କଟକ : କଟକ ସ୍ୱତନ୍ତ୍ର ପୋକସୋ କୋର୍ଟ ଜନୈକା ନାବାଳିକାକୁ ଦୁଷ୍କର୍ମ ମାମଲାରେ ଅଭିଯୁକ୍ତକୁ ଦୋଷୀ ସାବ୍ୟସ୍ତ କରିବା ସହିତ ୨୦ ବର୍ଷର ସଶ୍ରମ କାରାଦଣ୍ଡାଦେଶ ଦେଇଛନ୍ତି । ସଶ୍ରମ କାରାଦଣ୍ଡ ସହିତ ୨୦ ହଜାର ଟଙ୍କାର ଜରିମାନା ନିର୍ଦ୍ଦେଶ ଦେଇଛନ୍ତି ଅଦାଲତ । ଜରିମାନା ଅନାଦେୟ ଅଧିକ ଏକ ବର୍ଷ ଜେଲଦଣ୍ଡ ଭୋଗିବ ବୋଲି ନିର୍ଦ୍ଦେଶ ରହିଛି । ପିଡ଼ିତା କ୍ଷତିପୂରଣ ଆଇନ ଅନୁଯାୟୀ ପିଡ଼ିତାକୁ ୫ ଲକ୍ଷ ଟଙ୍କା କ୍ଷତିପୂରଣ ଜିଲ୍ଲା ଆଇନସେବା ପ୍ରାଧିକରଣ ଜରିଆରେ ପ୍ରଦାନ କରିବା ପାଇଁ ନିର୍ଦ୍ଦେଶ ଦିଆଯାଇଛି ।
ଅଭିଯୁକ୍ତ ୨୦ ବର୍ଷୀୟ ଜଗା ଓରଫ ରାକେଶ ବେହେରା କଟକ ସ୍ୱତନ୍ତ୍ର ପୋକସୋ କୋର୍ଟରେ ଦୋଷୀ ସାବ୍ୟସ୍ତ ହୋଇଛି । ଗତ ୨୦୨୧ ମସିହା ଜୁନ ୫ ତାରିଖରେ ମାହାଙ୍ଗା ଥାନା ଅଞ୍ଚଳରେ ଘଟିଥିଲା ଏହି ଘଟଣା । ପୀଡ଼ିତା ନାବାଳିକା ନିଜ ସାଙ୍ଗ ଘରକୁ ତାର ଖାତା ଫେରାଇବା ପାଇଁ ଯାଇଥିଲା । ଏହି ସମୟରେ ଅଭିଯୁକ୍ତ ରାକେଶ ବେହେରା ଓ ତାର ସହଯୋଗୀ ଗଣେଶ୍ୱର ସେଠୀ ତୋର ବଡ଼ ଭଉଣୀ ଡାକୁଛି କହି ଏକ ଘର ଭିତରକୁ ନେଇ ଯାଇଥିଲେ ।
ସେଠାରେ ପୀଡ଼ିତାକୁ ରାକେଶ ବେହେରା ଦୁଷ୍କର୍ମ କରିଥିଲା । ପରବର୍ତ୍ତୀ ସମୟରେ ପୁନଶ୍ଚ ଡାକିଥିଲା । ପୀଡ଼ିତା ଯିବାକୁ ମନା କରିବାରୁ ସେ ପୀଡ଼ିତାର ରେକର୍ଡ଼ିଂ ଭିଡିଓ ସାମାଜିକ ଗଣମାଧ୍ୟମରେ ଛାଡି ଦେବ ବୋଲି ଧମକାଇ ଥିଲା । ଏହାପରେ ପୀଡ଼ିତା ବାପା ମା’ ଆଗରେ କହିବା ପରେ ୨୦୨୧ ସେପ୍ଟେମ୍ବର ୧୦ ତାରିଖରେ ମାହାଙ୍ଗା ଥାନାରେ ଅଭିଯୋଗ କରାଯାଇଥିଲା ।
ଏହି ଘଟଣାରେ ୨୦୨୧ ନଭେମ୍ବର ୮ ତାରିଖରେ କୋର୍ଟରେ ଚାର୍ଜସିଟ ଦାଖଲ ହୋଇଥିଲା । ୨୦୨୩ ମାର୍ଚ୍ଚ ୨୮ ତାରିଖରେ ଅଭିଯୁକ୍ତ ବିରୋଧରେ ପୋକସୋ କୋର୍ଟରେ ଚାର୍ଜଫ୍ରେମ ହୋଇଥିଲା । ୨୦୨୩ ଜୁଲାଇ ୨୪ ତାରିଖରେ ମାମଲାର ସାକ୍ଷ୍ୟ ଗ୍ରହଣ ଆରମ୍ଭ ହୋଇଥିଲା । ଗତ ୧୫ ତାରିଖରେ ମାମଲାର ଶୁଣାଣି ଶେଷ କରି ରାୟ ସଂରକ୍ଷିତ ରଖିଥିଲେ ଅଦାଲତ । ୮ ଜଣ ସାକ୍ଷୀଙ୍କ ବୟାନ ଓ ୨୮ ଟି ତଥ୍ୟ ପ୍ରମାଣ ଆଧାରରେ ପୋକସୋ କୋର୍ଟ ଏହି ଦଣ୍ଡବିଧାନ କରିଛନ୍ତି । ସ୍ୱତନ୍ତ୍ର ସରକାରୀ ଓକିଲ ରମେଶ ଚନ୍ଦ୍ର ମହାନ୍ତି ଓ ବିଶ୍ୱଜିତ ରାୟ ଏହି ମାମଲା ପରିଚାଳନା କରୁଥିଲେ ।
