ନୂଆଦିଲ୍ଲୀ: ତୃଣମୂଳ କଂଗ୍ରେସରେ ବଡ ଧରଣର ବିସ୍ଫୋରଣ । ଦଳର ୬୦ ବିଦ୍ରୋହୀ ବିଧାୟକଙ୍କୁ ସ୍ୱୀକୃତି ଦେଇଛନ୍ତି ପଶ୍ଚିମବଙ୍ଗ ବିଧାନସଭାର ବାଚସ୍ପତି । ଟିଏମସିରୁ ନିଲମ୍ବିତ ବିଧାୟକ ରିତବ୍ରତ ବାନାର୍ଜୀଙ୍କୁ ବିରୋଧୀ ଦଳ ନେତା ଭାବେ ମାନ୍ୟତା ମିଳିଛି । ଆଜି ରିତବ୍ରତଙ୍କ ନେତୃତ୍ୱରେ ତୃଣମୂଳ କଂଗ୍ରେସର ୫୯ ବିଧାୟକ ବିଧାନସଭାରେ ପହଞ୍ଚି ନିଜକୁ ଅସଲି ଟିଏମସି ବୋଲି ଦାବି କରିଛନ୍ତି । ତେବେ ବିଦ୍ରୋହୀ ବିଧାୟକମାନେ ଟିଏମସି ସୁପ୍ରିମୋ ମମତା ବାନାର୍ଜୀଙ୍କୁ ନିଜ ନେତା ବୋଲି କହୁଥିବା ବେଳେ ଅଭିଷେକ ବାନାର୍ଜୀଙ୍କ ପତିଆରାକୁ ବିରୋଧ କରୁଛନ୍ତି । ସେପଟେ ସ୍ଥିତି ସମ୍ଭାଳିବା ପାଇଁ ତୃଣମୂଳ କଂଗ୍ରେସ ନିଜର ସମସ୍ତ ଛାମୁଆ ସଂଗଠନକୁ ଭଙ୍ଗ କରିଛି ।
ହାରିବା ପରେ ଘାରିଲା ଭାଙ୍ଗିବା ଭୟ । ତୃଣମୂଳ କଂଗ୍ରେସରେ କମ୍ପନ । ସୁପ୍ରିମୋ ମମତା ବାନାର୍ଜୀଙ୍କୁ ବିଦ୍ରୋହୀ ବିଧାୟକଙ୍କ ଚ୍ୟାଲେଞ୍ଜ । ମୁଖ୍ୟ ବିରୋଧୀ ଦଳ ମାନ୍ୟତା ଓ ବିରୋଧୀ ଦଳ ନେତା ପଦ ପାଇଛନ୍ତି ଟିଏମସିର ୫୯ ବିଦ୍ରୋହୀ ବିଧାୟକ । ବିଧାନସଭା ନିର୍ବାଚନରେ ପରାଜୟ ପରେ ତୃଣମୂଳ କଂଗ୍ରେସରେ ବିସ୍ଫୋରଣ ହୋଇଛି । ଦଳର ଆଭ୍ୟନ୍ତରୀଣ ବିବାଦ ଆଜି ପଶ୍ଚିମବଙ୍ଗ ବିଧାସନଭାରେ ପହଞ୍ଚିଛି । ଟିଏମସିର ୫୯ ବିଦ୍ରୋହୀ ବିଧାୟକ ବିଧାନସଭାରେ ପହଞ୍ଚି ନିଜକୁ ଅସଲି ଟିଏମସି ଏବଂ ଗୃହର ମୁଖ୍ୟ ବିରୋଧୀ ଦଳ ଭାବେ ଘୋଷଣା କରିବାକୁ ଦାବି କରିଥିଲେ।
