ଓଡ଼ିଶା ପାଇଁ ଗର୍ବ ଏବଂ ଗୌରବ ହେଉଛନ୍ତି ଓଡ଼ିଆ ଖେଳାଳୀ । ଦେଶ ବାହାରେ ଦେଖାଇଛନ୍ତି କମାଲ । ଆଉ ଆଜି ସାଉଣ୍ଟୁଛନ୍ତି ପ୍ରଶଂସା । କରାଟେରେ ନିଜ ପ୍ରତିଭା ଦେଖାଇ ଆଣିଛନ୍ତି ସ୍ବର୍ଣ୍ଣ ପଦକ । ଏମାନଙ୍କ ସଫଳତାରେ ବାପା ମା’ଙ୍କ ଠାରୁ ଆରମ୍ଭ କରି ସମସ୍ତେ ହୋଇଛନ୍ତି ଗର୍ବିତ ।
ତେବେ ଦକ୍ଷିଣ ଆଫ୍ରିକାରେ କରାଟେରେ ଓଡ଼ିଶା ଖେଳାଳିଙ୍କୁ ମିଳିଛି ଐତିହାସିକ ସଫଳତା । ୧୬ଟି ପଦକ ଜିତି ଦେଶ ତଥା ରାଜ୍ୟ ପାଇଁ ସୁନାମ ଆଣିଛନ୍ତି ଏହି ଖେଳାଳୀ । ଓଡ଼ିଆ ଖେଳାଳୀଙ୍କ ପ୍ରତିଭା ଆଜି କେବଳ ରାଜ୍ୟ ନୁହେଁ ଦେଶ ବିଦେଶରେ ମଧ୍ୟ ପ୍ରଚାରିତ ହେଉଛି । ୬ ଟି ସ୍ବର୍ଣ୍ଣ, ୫ଟି ରୌପ୍ୟ ଓ ୫ଟି ବ୍ରୋଞ୍ଜ ପଦକ ଜିତି ଓଡିଶା ଫେରିଛନ୍ତି ଏହି ସମସ୍ତ ଖେଳାଳୀ । ଓଡିଶା ପହଞ୍ଚିବା ପରେ ଭୁବନେଶ୍ୱର ବିଜୁ ପଟ୍ଟନାୟକ ବିମାନ ବନ୍ଦରରେ ଓଡିଶା କରାଟେ ଏକାଡେମୀ ଓ ଶୁଭେଛୁମାନେ ଖେଳାଳୀଙ୍କର ଭବ୍ୟ ସ୍ୱାଗତ କରିଥିଲେ । ବାଜା ବଜାଇ ସ୍ୱାଗତ କରିବା ସହ ମିଷ୍ଠାନ ବଣ୍ଟନ କରିଥିଲେ ସମସ୍ତେ । ଦକ୍ଷିଣ ଆଫ୍ରିକାର ଡର୍ବାନରେ ଆଯୋଜିତ ଏକାଦଶ ରାଜ୍ୟ ଗୋଷ୍ଠୀ କରାଟେ ପ୍ରତିଯୋଗିତାରେ ଭାରତୀୟ ଟିମରୁ ପ୍ରତିନିଧିତ୍ୱ କରି ଓଡ଼ିଶା ଖେଳାଳିମାନେ ଇତିହାସ ରଚିଛନ୍ତି । ସୁରୋମିତା ସିଂହା ବ୍ୟକ୍ତିଗତ ଓ ଦଳଗତ ଭାବେ ସ୍ବର୍ଣ୍ଣ ପଦକ ଜିତି ଉଲ୍ଲେଖନୀୟ ଅବଦାନ ରଖିଛନ୍ତି । ରାଜ୍ୟ ଓ ଜାତୀୟ କରାଟେ ପ୍ରତିଯୋଗିତାର ପ୍ରଦର୍ଶନ ଆଧାରରେ ଏହି ପ୍ରତିଯୋଗିତାରେ ୨୩ଟି ଦେଶ ଅଂଶଗ୍ରହଣ କରିଥିଲେ ।
ସେଥି ମଧ୍ୟରୁ ଭାରତରୁ ୧୦୫ ଜଣ ଖେଳାଳି ରହିଥିଲେ । ଏଥିରେ ୨୯ଜଣ ଓଡ଼ିଆ ଖେଳାଳି ଅଂଶଗ୍ରହଣ କରିଥିଲେ । ଶୁଭକାନ୍ତ ବିଶ୍ବାଳ ୧୨ ବର୍ଷରୁ କମ୍ ବିଭାଗରେ ସ୍ବର୍ଣ୍ଣ ଜିତିଛନ୍ତି । ଭାଲିନା ଭାଲେଣ୍ଟନା ଓ ସୁରୋମିତା ସିହ୍ନା ବରିଷ୍ଠ ମହିଳା କାଟାରେ ଦଳଗତ ଭାବେ ସ୍ବର୍ଣ୍ଣ, ସୁରୋମିତା ସିହ୍ନା ୨୧ବର୍ଷରୁ କମ୍ ମହିଳା ବ୍ୟକ୍ତିଗତ କାଟାରେ ସ୍ବର୍ଣ୍ଣ ଜିତିଛନ୍ତି । ଆଲିସା ସୁବୁଦ୍ଧି କ୍ୟାଡେଟ୍ ବ୍ୟକ୍ତିଗତ ବାଳିକା କାଟାରେ ସ୍ବର୍ଣ୍ଣ ଜିତିଛିନ୍ତି । ସେହିପରି ପୁଲକ ପାଢ଼ୀ ଓ ସୂର୍ଯ୍ୟପ୍ରକାଶ ଘଡ଼େଇ, ଆର୍ଯ୍ୟବ୍ରତ ବିଶ୍ବାଳ କନିଷ୍ଠ ପୁରୁଷ ଦଳଗତ କାଟାରେ ରୌପ୍ୟ ପଦକ ଜିତି ଓଡିଶା ପାଇଁ ସୁନାମ ଆଣିଛନ୍ତି । ଅନ୍ୟ ଖେଳାଳୀମାନେ ବିଭିନ୍ନ ବର୍ଗରେ ବ୍ରୋଞ୍ଜ ପଦକ ହାତେଇବାରେ ସକ୍ଷମ ହୋଇଛନ୍ତି ।
ସମସ୍ତ ବିଜୟୀ ପ୍ରତିଯୋଗୀଙ୍କୁ ଓଡ଼ିଶା ରାଜ୍ୟ କରାଟେ ସଂଘ ତରଫରୁ ଅଭିନନ୍ଦନ ଶୁଭକାମନା ଦିଆଯାଇଛି । ଏହି କୁନି କୁନି ପିଲା ବିଦେଶରେ ଯାଇ ଯେଉଁ ସଫଳତା ପାଇଛନ୍ତି ତାହା ଅନ୍ୟ ଖେଳାଳୀଙ୍କୁ ପ୍ରେରଣା ଯୋଗାଇବ ନିଶ୍ଚିତ ।
