ଗ୍ରାପ୍‌-୩ କଟକଣା ସତ୍ତ୍ବେ ଦିଲ୍ଲୀ ସ୍ଥିତି ସାଂଘାତିକ

ଦୀପାବଳି ପରଠାରୁ ଦିଲ୍ଲୀ ବାୟୁମଣ୍ଡଳ କ୍ରମଶଃ ପ୍ରଦୂଷିତ ହୋଇଆସୁଛି। ଏହି ପରିପ୍ରେକ୍ଷୀରେ ଗତ ସପ୍ତାହରୁ ସିଏମକ୍ୟୁଏମ (କମିସନ ଫର୍‌ ଏୟାର କ୍ବାଲିଟୀ ମ୍ୟାନେଜମେଣ୍ଟ) ପକ୍ଷରୁ ସହରରେ ଗ୍ରାପ୍‌-୩ (ଗ୍ରେଡେଡ୍‌ ରେସ୍‌ପନ୍ସ ଆକ୍ସନ ପ୍ଲାନ) କଟକଣା ଲାଗୁ କରାଯାଇଛି। ଗ୍ରାପ୍‌-୩ କଟକଣା ଅନୁଯାୟୀ ସହରରେ ନିର୍ମାଣ କାର୍ଯ୍ୟ ବନ୍ଦ କରାଯାଇଥିବାବେଳେ ବିଏସ୍‌-୬ ପେଟ୍ରୋଲ କିମ୍ବା ଡିଜେଲ ବ୍ୟବହାର କରୁନଥିବା ଯାନର ପ୍ରବେଶକୁ ବାତିଲ କରାଯାଇଛି। ୫ମ ଶ୍ରେଣୀ ପର୍ଯ୍ୟନ୍ତ ଛାତ୍ରଛାତ୍ରୀଙ୍କୁ ହାଇବ୍ରିଡ ମୋଡ୍‌ରେ ଶିକ୍ଷାଦାନର ବ୍ୟବସ୍ଥା କରାଯାଇଛି। ବ୍ୟସ୍ତବହୁଳ ସଡକଗୁଡିକରେ ଜଳ ସିଞ୍ଚନ କରାଯାଉଛି। ଡିଏସ୍‌ଏସ୍‌ (ଡିସିସନ୍‌ ସପୋର୍ଟ ସିଷ୍ଟମ) ରିପୋାର୍ଟ ଅନୁଯାୟୀ ଦିଲ୍ଲୀ ପ୍ରଦୂଷଣ ପାଇଁ ନଡାପୋଡି ୮.୫ ପ୍ରତିଶତ ଏବଂ ଯାନବାହନ ଚଳାଚଳ ୧୯.୮ ପ୍ରତିଶତ ଦାୟୀ ରହିଛି। ଇତିମଧ୍ୟରେ ନଡାପୋଡି ଘଟଣା ସମ୍ପର୍କରେ ସ୍ଥିତାବସ୍ଥା ରିପୋର୍ଟ ଦାଖଲ କରିବାକୁ ସୁପ୍ରିମକୋର୍ଟଙ୍କ ପକ୍ଷରୁ ପଞ୍ଜାବ ଓ ହରିୟାଣା ସରକାରଙ୍କୁ ନିର୍ଦେଶ ଦିଆଯାଇଛି।