Thursday, July 18, 2024
29 C
Odisha

    ପାରା, ଗୁଣ୍ଡୁଚିମୂଷାଙ୍କୁ ଦିଆଯିବ ଗର୍ଭନିରୋଧକ ଔଷଧ

    ଆଗକୁ ପଢନ୍ତୁ

    ୱାଂଶିଟନ/ଇଂଲଣ୍ଡ: ଆମେରିକା ଏବଂ ୟୁରୋପରେ ପାରା ଏବଂ ଗୁଣ୍ଡୁଚିମୂଷାଙ୍କୁ ଗର୍ଭନିରୋଧକ ଔଷଧ ପ୍ରଦାନ କରାଯିବ। ସେମାନଙ୍କ ବଢୁଥିବା ସଂଖ୍ୟା ମଣିଷ ତଥା ପରିବେଶ ପାଇଁ ବିପଦ ସୃଷ୍ଟି କରୁଥିବା ବୈଜ୍ଞାନିକ କହିଛନ୍ତି।

    ବିଭିନ୍ନ ସଭ୍ୟତାରେ ମଣିଷ ସହିତ ରହିଥିବା ପାରା ଏବେ ପ୍ରକୃତି ପାଇଁ ବିପଦ ଡାକି ଆଣିଥିବା କୁହାଯାଉଛି। ଅତୀତରେ ରାଜା ଏବଂ ସମ୍ରାଟମାନଙ୍କ ପାଇଁ ପରାରା ଏକ ଦୂତର କାର୍ଯ୍ୟ ତୁଲାଉଥିଲା। ମାତ୍ର ଏବେ ପାରା ମଣିଷ ଏବଂ ପ୍ରକୃତି ପାଇଁ ବିପଦ ପାଲଟିଛି। ଆମେରିକୀୟ ଏବଂ ୟୁରୋପୀୟ ବୈଜ୍ଞାନିକମାନେ ଏହା କହିଛନ୍ତି। ଏହି କାରଣରୁ ବର୍ତ୍ତମାନ ଏହି ପାରା ଏବଂ ଗୁଣ୍ଡୁଚିମୂଷାଙ୍କ ସଂଖ୍ୟା ହ୍ରାସ ଉପରେ ଗୁରୁତ୍ୱ ଦିଆଯାଉଛି। ଏଥିପାଇଁ ବୈଜ୍ଞାନିକମାନେ ସେମାନଙ୍କୁ ଗର୍ଭନିରୋଧକ ବଟିକା ଦେବାକୁ ଯୋଜନା କରୁଛନ୍ତି।

    ବୈଜ୍ଞାନିକମାନେ କହିଛନ୍ତି ଯେ ପାରା, ଗୁଣ୍ଡୁଚିମୂଷା, ବଣୁଆ ଘୁଷୁରୀ, ଶୁଆ, ହରିଣ ଇତ୍ୟାଦି ପ୍ରାଣୀ ବର୍ତ୍ତମାନ ମଣିଷ ଏବଂ ପ୍ରକୃତି ପାଇଁ ବିପଦ ପାଲଟିଛନ୍ତି। ଏହାର କାରଣ ହେଉଛି ଦିନକୁ ଦିନ ସେମାନଙ୍କ ସଂଖ୍ୟା ବୃଦ୍ଧି ପାଉଛି। ଗୁଣ୍ଡୁଚିମୂଷାମାନଙ୍କ ମଧ୍ୟରେ, ଧୂସର ଗୁଣ୍ଡୁଚି ପ୍ରଜାତି ଗୌରବ ବଢ଼ାଇବା ଉଦ୍ଦେଶ୍ୟରେ ୧୮୦୦ ମସିହାରେ ଆମେରିକାରୁ ଇଂଲଣ୍ଡକୁ ଅଣାଯାଇଥିଲା। ବର୍ତ୍ତମାନ ସେମାନଙ୍କ ସଂଖ୍ୟା ଏଠାରେ ଯଥେଷ୍ଟ ବୃଦ୍ଧି ପାଇଛି। ଏହି ଧୂସର ଗୁଣ୍ଡୁଚିମୂଷାମାନଙ୍କ ଯୋଗୁଁ ସ୍ଥାନୀୟ ଲାଲ୍ ଗୁଣ୍ଡୁଚିମୂଷାମାନଙ୍କ ବଂଶ ବିଲୁପ୍ତ ହେବାକୁ ଯାଉଛି।

