୍ଲୀ : ମହାକାଶରେ ଭାରତ ରଚିବ ଆଉ ଏକ ନୂଆ ଇତିହାସ । ଆକ୍ସିଅମ୍ ମିଶନ ମାଧ୍ୟମରେ ଭାରତୀୟ ବାୟୁସେନା ଗ୍ରୁପର କ୍ୟାପଟେନ ଶୁଭାଂଶୁ ଶୁକ୍ଳା ଆସନ୍ତା ମେ ମାସରେ ଅନ୍ତର୍ଜାତୀୟ ମହାକାଶ ଷ୍ଟେସନକୁ ଯିବେ । ଯାହା ଫଳରେ ୪୦ ବର୍ଷ ପରେ ଭାରତର ଏହି ସ୍ବପ୍ନ ପୂରଣ ହେବ । ଭାରତୀୟ ବାୟୁସେନା ଗ୍ରୁପର କ୍ୟାପଟେନ ଶୁଭାଂଶୁ ଶୁକ୍ଳା ମେ ମାସରେ ଅନ୍ତର୍ଜାତୀୟ ମହାକାଶ ଷ୍ଟେସନ ଯାତ୍ରା କରିବେ । ଆକ୍ସିଅମ୍ ମିଶନ ମାଧ୍ୟମରେ ସେ ମହାକାଶ ଯାତ୍ରା କରିବେ । ଏହି ଅଭିଯାନ ଜରିଆରେ ଆଗାମୀ ଦିନରେ ଭାରତ ମହାକାଶ ଯାତ୍ରା କ୍ଷେତ୍ରରେ ଦ୍ବିତୀୟ ସ୍ଥାନରେ ରହିବ । ଏହି ଯାତ୍ରାରେ ଅନ୍ୟ ୪ଟି ଦେଶର ଅନ୍ତରୀକ୍ଷ ଯାତ୍ରୀ ମଧ୍ୟ ସାମିଲ ରହିବେ । ଶୁଭାଂଶୁ ଶୁକ୍ଳାଙ୍କ ପୂର୍ବରୁ ଭାରତର ରାକେଶ ଶର୍ମା ୧୯୮୪ ମସିହାରେ ମହାକାଶ ଯାତ୍ରା କରିଥିଲେ । ଏହି ମିଶନ ୧୪ ଦିନ ଧରି ଚାଲୁ ରହିବ । ଏହି ମିଶନ ପ୍ରକ୍ରିୟାକୁ ବୈଜ୍ଞାନିକ ପଦ୍ଧତିରେ ପରୀକ୍ଷଣ କରାଯିବ । ସ୍ପେସଏକ୍ସ ଡ୍ରାଗନ କ୍ୟାପସୁଲରେ ମହାକାଶକୁ ଯାତ୍ରା କରିବେ । ଏହାର ଉତକ୍ଷେପଣ ଆମରିକାର ନାସାରୁ କରାଯିବ । ଏହି ଯାନର ସମସ୍ତ ପ୍ରସ୍ତୁତି ପରେ ଉତକ୍ଷେପଣର ତାରିଖ ଧାର୍ଯ୍ୟ କରାଯିବ ।
ସୂଚନାନୁଯାୟୀ, ଏହି ମିଶନ ଅଧୀନରେ ଅନେକ ବଡ କାମ କରାଯିବ । ଯାହାର ମୁଖ୍ୟ ଉଦ୍ଦେଶ୍ୟ ହେଉଛି ଯେ ଟେକନୋଲୋଜି ଉପକରଣର ପରୀକ୍ଷଣ କରିବା । ଗବେଷଣା ଦ୍ବାରା ପୃଥିବୀ ଲୋକଙ୍କୁ ସଚେତନ କରାଯିବ । ଏହାର ତିନିଟି ମିଶନ ସଫଳତାର ସହ ଆଗକୁ ବଢିଛି । ଯାହାକି ୧୭ ଦିନର ମିଶନ ରହିଥିଲା । ବର୍ତ୍ତମାନ ମିଶନରେ ୪ଟି ଦେଶ ଭାରତ ସହ ଜଡ଼ିତ ହୋଇ ରହିଛନ୍ତି ।ଭାରତ ପାଇଁ ଏହା ଏକ ବଡ ଉପଲବ୍ଧି । ଏହା ଦ୍ବାରା ଅନ୍ୟ ମହାକାଶ ମିଶନରେ ନୂଆ ସମ୍ଭାବନାର ଆଶା ରହିଛି । ଏହି ମିଶନ ଭାରତକୁ ବିଶ୍ବ ମହାକାଶ ଗବେଷଣାରେ ଗୁରୁତ୍ବପୂର୍ଣ୍ଣ ଭୂମିକା ଗ୍ରହଣ କରିବାର ସୁଯୋଗ ଦେବ ।
