କ୍ଷୀର ଶିଶୁ ଏବଂ ବୟସ୍କମାନଙ୍କ ପାଇଁ ପୁଷ୍ଟିକର ଭଣ୍ଡାର ଭାବରେ ବିବେଚନା କରାଯାଏ । କ୍ଷୀରରେ କ୍ୟାଲସିୟମ, ପ୍ରୋଟିନ୍ ଏବଂ ଭିଟାମିନ୍ D ଭଲ ପରିମାଣରେ ମିଳିଥାଏ । ଆପଣମାନେ ତ ଜାଣିଥିବେ ମା କ୍ଷୀର ପିଲାମାନଙ୍କର ପ୍ରଥମ ଖାଦ୍ୟ ହୋଇଥାଏ । ତେବେ ଧୀରେ ଧୀରେ ପିଲାଟି ବଡ଼ ହେବା ସହ ତାକୁ ଗାଈ କ୍ଷୀର ଦିଆଯାଏ । କାରଣ ଶିଶୁର ଉପଯୁକ୍ତ ଶାରୀରିକ ଏବଂ ମାନସିକ ବିକାଶ ପାଇଁ ପୁଷ୍ଟିକର ଖାଦ୍ୟ ଅତ୍ୟନ୍ତ ଜରୁରୀ ହୋଇଥାଏ । କ୍ଷୀର ଶିଶୁର ହାଡ, ଦାନ୍ତ ଏବଂ ମାଂସପେଶୀକୁ ସୁସ୍ଥ ରଖିବାରେ, ଉଚ୍ଚତା ବଢ଼ାଇବାରେ ସାହାଯ୍ୟ କରିଥାଏ । କିନ୍ତୁ ଅଧିକାଂଶ ଲୋକ କ୍ଷୀରରେ ଚିନି ମିଶାଇ ପିଲାକୁ ଦିଅନ୍ତି । ତେବେ ଆପଣ ଜାଣିଛନ୍ତି କି ଏହା ପିଲାଙ୍କ ପାଇଁ କେତେ କ୍ଷତି ହୋଇପାରେ । ତାହେଲେ ଆସନ୍ତୁ ଏହି ବିଷୟରେ ସମ୍ପୂର୍ଣ୍ଣ କଥା ଜାଣିବା ।
ତେବେ ସ୍ଵାସ୍ଥ୍ୟ ବିଶେଷଜ୍ଞଙ୍କ କହିବା ମୁତାବକ ବୟସ୍କମାନଙ୍କୁ ମଧ୍ୟ ଅଳ୍ପ ପରିମାଣରେ ଚିନି ଖାଇବାକୁ ପରାମର୍ଶ ଦିଆଯାଏ । କିନ୍ତୁ ଲୋକମାନେ କ୍ଷୀରରେ ଚିନି ମିଶାଇ ଏହାକୁ ନିୟମିତ ଭାବରେ ପିଲାମାନଙ୍କୁ ଦିଅନ୍ତି । ଏପରି ଭାବେ ଛୋଟ ପିଲାମାନେ ଦିନକୁ ଅନେକ ଥର କ୍ଷୀର ପିଇଥାନ୍ତି । ଯାହା ସେମାନଙ୍କ ଶରୀରକୁ କ୍ଷତି ପହଞ୍ଚାଇଥାଏ । ତେବେ ଆସନ୍ତୁ ଜାଣିବା କ୍ଷୀରରେ ଚିନି ମିଶାଇ ପିଲାଙ୍କୁ ଦେବା ଦ୍ଵାରା କଣ କ୍ଷତି ହୋଇଥାଏ ।
ସ୍ଵାସ୍ଥ୍ୟ ବିଶେଷଜ୍ଞ କହିବା ଅନୁଯାୟୀ, ଶିଶୁକୁ କ୍ଷୀର ଦିଆଯାଏ ଯାହା ଦ୍ବାରା ତାଙ୍କର ଶକ୍ତି ବଢିଥାଏ ଏବଂ ସେ ସୁସ୍ଥ ରହନ୍ତି । କାରଣ କ୍ଷୀରକୁ ପ୍ରୋଟିନ୍ ଏବଂ କ୍ୟାଲସିୟମର ଏକ ଉତ୍ତମ ଉତ୍ସ ଭାବରେ ବିବେଚନା କରାଯାଏ । କିନ୍ତୁ ଯେତେବେଳେ କ୍ଷୀରରେ ଚିନି ମିଶାଯାଏ, ଏଥିରୁ ଶରୀର ସଂପୂର୍ଣ୍ଣ ପ୍ରୋଟିନ୍ ପାଏ ନାହିଁ ଏବଂ କ୍ୟାଲସିୟମ୍ ମଧ୍ୟ ସଠିକ୍ ଭାବେ ମିଳେନାହିଁ । ଏହା ବ୍ୟତୀତ ପେଟରେ ଅନେକ ପ୍ରକାରର ସମସ୍ୟା ହୋଇପାରେ । ଯେଉଁ କାରଣରୁ ଶିଶୁର ହଜମ ପ୍ରକ୍ରିୟା ଖରାପ ହୋଇପାରେ ଏବଂ ସେ ବାରମ୍ବାର ଅସୁସ୍ଥ ହୋଇପାରେ ।
