କାମ ଦେଲାନି ନାଟକ; ବିଜେପି ନେତା ଜଗା ପ୍ରଧାନ ଗିରଫ

ଭୁବନେଶ୍ୱର: ଗିରଫ ହେଲେ ବିଜେପି ନେତା ଜଗା ଓରଫ୍ ଜଗନ୍ନାଥ ପ୍ରଧାନ । ଅତି ନାଟକୀୟ ଢ଼ଙ୍ଗରେ ଆଜି ରାତିରେ ସେ ନିଜର ସମର୍ଥକଙ୍କ ଗହଣରେ ଡିସିପି ଅଫିସ୍ ଆସି ଆତ୍ମସମର୍ପଣ କରିଥିଲେ । ଏହାପରେ ତାଙ୍କୁ ଗିରଫ ଦର୍ଶାଯାଇଥିଲା । କ୍ୟାପିଟାଲ୍ ହସ୍ପିଟାଲରେ ସ୍ୱାସ୍ଥ୍ୟ ପରୀକ୍ଷା ପରେ ତାଙ୍କୁ କୋର୍ଟ ଚାଲାଣ କରାଯାଇଥିଲା । କୋର୍ଟ ତାଙ୍କ ଜାମିନ୍ ଆବେଦନକୁ ନାମଂଜୁର କରିବା ପରେ ୧୪ ଦିନ ପାଇଁ ଝାରପଡ଼ା ଜେଲ୍ ହାଜତକୁ ଯାଇଛନ୍ତି । ପ୍ରାଥମିକ ପ୍ରମାଣ ଆଧାରରେ ତାଙ୍କୁ ଗିରଫ କରାଯାଇଛି ବୋଲି ଡିସିପି ଜଗମୋହନ ମୀନା ସୂଚନା ଦେଇଛନ୍ତି । ବିଏମସି ଅତିରିକ୍ତ କମିସନର ରତ୍ନାକର ସାହୁଙ୍କୁ ଆକ୍ରମଣ ଘଟଣାରେ ତାଙ୍କୁ ମୁଖ୍ୟ ଅଭିଯୁକ୍ତ ବା ମାଷ୍ଟର ମାଇଣ୍ଡ କୁହାଯାଉଥିଲା । ଏହି ମାମଲାରେ ପୂର୍ବରୁ ୫ ଜଣଙ୍କୁ ପୁଲିସ ଗିରଫ କରିଥିଲା । ସେହି ସମାନ ଦଫାରେ ଜଗାଙ୍କୁ ଗିରଫ କରାଯାଇଛି ।