ୱାସିଂଟନ : ଆମେରିକାର ମାସାଚୁସେଟ୍ସ ରାଜ୍ୟର ରାଜ୍ୟପାଳ ମୌରା ହେଲି ଅଗଷ୍ଟ ୧୫କୁ ଭାରତ ଦିବସ ଭାବରେ ଘୋଷଣା କରିଛନ୍ତି। ରାଜ୍ୟର ବିକାଶରେ ପ୍ରବାସୀ ଭାରତୀୟଙ୍କ ଅବଦାନକୁ ସ୍ୱୀକୃତି ଦେଇ ସେ ବାସିନ୍ଦାମାନଙ୍କୁ ଏହି ଦିବସ ପାଳନ ପାଇଁ ଉତ୍ସାହର ସହିତ ଅଂଶଗ୍ରହଣ କରିବାକୁ ଅନୁରୋଧ କରିଛନ୍ତି। ଅଗଷ୍ଟ ୧ ତାରିଖରେ ଜାରି ହୋଇଥିବା ଏକ ଘୋଷଣାପତ୍ରରେ, ରାଜ୍ୟପାଳ ବାର୍ଷିକ ସ୍ୱାଧୀନତା ଦିବସ ପାଳନ ଏବଂ ସମାଜ ସେବା ପ୍ରୟାସ ମାଧ୍ୟମରେ ନାଗରିକ ସମ୍ପର୍କ, ସାଂସ୍କୃତିକ ଆଦାନପ୍ରଦାନ ଏବଂ ପାରସ୍ପରିକ ବୁଝାମଣାକୁ ପ୍ରୋତ୍ସାହିତ କରିବାରେ ପ୍ରବାସୀ ଭାରତୀୟଙ୍କ ଗୁରୁତ୍ୱପୂର୍ଣ୍ଣ ଭୂମିକାକୁ ମଧ୍ୟ ସ୍ୱୀକୃତି ଦେଇଛନ୍ତି। ମାସାଚୁସେଟ୍ସ ରାଜ୍ୟପାଳଙ୍କ ଦ୍ୱାରା ଜାରି କରାଯାଇଥିବା ଘୋଷଣାପତ୍ରରେ କୁହାଯାଇଛି ଯେ, ବ୍ରିଟିଶ ଉପନିବେଶବାଦୀ ଶାସନରୁ ୧୯୪୭ ମସିହାରେ ସ୍ବାଧୀନ ହୋଇଥିବା ଭାରତ ୧୫ ଅଗଷ୍ଟ ୨୦୨୬ରେ ସ୍ୱାଧୀନତାର ୭୯ତମ ବାର୍ଷିକୀ ପାଳନ କରିବ। ଏହା ଏକ ଐତିହାସିକ ମୁହୂର୍ତ୍ତ ଯେଉଁ ସମୟରେ ବିଶ୍ୱର ସର୍ବବୃହତ ଗଣତନ୍ତ୍ରର ମୂଳଦୁଆ ସ୍ଥାପନ ହୋଇଥିଲା।
ଏଥିରେ ଉଲ୍ଲେଖ କରାଯାଇଛି ଯେ, ଭାରତରେ ବିଶ୍ୱର ସର୍ବାଧିକ ପ୍ରବାସୀ ଅଛନ୍ତି, ଅନ୍ୟ ଦେଶରେ ୩ କୋଟି ୬୦ ଲକ୍ଷରୁ ଅଧିକ ଭାରତୀୟ ବଂଶୋଦ୍ଭବ ବାସ କରନ୍ତି। ଏଥିରେ କୁହାଯାଇଛି ଯେ, ୫୦ ଲକ୍ଷରୁ ଅଧିକ ଭାରତୀୟ ଆମେରିକାରେ ବାସ କରନ୍ତି। ସେମାନେ ଦେଶ ଏବଂ ସମ୍ପ୍ରଦାୟର ସାମାଜିକ, ଅର୍ଥନୈତିକ ଏବଂ ନାଗରିକ ସ୍ୱାସ୍ଥ୍ୟରେ ବହୁଳ ଅବଦାନ ରଖିଥାନ୍ତି।
