ସେ ଯୁଗ ଆଉ ନାହିଁ ଯେଉଁଠି କେବଳ ଉଚ୍ଚ ବର୍ଗର ଲୋକେ କ୍ରିକେଟ୍ ଖେଳୁଥିଲେ କିମ୍ବା ବଡ଼ ଘରର ପିଲା ବ୍ୟାଟ୍ ବଲ୍ ଧରି ପଡ଼ିଆକୁ ଆସୁଥିଲେ । ଏବେ ସମୟ କେବଳ ପ୍ରତିଭାବାନ୍ ଖେଳାଳିଙ୍କର । ସେ ଭାରତୀୟ କ୍ରିକେଟ୍ ଟିମ୍ ହେଉ ଅବା ଆଇପିଏଲ୍, ସବୁଠି ଗରିବୀ ସହ ସଂଘର୍ଷ କରି ଆସିଥିବା ଖେଳାଳିଙ୍କୁ ଦେଖିବାକୁ ମିଳୁଛି । ଏଭଳି ଜଣେ ଖେଳାଳିଙ୍କୁ ଏଥର ଆଇପିଏଲରେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ଦଳରୁ ଖେଳିବାକୁ ସୁଯୋଗ ମିଳିଛି । ସେ ହେଉଛନ୍ତି ଜଣେ ଟ୍ରକ୍ ଡ୍ରାଇଭରର ପୁଅ । ବାପାଙ୍କର ସଂଘର୍ଷରୁ ଜନ୍ମ ଏଇ ପିଲାଟିର ନାଁ ହେଉଛି ମଙ୍ଗେଶ ଯାଦବ । ଜଣେ ଅଲରାଉଣ୍ଡର । ବାପା ତାଙ୍କର ଖୁବ୍ କଷ୍ଟ କରି ତାଙ୍କୁ କ୍ରିକେଟ୍ ଖେଳି ଆଗକୁ ବଢ଼ିବା ପାଇଁ ପ୍ରୋତ୍ସାହନ ଦେଇଛନ୍ତି ।
ନିଜ ଜୀବନ ସଂଘର୍ଷ ବିଷୟରେ ମଙ୍ଗେଶଙ୍କ ବାପା ରାମାବଧ ମଙ୍ଗେଶ କହିଛନ୍ତି କି ଟ୍ରକ୍ ଡ୍ରାଇଭର ଜୀବନ ଭାରି କଷ୍ଟକର । ରାତି ରାତି ଟ୍ରକ୍ ଚଲାଇବାରେ ଯାଏ । ନା ଖାଇବା ପିଇବା ନା ଶୋଇବା କି ଗାଧୋଇବା, କିଛିର ବି ଠିକ୍ ଠିକଣା ନଥାଏ । ଗାଡ଼ି ଚଳାଇବା ବେଳେ ବି ପୁଅ କଥା ଚିନ୍ତା କରୁଥିଲେ । କୋଉଠୁ ପଇସା ଆଣି ଘର ଚଳାଇବେ ଓ ତା କ୍ରିକେଟ୍ ପାଇଁ ଖର୍ଚ୍ଚ କରିବେ । ତଥାପି ସଂଘର୍ଷ କରି ଚାଲିଲେ ଓ ମଙ୍ଗେଶ ଆଇପିଏଲରେ ଖେଳିବାର ସୁଯୋଗ ପାଇଲେ । ପିଲା ବେଳେ ତାଙ୍କୁ ଖେଳିବା ପାଇଁ ବିଶେଷ ପ୍ରୋତ୍ସାହନ ଦେଇଥିଲେ ତାଙ୍କ ଦାଦା ଓ ମା । ଛୋଟ ଥିଲା ବେଳେ ମଙ୍ଗେଶ ନିଜ ସାହିରେ ଖେଳିବାକୁ ଗଲେ ପ୍ରାୟ ଝଗଡ଼ା ହେଉଥିଲା । ଆଉ ସେ କାନ୍ଦି କାନ୍ଦି ଘରକୁ ଫେରୁଥିଲେ । ତେଣୁ ତାଙ୍କ ମା ଘର ଅଗଣାରେ ବୋଲିଂ କରୁଥିଲେ ଓ ମଙ୍ଗେଶ ବ୍ୟାଟିଂ କରୁଥିଲେ । ତେଣୁ ମା’ହିଁ ଥିଲେ ତାଙ୍କ ପ୍ରଥମ କୋଚ୍ ।
ମଧ୍ୟପ୍ରଦେଶର ଏକ ଛୋଟ ଗାଁରୁ ଆସିଛନ୍ତି ମଙ୍ଗେଶ ଯାଦବ । ପ୍ରଥମେ ରାଜ୍ୟ କ୍ରିକେଟ୍ ଲିଗରେ ଚମତ୍କାର ଖେଳିଲେ । ତାଙ୍କୁ ନେଇ ଚାରିଆଡ଼େ ଚର୍ଚ୍ଚା ହେଲା । ତାପରେ ମିଳିଗଲା ଆରସିବିରେ ସୁଯୋଗ । ତାଙ୍କୁ ୫ କୋଟି ୨୦ ଲକ୍ଷ ଟଙ୍କାରେ କିଣିଛି ଆରସିବି । ଆଉ ଏହି ସିଜିନରେ ସେ ଡେବ୍ୟୁ କରିବେ । ମଙ୍ଗେଶ ଜଣେ ବାମହାତୀ ବୋଲର ଏବଂ ନିମ୍ନକ୍ରମରେ ଭଲ ବ୍ୟାଟିଂ କରନ୍ତି । ଦେଖିବାର କଥା ଏଇ ଯୁବା ଖେଳାଳି କି ଜଲୱା ଦେଖାଉଛନ୍ତି ।
