କୌଣସି ବି କାରଣରୁ ତ୍ଵଚାରେ ଜଳାପୋଡା ହେଉଥିଲେ କିମ୍ବା ଲମ୍ବା ସମୟ ଧରି ମୁହଁରେ ବ୍ରଣ ଜନିତ ସମସ୍ୟାର ସମ୍ମୁଖୀନ ହେଉଥିଲେ ସବୁଠାରୁ ଉତ୍ତମ ସମାଧାନ ଭାବରେ ଆଲୋଭେରା ବା ଘିକୁଆଁରୀ ବ୍ୟବହାର କରିବାକୁ ପ୍ରାୟ ସମସ୍ତେ କହିଥାନ୍ତି । ଏହି ଆଲୋଭେରା କେବଳ ଚେହେରା ର ଉନ୍ନତି ପାଇଁ ନୁହେଁ ବରଂ ଶରୀରର ବିଭିନ୍ନ ପ୍ରକାର ସମସ୍ୟା ର ସମାଧାନ ପାଇଁ ମଧ୍ୟ କାମରେ ଲାଗିଥାଏ । ପାଚନ ଜନିତ ସମସ୍ୟା , କେଶ ଉପୁଡିବା, ପେଟ ଜନିତ ବିଭିନ୍ନ ସମସ୍ୟା ଏହିପରି ସ୍ୱାସ୍ଥ୍ୟ ଓ ସୌନ୍ଦର୍ୟ ଜନିତ ଅନେକ ପ୍ରକାର ସୋଗର ଏକମାତ୍ର ଚିକିତ୍ସା ରୂପେ ଆଲୋଭେରା ଆୟୁର୍ବେଦ ତଥା ଔଷଧ ଜଗତରେ ବେଶ ଜଣାଶୁଣା । ଏହାର ବହୁମୂଖୀ ଗୁଣ ନିମନ୍ତେ ଆୟୁର୍ବେଦ ଏହାକୁ ଏକ ଚମତ୍କାରୀ ଉଦ୍ଭିଦ ଭାବରେ ସମ୍ମାନ ଦେଇଥାଏ । ଆମେ ଆଜି ଆଲୋଭେରାର ଏହିସବୁ ଚମତ୍କାରୀ ଗୁଣ ଗୁଡିକ ବିଷୟରେ ଆଲୋଚନା କରିବା ।
- ଆଲୋଭେରା ଏକ ଶକ୍ତିଶାଳୀ ଆଣ୍ଟି-ଅକ୍ସିଡାଣ୍ଟ ଅଟେ : ଆଲୋଭେରାରେ ପଲିଫେନଲ(Polyphenol) ଭଳି ଏକ ଶକ୍ତିଶାଳୀ ଆଣ୍ଟି-ଅକ୍ସିଡାଣ୍ଟ ପ୍ରଚୁର ମାତ୍ରାରେ ରହିଛି । ଉତ୍ତମ ସ୍ୱାସ୍ଥ୍ୟ ବଜାୟ ରଖିବା ପାଇଁ ଏହା ଅତ୍ୟନ୍ତ ଜରୁରୀ । ଏହି ଆଣ୍ଟି-ଅକ୍ସିଡାଣ୍ଟଗୁଡିକ ଫ୍ରି ରେଡିକାଲର ମୁକାବିଲା କରିଥାଏ, ଅକ୍ସିଡେଟିଭ୍ ଷ୍ଟ୍ରେସ୍ ହ୍ରାସ କରିଥାଏ ଏବଂ ଆଣ୍ଟିବ୍ୟାକ୍ଟେରିଆଲ ଗୁଣ ରଖିଥାଏ ଯାହା ଗମ୍ଭୀର ସଂକ୍ରମଣକୁ ରୋକିପାରେ । ଆଲୋଭେରାର ଆଣ୍ଟିବାୟୋଟିକ ଏବଂ ଆଣ୍ଟିସେପ୍ଟିକ୍ ଗୁଣ ସାଧାରଣ ସୁସ୍ଥତା ପାଇଁ ଗୁରୁତ୍ୱପୂର୍ଣ୍ଣ ଯୋଗଦାନ ଦେଇଥାଏ ।
- ପାଚନ କ୍ରିୟାରେ ସହାୟକ ହୋଇଥାଏ : ଏହାର ପ୍ରାକୃତିକ ଲେକ୍ସେଟିଭ୍ ଗୁଣ ଆଲୋଭେରାକୁ କୋଷ୍ଠକାଠିନ୍ୟ ଏବଂ ଅନିୟମିତ ଅନ୍ତନଳୀ ଗତିବିଧି ପାଇଁ ଏକ ଉତ୍ତମ ଉପଚାର ଭାବେ ପ୍ରସ୍ତୁତ କରିଥାଏ । ଆଲୋଭେରା ରସକୁ ପାଣି ସହିତ ମିଶେଇ ଖାଲି ପେଟରେ ପିଇବା ଦ୍ୱାରା ପାଚନ କ୍ରିୟାରେ ଅନେକ ଫାଇଦା ମିଳିଥାଏ ।