କ୍ଷୀରରେ ଚିନି ମିଶାଇବା କେବଳ ଶିଶୁର ଶାରୀରିକ ସ୍ୱାସ୍ଥ୍ୟ ଉପରେ ପ୍ରଭାବ ପକାଇବ ନାହିଁ । ବରଂ ଏହା ବ୍ୟତୀତ କ୍ଷୀରରେ ଚିନି ଦେବା ଦ୍ୱାରା ପିଲାଟି ବିରକ୍ତି ହେବା ସହ କିଛି ସମୟ ପରେ ପିଲାଟି କାନ୍ଦିବା ଭଳି ସମସ୍ୟା ବଢିଯାଇପାରେ ।
ପିଲାମାନଙ୍କର ପେଟରେ କୃମି ହେଉଥିବା ଅଭିଯୋଗ ପ୍ରାୟତ ଶୁଣିଥିବେ । ବାସ୍ତବରେ, ଏହା ପଛର କାରଣ ମଇଳା ହାତ, ପ୍ରଦୂଷିତ ପାଣି, ଚିନି ଇତ୍ୟାଦି ଜିନିଷ ହୋଇପାରେ । ପିଲାଙ୍କୁ ପ୍ରତିଦିନ ଚିନି ଦେବା ଦ୍ଵାରା କୃମି ବଢିବାକୁ ଲାଗେ ଏବଂ ଏହି କାରଣରୁ ମଳଦ୍ୱାରରେ ଘା ’ମଧ୍ୟ ଦେଖାଯାଏ । ଯାହା ଫଳରେ ପିଲାଟି ବହୁତ ବିବ୍ରତ ହୁଏ । ଡାକ୍ତର କହିବା ଅନୁଯାୟୀ, କୃତ୍ରିମ ଜିନିଷ ଯେପରିକି ବାହାରର କ୍ଷୀର ଏବଂ ଚିନି ଇତ୍ୟାଦି ଶିଶୁକୁ ଦିଆଯିବା ଉଚିତ୍ ନୁହେଁ । ଏଥିସହ ଅତି କମରେ ଦୁଇ ବର୍ଷ ପର୍ଯ୍ୟନ୍ତ ଶିଶୁକୁ ଚିନି ଖାଇବାକୁ ଦିଆଯିବା ମଧ୍ଯ ଉଚିତ୍ ନୁହେଁ ।
ସୁସ୍ଥ ପୁଷ୍ଟିକର ଖାଦ୍ୟ ଯୋଗାଇବା ପାଇଁ, ରନ୍ଧା ହୋଇଥିବା ପ୍ରାକୃତିକ ଜିନିଷ ଯଥା ଫଳ, ପନିପରିବା, ଶସ୍ୟ ଇତ୍ୟାଦି ଶିଶୁକୁ ଦେବା ଲାଭଦାୟକ । ଉଦାହରଣ ସ୍ୱରୂପ, ଗହମକୁ ଭିଜାଇ ଏହାର ଗଜା ପ୍ରସ୍ତୁତ କରନ୍ତୁ, ଏହାକୁ ଶୁଖାନ୍ତୁ, ଏହାକୁ ହାଲୁକା ଭାଜନ୍ତୁ ଏବଂ ଗ୍ରାଇଣ୍ଡ୍ କରନ୍ତୁ । ଯେତେବେଳେ ଆପଣ ପିଲାଙ୍କ ପାଇଁ ଡାଲି, ସୁଜି ଇତ୍ୟାଦିରେ କିଛି ପ୍ରସ୍ତୁତ କରୁଛନ୍ତି । ସେଥିରେ ଏହି ପାଉଡରକୁ ମିଶାଇ ପିଲାକୁ ଦିଅନ୍ତୁ । ଏହା ପିଲାଙ୍କୁ ଅଧିକ ପୁଷ୍ଟିକର ଖାଦ୍ୟ ଯୋଗାଇଥାଏ । ଏଥିପାଇଁ ଛୋଟ ପିଲାଙ୍କୁ ଚିନି ଦେବା ଉଚିତ୍ ନୁହେଁ ।
