ନୂଆଦିଲ୍ଲୀ : ଦିଲ୍ଲୀରେ ବଢ଼ୁଥିବା ବାୟୁ ପ୍ରଦୂଷଣକୁ ନିୟନ୍ତ୍ରଣ କରିବା ଲାଗି ଯାନବାହନ ପ୍ରବେଶ ଉପରେ ନୂଆ କଟକଣା ଲାଗୁ ହୋଇଛି । ନଭେମ୍ବର ୧ରୁ ଦିଲ୍ଲୀରେ ପ୍ରବେଶ କରୁଥିବା ଗାଡ଼ିଗୁଡ଼ିକୁ ଇନ୍ଧନ ଓ ନିର୍ଗମନ ମାନଦଣ୍ଡ ସମ୍ପର୍କିତ ନିୟମ କଡ଼ାକଡ଼ି ଭାବେ ପାଳନ କରିବାକୁ ପଡ଼ିବ । ଏନେଇ ହାପୁଡ଼ର ସହକାରୀ ଆଞ୍ଚଳିକ ପରିବହନ ଅଧିକାରୀ କାର୍ଯ୍ୟାଳୟ ପକ୍ଷରୁ ଏକ ପ୍ରେସ୍ ବିଜ୍ଞପ୍ତି ଜାରି କରାଯାଇ ଗାଡ଼ି ମାଲିକ ଓ ଚାଳକମାନଙ୍କୁ ସଚେତନ କରାଯାଇଛି । ବାୟୁ ଗୁଣବତ୍ତା ପରିଚାଳନା ଆୟୋଗ (CAQM)ଙ୍କ ନିର୍ଦ୍ଦେଶ ଅନୁଯାୟୀ, ବିଏସ୍-୬, ସିଏନଜି, ଏଲ୍ଏନ୍ଜି ଓ ବୈଦ୍ୟୁତିକ ଯାନଗୁଡ଼ିକୁ ପ୍ରାଥମିକତା ଦିଆଯାଉଛି ।
ଦିଲ୍ଲୀରେ ବିଏସ୍-୪ ଶ୍ରେଣୀର ମାଲବାହୀ ଯାନଗୁଡ଼ିକୁ ୩୧ ଅକ୍ଟୋବର ୨୦୨୬ ପର୍ଯ୍ୟନ୍ତ ସୀମିତ ସମୟ ପାଇଁ ପ୍ରବେଶ ଅନୁମତି ଦିଆଯାଇଛି । ଏହି ସମୟସୀମା ପରେ ଉକ୍ତ ଯାନଗୁଡ଼ିକର ଦିଲ୍ଲୀ ପ୍ରବେଶ ଉପରେ କଟକଣା ଲାଗୁ ହେବ । ନଭେମ୍ବର ୧, ୨୦୨୬ରୁ ସିଏନ୍ଜି, ବୈଦ୍ୟୁତିକ ଓ ବିଏସ୍-୬ ଡିଜେଲ୍ ଯାନ ବ୍ୟତୀତ ଅନ୍ୟ କେତେକ ଶ୍ରେଣୀର ବସର ଦିଲ୍ଲୀ ପ୍ରବେଶ ଉପରେ ମଧ୍ୟ କଟକଣା ଲାଗୁ ହେବ । ଦିଲ୍ଲୀରେ ପଞ୍ଜୀକୃତ ବସଗୁଡ଼ିକ ପାଇଁ ନିୟମ ଅନୁଯାୟୀ ରିହାତି ବ୍ୟବସ୍ଥା ରହିବ ।
ବିଜ୍ଞପ୍ତି ଅନୁସାରେ ନଭେମ୍ବର ୧ରୁ ଜାନୁଆରୀ ୩୧ ପର୍ଯ୍ୟନ୍ତ ଦିଲ୍ଲୀ ବାହାରେ ପଞ୍ଜୀକୃତ ଏବଂ ବିଏସ୍-୬ ମାନଦଣ୍ଡଠାରୁ କମ୍ ଶ୍ରେଣୀର ଯାନଗୁଡ଼ିକର ପ୍ରବେଶ ଉପରେ କଟକଣା ରହିବ । ଏହି ପଦକ୍ଷେପ ଦ୍ୱାରା ଦିଲ୍ଲୀରେ ଯାନବାହନ ଜନିତ ପ୍ରଦୂଷଣ ହ୍ରାସ କରିବାକୁ ଉଦ୍ୟମ କରାଯାଉଛି ।