ଘୋଷଣାପତ୍ରରେ କୁହାଯାଇଛି,ଭାରତ ଏକ ପ୍ରାଚୀନ ଏବଂ ବହୁମୁଖୀ ସଭ୍ୟତା, ଯାହା ବିଭିନ୍ନ ଜାତିଗତ ଗୋଷ୍ଠୀ, ଧର୍ମ, ଭାଷା, ରୀତି, ପରମ୍ପରା , ପୋଷାକ, ଖାଦ୍ୟ ଅଭ୍ୟାସ, ଜଳବାୟୁ ଏବଂ ପ୍ରାକୃତିକ ସମ୍ପଦର ଆଶ୍ଚର୍ଯ୍ୟଜନକ ବିବିଧତା ସତ୍ତ୍ୱେ ନିଜର ମୌଳିକ ଏକତା ବଜାୟ ରଖିଛି। ଏଥିରେ ଉଲ୍ଲେଖ କରାଯାଇଛି ଯେ ମାସାଚୁସେଟ୍ସରେ ଭାରତୀୟ-ଆମେରିକୀୟ ଜନସଂଖ୍ୟା ଔଷଧ, ବିଜ୍ଞାନ, ପ୍ରଯୁକ୍ତିବିଦ୍ୟା, ଶିକ୍ଷା, ବ୍ୟବସାୟ ଏବଂ ସାର୍ବଜନୀନ ସେବା ଭଳି କ୍ଷେତ୍ରରେ ଗୁରୁତ୍ୱପୂର୍ଣ୍ଣ ଅବଦାନ ଦେଇଛନ୍ତି। ଏହା ଦ୍ବାରା ରାଜ୍ୟର ସାଂସ୍କୃତିକ ଏବଂ ଅର୍ଥନୈତିକ ସଂରଚନା ସମୃଦ୍ଧ ହୋଇଛି। ଏହା ମଧ୍ୟ ଉଲ୍ଲେଖ କରାଯାଇଛି ଯେ,ମାସାଚୁସେଟ୍ସ ଭାରତୀୟ-ଆମେରିକୀୟ ସମ୍ପ୍ରଦାୟର ଏହି ଗୁରୁତ୍ୱପୂର୍ଣ୍ଣ ଅବସରକୁ ଭାରତର ସମୃଦ୍ଧ ସାଂସ୍କୃତିକ ଐତିହ୍ୟ,ଗଣତାନ୍ତ୍ରିକ ମୂଲ୍ୟବୋଧ ଏବଂ ଶାନ୍ତି ତଥା ପ୍ରଗତି ପ୍ରତି ସ୍ଥାୟୀ ପ୍ରତିବଦ୍ଧତାକୁ ସମ୍ମାନ ଜଣାଉଛି।
ବୋଷ୍ଟନର ମେୟର ମିଶେଲ ଉ ମଧ୍ୟ ଏଭଳି ଘୋଷଣା ଜାରି କରି ଅଗଷ୍ଟ ୧୫ କୁ ଭାରତ ଦିବସ ଭାବରେ ଘୋଷଣା କରିଥିଲେ। ସେ ବୋଷ୍ଟନରେ ନୂତନ ଭାରତୀୟ କନସୁଲେଟ୍ ଖୋଲିବାକୁ ସ୍ୱାଗତ କରିଥିଲେ ଏବଂ ସେଲ୍ ବୋଷ୍ଟନ-୨୫୦ କାର୍ଯ୍ୟକ୍ରମରେ ଆଇଏନଏସ ସୁଦର୍ଶିନୀର ଆଗମନକୁ ପ୍ରଶଂସା କରିଥିଲେ।
