ଏଣିକି ବିଶ୍ୱବିଦ୍ୟାଳୟଗୁଡ଼ିକ ନିଜସ୍ୱ ପ୍ରବେଶିକା ପରୀକ୍ଷା କରିପାରିବେ। ଯଦି ଏକାଧିକ କାଉନସେଲିଂ ପରେ ଆସନ ବଳକା ରହିଯିବ, ତେବେ ବିଶ୍ୱବିଦ୍ୟାଳୟଗୁଡ଼ିକ ନିଜସ୍ୱ ପ୍ରବେଶିକା ପରୀକ୍ଷା କରିପାରିବେ। ଏନେଇ ୟୁନିଭରସିଟି ଗ୍ରାଣ୍ଟସ କମିଶନ (UGC) ଅନୁମତି ଦେଇଛନ୍ତି।
ବିଶ୍ୱବିଦ୍ୟାଳୟଗୁଡ଼ିକରେ ଆସନ ପୂରଣ କରିବା ପାଇଁ ଏହି ନିଷ୍ପତ୍ତି ନିଆଯାଇଛି। ସେପ୍ଟେମ୍ବର 20, 2023ରେ ୟୁଜିସିର 572 ବୈଠକରେ ଏହି ନିଷ୍ପତ୍ତି ନିଆ ଯାଇଥିଲା, ଯାହା ଆଗକୁ କାର୍ଯ୍ୟକାରୀ ହେବାକୁ ଯାଉଛି।
UGC ରିପୋର୍ଟ ଅନୁସାରେ, ତିନି କିମ୍ବା ଚାରି ରାଉଣ୍ଡ କାଉନସେଲିଂ ପରେ ମଧ୍ୟ କେନ୍ଦ୍ରୀୟ ବିଶ୍ୱବିଦ୍ୟାଳୟ ଏବଂ ସେମାନଙ୍କ ଅନୁବନ୍ଧିତ କଲେଜଗୁଡ଼ିକରେ ବହୁ ସଂଖ୍ୟକ ସିଟ୍ ଖାଲି ରହିଛି। ଏହା ଦ୍ୱାରା କେବଳ ସମ୍ବଳର ଅପଚୟ ହେବ ନାହିଁ, ବରଂ ଅନେକ ଛାତ୍ରଛାତ୍ରୀ ଉଚ୍ଚଶିକ୍ଷା ସୁଯୋଗରୁ ବଞ୍ଚିତ ରହିବେ।
ତେଣୁ ଛାତ୍ରଛାତ୍ରୀଙ୍କ ପାଇଁ ସୁଯୋଗ ସୃଷ୍ଟି କରିବା ପାଇଁ UGC ଯୋଜନା କରିଛି। ଏହି ସମସ୍ୟାର ସମାଧାନ ପାଇଁ, UGC ମାନକ ଅପରେଟିଂ ପ୍ରଣାଳୀ (ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର, SOPs) ର ଏକ ସେଟ୍ ଅନୁମୋଦନ କରିଛି, ଏହା ସାହାଯ୍ୟରେ କେନ୍ଦ୍ରୀୟ ବିଶ୍ୱବିଦ୍ୟାଳୟଗୁଡିକ ଖାଲି ଥିବା ସିଟକୁ ପୂରଣ କରିବା ପାଇଁ ନିଜସ୍ୱ ପରୀକ୍ଷା କରିପାରିବେ।
UGC କହିଛି ଯେ, ଏହା କେବଳ ଏକାଧିକ କାଉନସେଲିଂ ପରେ କରାଯିବ। ଯଦି ତିନିରୁ ଚାରି ଥର କାଉନସେଲିଂ ପରେ ଆସନ ବଳକା ରହିଯାଉଛି, ତେବେ ବିଶ୍ୱବିଦ୍ୟାଳୟ ନିଜସ୍ୱ ପ୍ରବେଶିକା ପରିକ୍ଷୀ କରିପାରିବ। ଏହା ଏକ ବିକଳ୍ପ, ଛାତ୍ରଛାତ୍ରୀଙ୍କ ନାମଲେଖା ପାଇଁ କମନ୍ ୟୁନିଭରସିଟି ଏଣ୍ଟ୍ରାନ୍ସ ଟେଷ୍ଟ (CUET) ପ୍ରାଥମିକ ମାନଦଣ୍ଡ ହୋଇ ରହିବ।
ସମସ୍ତ କେନ୍ଦ୍ରୀୟ ବିଶ୍ୱବିଦ୍ୟାଳୟଗୁଡ଼ିକୁ CUET ମାର୍କ ମାଧ୍ୟମରେ ଆଡମିଶନ କରିବାକୁ ନିର୍ଦ୍ଦେଶ ଦିଆଯାଇଛି। ଯଦି CUET ସ୍କୋର ବ୍ୟବହାର କରି ଏକାଧିକ ରାଉଣ୍ଡ କାଉନସେଲିଂ ପରେ ମଧ୍ୟ ସିଟ୍ ଖାଲି ରହିଥାଏ, ତେବେ ଏହି ସିଟ୍ ପୂରଣ ପାଇଁ ବିଶ୍ୱବିଦ୍ୟାଳୟଗୁଡ଼ିକୁ ଅତିରିକ୍ତ ପଦକ୍ଷେପ ନେବାକୁ ଅନୁମତି ଦିଆଯାଇଛି ବୋଲି UGC କହିଛି।
