ଆମ ଦେଶ ଭାରତ ୭୯ ତମ ସ୍ୱାଧୀନତା ଦିବସ ପାଳନ କରିବା ଅବସରରେ ଏବେ ସାରା ଦେଶରେ ପାଳିତ ହେଉଛି ଘର ଘର ତ୍ରିରଙ୍ଗା । ତେଣୁ ଆଜି ବିଭିନ୍ନ ସ୍ଥାନରେ ତ୍ରିରଙ୍ଗା ଶୋଭାଯାତ୍ରା ବାହାରିଥିଲା । ପଟ୍ଟାମୁଣ୍ଡାଇ ପୌର ପରିଷଦ ଓ ପଟ୍ଟାମୁଣ୍ଡାଇ ମହାବିଦ୍ୟାଳୟର ସମସ୍ତ ଛାତ୍ରଛାତ୍ରୀମାନେ ଏକ ବିଶାଳ ତ୍ରିରଙ୍ଗା ଶୋଭାଯାତ୍ରା ବାହାର କରି ପଟ୍ଟାମୁଣ୍ଡାଇ ନଗର ପରିକ୍ରମା କରିଥିଲେ । ବନ୍ଦେ ମାତରମ୍, ଭାରତ ମାତାକି ଜୟ ଧ୍ବନି ଦେଇ ଦେଶଭକ୍ତି ଗୀତ ଗାଇବା ସହ ନଗର ପରିକ୍ରମା କରିଥିଲେ ସମସ୍ତେ । ପ୍ରବଳ ବର୍ଷାରେ ବି ସମସ୍ତଙ୍କ ମନରେ ଭାରତ ମାତା ପାଇଁ ଯେଉଁ ପ୍ରେମ ଦେଖିବାକୁ ମିଳିଥିଲା ତାହା ସତରେ ପ୍ରଶଂସନୀୟ ।
ସମାନ ଭାବେ ଭଦ୍ରକ ଜିଲ୍ଲା ବାସୁଦେବପୁର ଅଟଳ ବିହାରୀ ମହାବିଦ୍ୟାଳୟ ପକ୍ଷରୁ ଏକ ବିଶାଳ ତ୍ରିରଙ୍ଗା ଶୋଭାଯାତ୍ରା ଅନୁଷ୍ଠିତ ହୋଇଯାଇଛି । ମହା ବିଦ୍ୟାଳୟର ଛାତ୍ରଛାତ୍ରୀମାନେ ସାମିଲ ହୋଇ ଏକ ୧୦୦ ଫୁଟ ଲମ୍ବର ତ୍ରିରଙ୍ଗା ଧରି ସହର ପରିକ୍ରମା କରିଥିଲେ ।
ଏପଟେ ଗଞ୍ଜାମ ଜିଲ୍ଲା ଦିଗପହଣ୍ଡିରେ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦର ଦିଗପହଣ୍ଡି ନଗର ପକ୍ଷରୁ ଅଖଣ୍ଡ ଭାରତ ସଂକଳ୍ପ ଦିବସ ଓ ସ୍ୱାଧୀନତା ସଂଗ୍ରାମୀଙ୍କ ସ୍ମୁତିରେ ଏକ ବିଶାଳ ତ୍ରିରଙ୍ଗା ଶୋଭାଯାତ୍ରା ଅନୁଷ୍ଠିତ ହୋଇଯାଇଛି । ଏହି ଅବସରରେ ଅନେକ ବିଦ୍ୟାର୍ଥୀ ଓ କାର୍ଯ୍ୟକର୍ତ୍ତା ବହୁସଂଖ୍ୟାରେ ସାମିଲ ହୋଇ ଦିଗପହଣ୍ଡି ନଗର ପରିକ୍ରମା କରିଥିଲେ। ଶହେ ଫୁଟ ତ୍ରିରଙ୍ଗା ପତାକାକୁ ଧରି ସହର ପରିକ୍ରମା କରାଯାଇଥିଲା l
ଅନ୍ୟପଟେ କଟକ ଜିଲ୍ଲା ଚୌଦ୍ୱାର କଲେଜ ପକ୍ଷରୁ ଘର ଘର ତ୍ରିରଙ୍ଗା କାଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଚୌଦ୍ୱାର କଲେଜର ଛାତ୍ରଛାତ୍ରୀ ଦେଶାତ୍ମବୋଧକ ସଙ୍ଗୀତର ତାଳେ ତାଳେ ଏକ ଶୋଭାଯାତ୍ରାରେ ବାହାରିଥିଲେ । ଚୌଦ୍ୱାରର ଓଟିଏମ ବଜାର, କଲିଙ୍ଗ ଛକ ସହିତ ଚୌଦ୍ୱାରର ମୁଖ୍ୟ ରାସ୍ତା ଦେଇ ଜାତୀୟ ପତାକା ସହିତ ଲୋକମାନକୁ ସ୍ବାଧିନତାର ଉପଲବ୍ଧି ଓ ସଙ୍କଳ୍ପକୁ ଘରେ ଘରେ ପହଞ୍ଚାଇଥିଲେ ।
ସେହିପରି ସୁବର୍ଣ୍ଣପୁର ଜିଲ୍ଲା ସୋନପୁର କଲେଜ ପକ୍ଷରୁ ଆୟୋଜିତ ହୋଇଯାଇଛି ଏକ ବିଶାଳ ତ୍ରିରଙ୍ଗା ଶୋଭାଯାତ୍ରା । ଭାରତ ମାତାର ଜୟ ଜୟ ଗାନ କରି ସମସ୍ତେ ବିଶାଳ ତ୍ରିରଙ୍ଗା ଶୋଭାଯାତ୍ରାରେ ଯୋଗ ଦେଇଥିଲେ ।