    ଆହୁରି ମଧ୍ୟ, ଏହି ଧୂସର ଗୁଣ୍ଡୁଚିମୂଷାମାନେ ଗଛର ବକଳାକୁ ଚୋବାଇ ଗଛର କାଠକୁ କ୍ଷତି ପହଞ୍ଚାଉଛନ୍ତି। ଇଂଲଣ୍ଡର ରୟାଲ ଫରେଷ୍ଟ ସୋସାଇଟି ଦ୍ବାରା କରାଯାଇଥିବା ଏକ ସର୍ଭେରୁ ଜଣାପଡିଛି ଏହିଗୁଣ୍ଡୁଚିମୂଷାମାନଙ୍କ ଯୋଗୁ ବାର୍ଷିକ ପ୍ରାୟ ୪୦ କୋଟି ଟଙ୍କା କ୍ଷତି ହେଉଛି। ଏହା ବ୍ୟତୀତ ଏହି ଗୁଣ୍ଡୁଚିମୂଷାମାନେ ଗଛର ପତ୍ରକୁ ମଧ୍ୟ କ୍ଷତି ପହଞ୍ଚାଉଛନ୍ତି। ପାରା ବିଷୟରେ ବୈଜ୍ଞାନିକମାନେ କହିଛନ୍ତି ଯେ ସେମାନେ ମଣିଷରେ ଶ୍ୱାସକ୍ରିୟାରେ ସମସ୍ୟା ସୃଷ୍ଟି କରୁଛନ୍ତି। ସେହିଭଳି ଅନ୍ୟ ପ୍ରାଣୀମାନେ ମଧ୍ୟ କ୍ଷତି ଘଟାଉଛନ୍ତି। ତେଣୁ ସେମାନଙ୍କ ସଂଖ୍ୟାକୁ ନିୟନ୍ତ୍ରଣ କରିବା ପାଇଁ ଗର୍ଭନିରୋଧକ ବଟିକା ଦେବା ପାଇଁ ଯୋଜନା କରାଯାଇଛି।

    ୟୁରୋପ ଏବଂ ସ୍କାଣ୍ଡିନେଭିଆର ଲୋକଙ୍କ ପାଇଁ ଘୁଷୁରୀ ସମସ୍ୟା ସୃଷ୍ଟି କରୁଛନ୍ତି। ଇଟାଲୀ କୃଷକ ସଂଗଠନ କହିଛି ୨୦୧୦ରେ ଏଠାରେ ବଣୁଆ ଘୁଷୁରୀ ସଂଖ୍ୟା ପ୍ରାୟ ୫ ଲକ୍ଷ ଥିଲା, ଯାହା ୨୦୨୦ରେ ୧୦ ଲକ୍ଷକୁ ବୃଦ୍ଧି ପାଇଛି। ସେମାନେ ଫସଲକୁ କ୍ଷତି ପହଞ୍ଚାଇବା ସହିତ ରାସ୍ତାରେ ବୁଲାବୁଲି କରୁଥିବାରୁ ସଡ଼କ ଦୁର୍ଘଟଣାର ମାମଲାକୁ ମଧ୍ୟ ଯଥେଷ୍ଟ ବୃଦ୍ଧି କରୁଛନ୍ତି। ଜର୍ମାନୀ ଏବଂ ଫ୍ରାନ୍ସରେ ପ୍ରତିବର୍ଷ ୫ ନିୟୁତରୁ ଅଧିକ ବଣୁଆ ଘୁଷୁରୀଙ୍କୁ ଗୁଳି କରି ମରାଯାଇଥାଏ। ତଥାପି ସେମାନଙ୍କ ସଂଖ୍ୟା ନିୟନ୍ତ୍ରିତ ହେଉନାହିଁ।

