କିସ୍ ଶ୍ରୀବାଣୀ କ୍ଷେତ୍ରରେ ଶ୍ରୀଜଗନ୍ନାଥଙ୍କର ଚାପ ନୀତି ଶେଷ

ଭୁବନେଶ୍ୱର : କିସ୍ ଶ୍ରୀବାଣୀ କ୍ଷେତ୍ରରେ ଶ୍ରୀଜଗନ୍ନାଥଙ୍କର ଚାପ ନୀତି ଶେଷ । ଅକ୍ଷୟ ତୃତୀୟା ଠାରୁ ଆରମ୍ଭ ହୋଇଥିବା ଏହି ଚାପ ନୀତି ୨୧ ଦିନ ଧରି ଚାଲିଥିଲା । ସୁସଜ୍ଜିତ ବିମାନରେ ମଦନମୋହନ, ରାମକୃଷ୍ଣ, ଶ୍ରୀଦେବୀ ଓ ଭୂଦେବୀଙ୍କୁ ଚନ୍ଦନ ପୁଷ୍କରିଣୀକୁ ନିଆଯାଇ ସୁସଜ୍ଜିତ ନୌକାରେ ବିରାଜମାନ କରାଯାଇଥିଲା । ପରେ ଠାକୁରମାନେ ଚନ୍ଦନ ପୁଷ୍କରିଣୀରେ ନୌକାବିହାର କରିଥିଲେ । ନୌକାବିହାର ପରେ ଠାକୁରମାନଙ୍କୁ ହଳଦୀ ଲାଗି କରାଯାଇ ବିଧିବତ ପୂଜାର୍ଚ୍ଚନା କରାଯାଇଥିଲା । ପରମ୍ପରା ଅନୁଯାୟୀ ୨୧ ଦିନ ଦିନଚାପ ଓ ୨୦ ଦିନ ରାତ୍ରିଚାପ ଅନୁଷ୍ଠିତ ହୋଇଥାଏ । ଆଜିଠାରୁ ଭିତର ଚାପ ନୀତି ଆରମ୍ଭ ହେବ । ଚଳିତ ବର୍ଷ ଯୋଡ଼ା ଜୈଷ୍ଠ ମାସ ପଡୁଥିବାରୁ ଭିତର ଚାପ ୪୫ ଦିନ ଧରି ଚାଲିବ । ମହାପ୍ରଭୁଙ୍କ ଚାପ ନୀତି ଦର୍ଶନ ପାଇଁ କିସ୍ ପରିସରରେ ହଜାର ହଜାର ଭକ୍ତଙ୍କ ସମାଗମ ହୋଇଛି ।