ହାସନ: ଗତ କିଛି ବର୍ଷ ହେବ ହୃଦଘାତଜନିତ ମୃତ୍ୟୁ ସଂଖ୍ୟା ବଢ଼ିବାରେ ଲାଗିଛି। ଏହା ଏବେ ଏକ ବଡ଼ ଚିନ୍ତାର କାରଣ ପାଲଟିଛି। ଫିଟ୍ ରହୁଥିବା ଲୋକେ ଓ ଯୁବା ଥିବା ଲୋକେ ଅଧିକ ହୃଦଘାତର ଶିକାର ହେଉଛନ୍ତି। ଭାରତରେ ଥିବା ଏକ ରାଜ୍ୟରେ ୪୦ଦିନ ଭିତରେ ୨୨ଜଣଙ୍କର ମୃତ୍ୟୁ ହୋଇଥିବା ସାମ୍ନାକୁ ଆସିଛି। କର୍ଣ୍ଣାଟକର ହାସନ ଜିଲ୍ଲାରେ ହୃଦଘାତ ଯୋଗୁଁ ମୃତ୍ୟୁ ସଂଖ୍ୟା ବଢ଼ୁଥିବା ଏବେ ଚିନ୍ତାର କାରଣ ହୋଇଛି। କେବଳ ଜୁନ୍ ୩୦ତାରିଖରେ ହୃଦଘାତ ଯୋଗୁଁ ୪ଜଣଙ୍କର ମୃତ୍ୟୁ ହୋଇଥିଲା ବୋଲି ସୂଚନା ମିଳିଛି। ୪୦ଦିନରେ ମୃତ୍ୟୁବରଣ କରିଥିବା ୨୨ଜଣଙ୍କ ମଧ୍ୟରୁ ଅଧିକାଂଶ ଯୁବା ଏବଂ ମଧ୍ୟବୟସ୍କ। ଯଦି ଆମେ କର୍ଣ୍ଣାଟକର ହାସନ ଜିଲ୍ଲାରେ ପ୍ରାଣ ହରାଇଥିବା ୨୨ଜଣଙ୍କ ଉପରେ ନଜର ପକାଇବା, ତେବେ ୫ଜଣଙ୍କ ବୟସ ୧୯ରୁ ୨୫ବର୍ଷ ମଧ୍ୟରେ ଥିଲା, ୮ଜଣଙ୍କ ବୟସ ୨୫ରୁ ୩୫ବର୍ଷ ମଧ୍ୟରେ ଥିଲା। ଏମାନଙ୍କ ମଧ୍ୟରୁ କେବଳ କିଛି ଲୋକଙ୍କ ବୟସ ୬୦ବର୍ଷରୁ ଅଧିକ ଥିଲା ବୋଲି ଜଣାପଡ଼ିଛି। ଏଭଳି ଯୁବପିଢ଼ି ହୃଦଘାତର ଶିକାର ହେବାଟା ଉଭୟ ଡାକ୍ତର ଏବଂ ସାଧାରଣ ଜନତାଙ୍କୁ ଚିନ୍ତିତ କରିଛି।
କର୍ଣ୍ଣାଟକରେ ଏଭଳି ହୃଦଘାତଜନିତ ହଠାତ୍ ବଢ଼ିବା ସରକାରଙ୍କ ପାଇଁ ଚିନ୍ତାର କାରଣ ପାଲଟିଛି। ଏନେଇ କର୍ଣ୍ଣାଟକ ସ୍ୱାସ୍ଥ୍ୟ ବିଭାଗ କୋଭିଡ୍ ବା କରୋନା ଟିକା ସମ୍ବନ୍ଧୀୟ ସମସ୍ୟାର ସମ୍ଭାବ୍ୟ ସଂଯୋଗ ତଦନ୍ତ କରିବା ପାଇଁ ଏକ ବିଶେଷଜ୍ଞ କମିଟି ଗଠନ କରିଛି। ଜୟଦେବ ପ୍ରତିଷ୍ଠାନର ନିର୍ଦ୍ଦେଶକଙ୍କ ନେତୃତ୍ୱରେ ଏହି କମିଟିରେ ଏନଆଇଏମଏଚଏଏନଏସ୍, ରାଜୀବ ଗାନ୍ଧୀ ଇନଷ୍ଟିଚ୍ୟୁଟ୍ ଅଫ୍ ଚେଷ୍ଟ ଡିଜିଜ୍, ସେଣ୍ଟ ଜନସ୍, ବିଏମସିଆରଆଇ, ମଣିପାଲ ହସ୍ପିଟାଲ୍ସ ଏବଂ ଆଇସିଏମଆର୍-ଏନସିଡିଆଇଏଫର ବିଶେଷଜ୍ଞମାନେ ସାମିଲ ଅଛନ୍ତି। ଏହି କମିଟି ହଠାତ୍ ହୃଦଘାତ, ଷ୍ଟ୍ରୋକ୍ ଏବଂ ସ୍ନାୟୁତନ୍ତ୍ର ସମସ୍ୟା ସମ୍ବନ୍ଧୀୟ ମୃତ୍ୟୁଗୁଡ଼ିକର ଅଧ୍ୟୟନ କରିବ ଏବଂ ଏପରି ମୃତ୍ୟୁକୁ ରୋକିବା ପାଇଁ ସୁପାରିଶ ଉପସ୍ଥାପନ କରିବ।