    ବୈଜ୍ଞାନିକମାନେ କହିଛନ୍ତି ଏହି ପ୍ରାଣୀମାନଙ୍କର ସଂଖ୍ୟା ହ୍ରାସ କରିବା ପାଇଁ ସେମାନଙ୍କୁ ମାରିବା ପରିବର୍ତ୍ତେ ସେମାନଙ୍କର ପ୍ରଜନନ କ୍ଷମତା ହ୍ରାସ କରିବା ଭଲ। ଦି ଗାର୍ଡିଆନ୍‌ରେ ପ୍ରକାଶିତ ଖବର ଅନୁଯାୟୀ ନ୍ୟୁୟର୍କ ବିଶ୍ୱବିଦ୍ୟାଳୟର ଡକ୍ଟର ଜିଓଭାନ୍ନା ମାସେ କହିଛନ୍ତି ଯେ ଏହି ପଶୁମାନେ ସମଗ୍ର ବିଶ୍ୱରେ ଅର୍ଥନୈତିକ ଏବଂ ପରିବେଶ କ୍ଷତି ଘଟାଉଛନ୍ତି। ଏହାକୁ ବନ୍ଦ କରିବା ପାଇଁ ଆମେ ସୃଜନଶୀଳ ବିକଳ୍ପ ଖୋଜୁଛୁ। ସେମାନଙ୍କୁ ଗର୍ଭନିରୋଧକ ଔଷଧ ଦେବାକୁ ଯୋଜନା କରାଯାଇଛି। ଗୁଳି କରି ଅବା ବିଷ ଦେଇ ଏଭଳିଙ୍କୁ ପଶୁ କିମ୍ବା ପକ୍ଷୀମାନଙ୍କୁ ମାରିବା ଅପେକ୍ଷା ଏହି ପଦ୍ଧତି ଭଲ ।

    ବୈଜ୍ଞାନିକମାନେ କହିଛନ୍ତି ଯେ ଏହି ପ୍ରାଣୀମାନଙ୍କର ସଂଖ୍ୟାକୁ ନିୟନ୍ତ୍ରଣ କରିବା ପାଇଁ ସେମାନେ ଖାଉଥିବା ଶସ୍ୟରେ ଜନ୍ମ ନିୟନ୍ତ୍ରଣ ବଟିକା ଦେବାକୁ ବୈଜ୍ଞାନିକମାନେ ଚିନ୍ତା କରୁଛନ୍ତି। ତେବେ କେତେକ ସ୍ଥାନରେ ଏହାର ବ୍ୟବହାର ମଧ୍ୟ ଚାଲିଛି। ବ୍ରିଟେନରେ, ଗର୍ଭନିରୋଧକ ବଟିକା ଧୂସରଗୁଣ୍ଡୁଚିମୂଷାମାନଙ୍କୁ ହଜେଲନଟ୍ ନାମକ ଏକ ଫଳରେ ରଖି ଦିଆଯାଉଛି।

    ବାସ୍ତବରେ, ଏହା ଭିତରେ ଲୁଚି ରହିଥିବା ନରମ ଖାଦ୍ୟ ଖାଇବା ପାଇଁ ଏହାକୁ ଖୋଲିବା ଟିକିଏ କଷ୍ଟସାଧ୍ୟ। ଯାହାକୁ ଲାଲ୍ ଗୁଣ୍ଡୁଚିମୂଷାମାନେ ଖୋଲି ପାରି ନ ଥାନ୍ତି। ଏହାକୁ କେବଳ ଧୂସର ଗୁଣ୍ଡୁଚିମୂଷାମାନେ ଖୋଲି ପାରିଥାନ୍ତି। ତେଣୁ, ଧୂସର ଗୁଣ୍ଡୁଚିମୂଷାମାନଙ୍କ ପ୍ରଜାତିଗୁଡିକୁ ନିୟନ୍ତ୍ରଣ କରିବା ପାଇଁ ହାଜେଲନାଟ୍ ବ୍ୟବହାର କରାଯାଊଛି। ଏହାର ଫଳାଫଳ ଭଲ ବୋଲି ବୈଜ୍ଞାନିକମାନେ କହିଛନ୍ତି। ପାରା ଏବଂ ଅନ୍ୟ ପକ୍ଷୀମାନଙ୍କ ସଂଖ୍ୟାକୁ ନିୟନ୍ତ୍ରଣ କରିବା ପାଇଁ, ଶସ୍ୟ ସହିତ ମିଶ୍ରଣ କରି ସେମାନଙ୍କୁ ଗର୍ଭନିରୋଧକ ବଟିକା ଦିଆଯାଉଛି।

    ଅନ୍ୟାନ୍ୟ ଖବର

    ପାଣିପାଗ

    Odisha
    broken clouds
    29 ° C
    29 °
    29 °
    81 %
    2.2kmh
    80 %
    Thu
    29 °
    Fri
    30 °
    Sat
    30 °
    Sun
    29 °
    Mon
    26 °

    ସମ୍ବନ୍ଧିତ