- ଦାନ୍ତ ଏବଂ ମୁଖର ସ୍ୱାସ୍ଥ୍ୟ ପାଇଁ ଲାଭଦାୟକ : ସାଧାରଣତଃ ଦାନ୍ତ ଏବଂ ପାଟିର ଯତ୍ନ ନେବା ପାଇଁ ପାରମ୍ପରିକ ଭାବରେ ଅନେକ ଔଷଧ ଉପରେ ଆମେ ସମସ୍ତେ ନିର୍ଭର କରିଥାନ୍ତି । ମାତ୍ର ଆଲୋଭେରା ରେ ଥିବା ଆଣ୍ଟି ବାକ୍ଟେରିଆଲ ଗୁଣ ଗୁଡିକ ପାଇଁ ଏହା ପ୍ରଭାବଶାଳୀ ଭାବରେ ବ୍ୟାକ୍ଟେରିଆକୁ ଦୂର କରିଥାଏ ଏବଂ ସେମାନଙ୍କର ବୃଦ୍ଧିକୁ ପ୍ରତିରୋଧ କରି ଦାନ୍ତକ୍ଷୟ ଏବଂ ଦୁର୍ବଳ ମାଢ଼ି ଜନିତ ସମସ୍ୟାକୁ ମଧ୍ୟ ରୋକିବାରେ ସାହାଯ୍ୟ କରିଥାଏ ।
- କୁଲିଂ ଏଜେଣ୍ଟ ଭାବରେ କାମ କରେ : ଆଲୋଭେରା ରେ ଥିବା ଶୀତଳତା କାରଣରୁ ଏହା ପୋଡାଜଳା ତଥା ଗରମ ଜନିତ ଦାଗ ଦୂର କରିବା ନିମନ୍ତେ ଏକ ଲୋକପ୍ରିୟ ଉପଚାର ଭାବରେ ପରିଚିତ । ଆଲୋଭେରା ଜେଲ ବ୍ୟବହାର କରିବା ଦ୍ଵାରା ତ୍ଵଚାରେ ଥିବା ଦାଗ ଦୂର ହେବା ସହ ଏହା ତ୍ଵଚା କୁ ହାଇଡ୍ରେଟ ମଧ୍ୟ ରଖିଥାଏ ।
- ତ୍ଵଚା ପାଇଁ ଏକ ବରଦାନ : ଏହାର ଆଣ୍ଟିମାଇକ୍ରୋବିୟଲ ଏବଂ ଆଣ୍ଟିବ୍ୟାକ୍ଟେରିଆଲ ଗୁଣ ସହିତ, ଆଲୋଭେରା ଜେଲ୍ ସୁସ୍ଥ ଏବଂ ମଶ୍ଚରାଇଜଡ୍ ତ୍ଵଚାକୁ ପ୍ରୋତ୍ସାହିତ କରିଥାଏ । ବିଶେଷ କରି ତୈଳାକ୍ତ ତ୍ଵଚା ଥିବା ଲୋକଙ୍କ ପାଇଁ ଏହା ଏକ ଉତ୍ତମ ମଶ୍ଚରାଇଜର ଭାବେ କାମ କରେ । ଏହାସହ ଟାନ ତଥା ସନବର୍ଣ୍ଣ ଭଲ କରିବାରେ ଆଲୋଭେରା ଅତ୍ୟନ୍ତ ପ୍ରଭାବଶାଳୀ ଅଟେ ।
ଆଲୋଭେରା ପ୍ରଦାନ କରୁଥିବା ଏହି ସବୁ ଲାଭ ଗୁଡିକରୁ ସ୍ପଷ୍ଟ ଯେ ଏହା ଏକ ଶକ୍ତିଶାଳୀ ଆୟୁର୍ବେଦିକ ଉପାଦାନ । ମାତ୍ର ଅସଲି ଆଲୋଭେରା ଜେଲ ଥିବାର ଦାବି କରି ଅନେକ ପ୍ରଡକ୍ଟ ବର୍ତ୍ତମାନ ବଜାରରେ ଉପଲବ୍ଧ ଅଛି ଯାହାର ପ୍ରକୃତ ସତ୍ୟତା ଆମକୁ ଅଜଣା ଥାଏ । ତେଣୁ ଏହି ଗଛକୁ ସହଜରେ ଘରେ ଲଗାଇ ଆମେ ଏହାର ଫାଇଦା ସିଧା ସଳଖ ଉଠାଇ ପାରିବା ।
