ନୂଆଦିଲ୍ଳୀ: ସୋମବାର ଦିନ ନୂଆଦିଲ୍ଲୀର ବାୟୁ ପ୍ରଦୂଷଣ ସ୍ତର ‘ସଂଘାତିକ ସ୍ତର’ରେ ପହଞ୍ଚିଛି। ଏହି କାରଣରୁ ସହରରେ ପ୍ରଦୂଷଣ ନିୟନ୍ତ୍ରଣ ପଦକ୍ଷେପ କାର୍ଯ୍ୟକାରୀ ହେବାପରେ ଦଶମରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ଥିବା ସମସ୍ତ ଶ୍ରେଣୀକୁ ଅନଲାଇନରେ ପାଠପଢ଼ା ପାଇଁ ନିର୍ଦ୍ଦେଶ ମିଳିଛି। କେବଳ ସେତିକି ନୁହେଁ; ପ୍ରଦୂଷିତ ଯାନ ଏବଂ କାର୍ଯ୍ୟକଳାପ ଉପରେ ମଧ୍ୟ କଡ଼ା ପ୍ରତିବନ୍ଧକ ଲଗାଯାଇଛି।
ସହରରେ ଘନ କୁହୁଡି ଯୋଗୁ ଭାରତ ପାଣିପାଗ ବିଭାଗ ଏକ କମଳା ଆଲର୍ଟ ଜାରି କରିଛି। ଘନ କୁହୁଡ଼ିରେ ସହର ଆଚ୍ଛାଦିତ ହୋଇ ଦୃଶ୍ୟମାନତା ହ୍ରାସ ପାଇ ବିମାନ ଚଳାଚଳ ବ୍ୟାହତ ହୋଇ କିଛିଟା ବିମାନ ବିଳମ୍ବରେ ଉଡ଼ାଣ ଭରିଛନ୍ତି।
ସୋମବାର ସନ୍ଧ୍ୟାରେ ଜାତୀୟ ରାଜଧାନୀରେ କ୍ରମାଗତ ଭାବେ ଗମ୍ଭୀର ଅବସ୍ଥାରେ ବାୟୁ ରହିଛି। ରବିବାର ସଂଧ୍ୟାରେ ବାୟୁ ଗୁଣବତ୍ତା ସୂଚକାଙ୍କ (ଏକ୍ୟୁଆଇ) ୪୫୭ ରହିଥିଲା। ଆଜି ସକାଳ ସୁଦ୍ଧା ଆହୁରି ବୃଦ୍ଧି ପାଇ ଗୁରୁତର ଅବସ୍ଥାରେ ପହଞ୍ଚିଛି। ଦିଲ୍ଲୀର ୩୯ଟି ମନିଟରିଂ ଷ୍ଟେସନ ମଧ୍ୟରୁ ଅଧିକାଂଶ ‘ଗମ୍ଭୀର’ ବର୍ଗରେ ୪୫୦+ ବାୟୁ ଗୁଣବତ୍ତା ରେକର୍ଡ ହୋଇଛି।
ଘନ କୁହୁଡ଼ି ଦୃଶ୍ୟମାନତାକୁ ଯଥେଷ୍ଟ ହ୍ରାସ କରିଥିଲା ଏବଂ ଦିଲ୍ଲୀ ବିମାନବନ୍ଦରରେ ଅଧିକାଂଶ ବିମାନକୁ ୩୦ମିନିଟରୁ ଏକ ଘଣ୍ଟା ବିଳମ୍ବ ଘଟାଇଥିଲା। କର୍ତ୍ତୃପକ୍ଷ ଯାତ୍ରୀମାନଙ୍କୁ ନିଜ ନିଜ ଅପରେଟରଙ୍କ ସହିତ ବିମାନ କାର୍ଯ୍ୟସୂଚୀ ନିଶ୍ଚିତ କରିବାକୁ ପରାମର୍ଶ ଦେଇଥିବା ବେଳେ ସ୍ପାଇସଜେଟ ଏବଂ ଇଣ୍ଡିଗୋ ଯାତ୍ରୀମାନଙ୍କୁ ଚେତାବନୀ ଦେଇଛନ୍ତି ଯେ କୁହୁଡି ହେତୁ ଟ୍ରାଫିକ ଧୀର କିମ୍ବା ବିଳମ୍ବ ହୋଇପାରେ।
