ହଠାତ ଆପଣଙ୍କ ଘରକୁ ଗେଷ୍ଟ ପଳେଇ ଆସିଲେ ଆପଣ ଚିନ୍ତାରେ ପଡିଯାନ୍ତି କଣ କରି ନିଜ ଅତିଥି ମାନଙ୍କୁ ଖୁଆଇବେ । ବିଶେଷ ଭାବେ ସ୍ନାକ୍ସ ଆଇଟମକୁ ନେଇ ପ୍ରାୟ ସମସ୍ତେ ଚିନ୍ତାରେ ପଡିଯାନ୍ତି । ଆପଣଙ୍କ ସେହି ଚିନ୍ତାକୁ ଦୂର କରିବା ପାଇଁ ଆଜି ଆମେ ଆପଣଙ୍କ ପାଇଁ ନେଇ ଆସିଛୁ ଏକ ସରଳ ଓ ସ୍ୱାଦିଷ୍ଟ ରେସିପି । ଯାହାକୁ ପ୍ରସ୍ତୁତ କରିବା ସହଜ ହେବା ସହ ଶୀଘ୍ର ମଧ୍ୟ ହୋଇଥାଏ । ଯାହାକୁ ଖାଇ ଆପଣଙ୍କ ଗେଷ୍ଟ ଆପଣଙ୍କ ହାତର ପ୍ରଶଂସା ନ କରି ରହି ପାରିବେ ନାହିଁ । ତେବେ ଆସନ୍ତୁ ପ୍ରସ୍ତୁତ କରିବା ‘ଚି଼ଲ୍ଲୀ ବେବିକର୍ଣ୍ଣ’ । ତେବେ ଜାଣି ରଖନ୍ତୁ ଏଥିପାଇଁ
ଆବଶ୍ୟକ ହେଉଥିବା ସାମଗ୍ରୀ:
୧.୨୦୦ ଗ୍ରାମ ବେବୀ କର୍ଣ୍ଣ
୨. ୨୫ ଗ୍ରାମ ମଇଦା
୩.୨୫ ଗ୍ରାମ ଆରାରୁଟ ପାଉଡର
୪. ୫୦୦ ଗ୍ରାମ ରିଫାଇନ ତେଲ
୫.୨ଟି କଞ୍ଚା ଲଙ୍କା
୬. ୧୦୦ ଗ୍ରାମ ସିମ୍ଲା ଲଙ୍କା
୭. ୧୦୦ ଗ୍ରାମ ପିଆଜ
୮. ୩ ଛୋଟ ଚାମଚ ଟମାଟୋ ସସ
୯. ୩ ଛୋଟ ଚାମଚ ଚିଲି ସସ
୧୦.ଗୋଟେ ଛୋଟ ଚାମଚ ଅଦା ରସୁଣ ପେଷ୍ଟ
୧୧. ଅଧା ଚାମଚ ସୋୟା ସସ
୧୨.୨ ଗ୍ରାମ ଚାଇନା ଲୁଣ
ପ୍ରସ୍ତୁତି ପ୍ରଣାଳୀ:
ପ୍ରଥମେ ବେବି କର୍ଣ୍ଣକୁ ଛୋଟ ଛୋଟ କାଟି ରଖନ୍ତୁ । ଆରାରୁଟ ପାଉଡର, ମଇଦା, ଲୁଣ ଆଦିକୁ ଏକ ସାଥିରେ ମିଶେଇ ଅଳ୍ପ ପାଣି ଦେଇ ଏକ ଗାଢ଼ ଘୋଳ ପ୍ରସ୍ତୁତ କରନ୍ତୁ । ପିଆଜ, ସିମଲା ଲଙ୍କା, କଞ୍ଚା ଲଙ୍କାକୁ ଛୋଟ ଛୋଟ କରି କାଟି ଦିଅନ୍ତୁ । ଏବେ ଚୁଲିରେ ଏକ କଡେଇ ବସେଇ ତେଲ ଗରମ କରନ୍ତୁ ସେଥିରେ ବେବି କର୍ଣ୍ଣକୁ ମଇଦା ଘୋଳରେ ବୁଡେଇ ସୁନେଲି ରଙ୍ଗ ହେବା ପର୍ଯ୍ୟନ୍ତ ଛାଣି ଦିଅନ୍ତୁ । ଏବେ ଆଉ ଏକ କଡେଇ ବସେଇ ସେଥିରେ ଦୁଇ ଚାମଚ ତେଲ ଦିଅନ୍ତୁ । ତେଲ ଗରମ ହେବା ପରେ ଅଦା ରସୁଣ ପେଷ୍ଟ ଦେଇ ୪ ରୁ ୫ ମିନିଟ ପାଇଁ ଭଲକି ଫ୍ରାଏ କରି ଦିଅନ୍ତୁ । ଏବେ ପିଆଜ, ସିମଲା ଲଙ୍କା, କଞ୍ଚା ଲଙ୍କା ୫ ରୁ ୭ ମିନିଟ ପାଇଁ ଫ୍ରାଏ କରି ଦିଅନ୍ତୁ | ଏବେ ସେଥିରେ ଦେଢ଼ କପ ପାଣି ଦିଅନ୍ତୁ । ଏବେ ସେଥିରେ ସସ ଓ ଚାଇନା ଲୁଣ ପକାନ୍ତୁ । ଏବେ ସେଥିରେ ପୂର୍ବରୁ ଫ୍ରାଏ ହୋଇଥିବା ବେବି କର୍ଣ୍ଣ ପକେଇ କିଛି ସମୟ ପାଇଁ ଚୁଲିରେ ବସାନ୍ତୁ । ଏବେ ପ୍ରସ୍ତୁତ ହୋଇଗଲା ଗରମ ଗରମ ଚି଼ଲ୍ଲୀ ବେବି କର୍ଣ୍ଣ ।
