ରାଞ୍ଚି: ପୂର୍ବତନ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ଗିରଫ ପରେ ଏକ ବଡ଼ ରାଜନୖତିକ ସଙ୍କଟ ଉପୁଜିଛି। ଆଜି ଝାରଖଣ୍ଡରେ ଅସ୍ଥା ଭୋଟ୍ (ଟ୍ରଷ୍ଟ୍ ଭୋଟ୍) ହେବ। ନୂତନ ଭାବେ ଶପଥ ଗ୍ରହଣ କରିଥିବା ମୁଖ୍ୟମନ୍ତ୍ରୀ ଚମ୍ପାଇ ସୋରେନ ବିଧାନସଭାରେ ବିଧାୟକମାନଙ୍କଠାରୁ ଆସ୍ଥା ଭୋଟ ହାତେଇବା ପରେ ନେତୃତ୍ୱ ନେବେ।ଏହି ଅବସରରେ ବିଧାନସଭାରେ ପହଞ୍ଚିଛନ୍ତି ଗିରଫ ହୋଇଥିବା ପୂର୍ବତନ ମୁଖ୍ୟମନ୍ତ୍ରୀ ହେମନ୍ତ ସୋରେନ। ଚମ୍ପାଇ ସୋରେନ୍ ସରକାର ଏହାର ସଂଖ୍ୟାଗରିଷ୍ଠତା ପ୍ରମାଣ କରିବାକୁ ଖୁବ୍ ଶୀଘ୍ର ଫ୍ଲୋର୍ ଟେଷ୍ଟ କରିବେ।ପୁଲିସ୍ ଦ୍ୱାରା ଘେରି ରହିଥିବା ପୂର୍ବତନ ମୁଖ୍ୟମନ୍ତ୍ରୀ ହେମନ୍ତ ସୋରେନ୍ ଆଜି ସକାଳେ ବିଧାନସଭାରେ ପହଞ୍ଚିଛନ୍ତି। ଶନିବାର ଦିନ ଏକ କୋର୍ଟ ଜେଲରେ ଥିବା ଜେଏମଏମ ନେତାଙ୍କୁ ଭୋଟ୍ ଦେବାକୁ ଅନୁମତି ଦେଇଥିଲେ।
ଅର୍ଥ ହେରଫେର ମାମଲା ସହ ଜଡ଼ିତ ଅଭିଯୋଗରେ ପୂର୍ବତନ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ ଗିରଫ କରିବା ପରେ ଏପରି ଘଟିଛି। ଗିରଫ ହୋଇଥିଲେ ମଧ୍ୟ ସ୍ୱତନ୍ତ୍ର ପିଏମ୍ଏଲ୍ଏ କୋର୍ଟ ହେମନ୍ତ ସୋରେନଙ୍କୁ ବିଧାନସଭାର ସଦସ୍ୟ ଭାବରେ ତାଙ୍କର ଅଧିକାରକୁ ସ୍ୱୀକୃତି ଦେଇ ଟ୍ରଷ୍ଟ ଭୋଟରେ ଯୋଗଦେବାକୁ ଅନୁମତି ଦେଇଥିଲେ।
