ଉଦଳା : ଚଳନ୍ତା ଆମ୍ବୁଲାନ୍ସରୁ ବାହାରିଗଲା ଟାୟାର ନଟ୍, ଅଳ୍ପକେ ବର୍ତ୍ତିଲା ପ୍ରସୂତୀ ଓ ନବଜାତ। ଅଧଘଣ୍ଟାରୁ ଅଧିକ ସମୟ ଧରି ଆମ୍ବୁଲାନ୍ସ ଭିତରେ ପଡ଼ିରହିଲେ ଦୁଇ ଜଣ । ଏଭଳି ଘଟଣା ଘଟିଛି ଉଦଳା ଗୌଡିୟ ମଠ ନିକଟରେ । କପ୍ତିପଦା ଥାନା ନଛିପୁର ଅଞ୍ଚଳର ଜଣେ ଗର୍ଭବତୀଙ୍କୁ ପ୍ରସବ ଯନ୍ତ୍ରଣା ହେବାରୁ ତାଙ୍କୁ ମେଡିକାଲ ନେବା ନିମନ୍ତେ ୧୦୮ ଆମ୍ବୁଲାନ୍ସ ଡକାଇଥିଲେ ଆଶା ଦିଦି। ହେଲେ ଆମ୍ବୁଲାନ୍ସ ପହଂଚିବା ପୂର୍ବରୁ ଘରେ ପ୍ରସବ କରିଥିଲେ । ଆମ୍ବୁଲାନ୍ସ ପହଂଚିବା ପରେ ନବଜାତ ଏବଂ ପ୍ରସୂତି ମହିଳାଙ୍କୁ ଆମ୍ବୁଲାନ୍ସରେ ନେଇ ଆଶା ଦିଦି ଉଦଳା ମେଡିକାଲ ଆସୁଥିଲେ ।
ହେଲେ ଉଦଳା ଗୌଡିୟ ମଠ ନିକଟରେ ଆମ୍ବୁଲାନ୍ସ ପଛ ଚକର ସମସ୍ତ ନଟ ଖୋଲି ଯାଇ ଟାୟାର ଟି ଗାଡ଼ିରୁ ଅଳ୍ପ ବାହାରି ଯାଇଥିଲା । ଡ୍ରାଇଭର ଏହା ଜାଣିପାରି ଗାଡି ରାସ୍ତା କଡରେ ଅଟକାଇ ଦେଇଥିଲେ। ଯାହା ଫଳରେ ବଡ଼ ଦୁର୍ଘଟଣାରୁ ସମସ୍ତେ ବର୍ତ୍ତି ଯାଇଥିଲେ। ପରେ ଅନ୍ୟ ଏକ ଆମ୍ବୁଲାନ୍ସରେ ଉଭୟ ମାଆ ଓ ଶିଶୁଙ୍କୁ ମେଡିକାଲ ସ୍ଥାନାନ୍ତର କରାଯାଇଛି ।
