ହେମନ୍ତଙ୍କୁ ଗିରଫ ପରେ କେନ୍ଦ୍ର ସରକାରଙ୍କ ଉପରେ ବର୍ଷିଲେ ମମତା

ନୂଆଦିଲ୍ଲୀ: ୬୦୦ କୋଟି ଟଙ୍କାର ଜମି ଦୁର୍ନୀତି ମାମଲାରେ ଛନ୍ଦି ହୋଇଥିବା ହେମନ୍ତ ସୋ‌ରେନ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଦ୍ବାରା ଗିରଫ ହେବା ଘଟଣାକୁ ନେଇ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ପ୍ରତିକ୍ରିୟା ରଖିଛନ୍ତି। ମମତା କେନ୍ଦ୍ର ସରକାରଙ୍କ ଉପରେ ବର୍ଷିଛନ୍ତି | ସେ କହିଛନ୍ତି ଯେ ନିର୍ବାଚନରେ ​​ଜିତିବା ପାଇଁ ବିଜେପି ସମସ୍ତଙ୍କୁ ଜେଲରେ ପୁରାଉଛି । ସେ କହିଛନ୍ତି ଯେ କେନ୍ଦ୍ରୀୟ ଏଜେନ୍ସିକୁ ବ୍ୟବହାର କରି ବିଜେପି ବିରୋଧୀ ଦଳର ନେତାମାନଙ୍କୁ ବିଭିନ୍ନ ମିଛ ମାମଲାରେ ଛନ୍ଦି ଗିରଫ କରାଯାଉଛି | ସେହିପରି ଇଣ୍ଡିଆ ମେଣ୍ଟରେ ଆସନ ବୁଝାମଣାକୁ ନେଇ ସେ କହିଛନ୍ତି ଯେ ଆସନ୍ତା ଲୋକସଭା ନିର୍ବାଚନରେ ​​କଂଗ୍ରେସ ସହ ମେଣ୍ଟ କରିବାକୁ ଆମ ଦଳ ଉତ୍ସାହିତ ଥିଲା, କିନ୍ତୁ ସେମାନେ ଆମର ପ୍ରସ୍ତାବକୁ ପ୍ରତ୍ୟାଖ୍ୟାନ କଲେ। ସେ କହିଛନ୍ତି ଯେ ଆମେ ଏକ ମେଣ୍ଟ ଚାହୁଁଥିଲୁ, କିନ୍ତୁ କଂଗ୍ରେସ ରାଜି ହେଲାନାହିଁ। ନିର୍ବାଚନରେ ​​ବିଜେପିକୁ ସାହାଯ୍ୟ କରିବା ପାଇଁ କଂଗ୍ରେସ ସିପିଆଇ (ଏମ୍) ସହିତ ହାତ ମିଳାଇଛନ୍ତି।ଉଲ୍ଲେଖ ଥାଉ କି ଇଡି ଅଧିକାରୀମାନେ ଗତକାଲି ପ୍ରାୟ ସାତ ଘଣ୍ଟା ଧରି ତାଙ୍କୁ ଜେରା କରିଥିଲେ। ତାଙ୍କୁ ଗିରଫ କରାଯିବ ବୋଲି ଇଡି ଅଧିକାରୀମାନେ ସୂଚନା ଦେବାପରେ ହେମନ୍ତ ସୋରେନ ନିଜ ବିଧାୟକମାନଙ୍କ ସହିତ ତାଙ୍କ ବାସଭବନରୁ ରାଜଭବନ ଯାଇଥିଲେ। ରାଜ୍ୟପାଳଙ୍କୁ ଭେଟି ସେ ତାଙ୍କର ଇସ୍ତଫାପତ୍ର ଦେଇଥିଲେ। ରାଜଭବନରୁ ଫେରିବା ପରେ ଇଡି ତାଙ୍କୁ ନିଜ ହେପାଜତକୁ ନେଇଥିଲା। ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବା ପରେ ହେମନ୍ତ ସୋରେନଙ୍କୁ ଗିରଫ କରାଯାଇଥିଲା। ତାଙ୍କ ସ୍ଥାନରେ ତାଙ୍କ ଦଳର ଅନୁଗତ ତଥା ରାଜ୍ୟ ପରିବହନ ମନ୍ତ୍ରୀ ଚମ୍ପାଇ ସୋରେନଙ୍କୁ ତାଙ୍କ ଉତ୍ତରାଧିକାରୀ ଭାବେ ମନୋନୀତ କରାଯାଇଥିଲା।