ନୂଆଦିଲ୍ଲୀ : ପଶ୍ଚିମବଙ୍ଗରେ ୨୬ ହଜାର ଶିକ୍ଷକ ଓ ଅନ୍ୟ ଷ୍ଟାଫଙ୍କ ନିଯୁକ୍ତି ରଦ୍ଦ ହେବା ପରେ ମମତା ବର୍ଷିଛନ୍ତି ବିଜେପି ଉପରେ। ଯାହା ପରେ ବିଜେପି ଦିଦିଙ୍କ ଇସ୍ତଫା ଦାବି କରିଛି । ସୁପ୍ରିମ କୋର୍ଟ ନିଯୁକ୍ତି ସବୁକୁ ରଦ୍ଦ କରିବା ପରେ ପଶ୍ଚିମବଙ୍ଗ ରାଜନୀତିରେ ହଇଚଇ ସୃଷ୍ଟି ହୋଇଛି । ପଶ୍ଚିମବଙ୍ଗରେ ପ୍ରାୟ ୨୬ହଜାର ଶିକ୍ଷକ ଏବଂ ଅନ୍ୟ ଷ୍ଟାଫ୍ ନିଯୁକ୍ତିକୁ ବେଆଇନ ବୋଲି ସୁପ୍ରିମକୋର୍ଟ ଘୋଷଣା କରିଛନ୍ତି । ଲାଞ୍ଚ ନେଇ ନିଯୁକ୍ତି ଦିଆଯାଇଥିବା ଅଭିଯୋଗ କରିଛି ବିଜେପି ।
ତେବେ ଅନ୍ୟପଟେ ସିପିଏମ କହିଛି ଯେ, ଖାଲିଥିବା ପଦବୀରେ ତୁରନ୍ତ ଭର୍ତ୍ତି ପ୍ରକ୍ରିୟା ଆରମ୍ଭ ହେବା ଆବଶ୍ୟକ । ଏପଟେ ବିଜେପି ମମତା ବନାର୍ଜୀଙ୍କ ଇସ୍ତଫା ଦାବି କରିଛି । ପଶ୍ଚିମବଙ୍ଗ ବିଜେପିର ସଭାପତି ଏବଂ ଶିକ୍ଷା ରାଷ୍ଟ୍ରମନ୍ତ୍ରୀ ଏହି ଘଟଣା ପରେ ମମତାଙ୍କ ଇସ୍ତଫା ଦାବି କରି ଏଭଳି ନିଯୁକ୍ତି ପ୍ରକ୍ରିୟା ପାଇଁ ସମ୍ପୂର୍ଣ୍ଣ ଭାବେ ମମତା ଦାୟୀ ବୋଲି ସୋସିଆଲ ମିଡିଆରେ ଜଣାଇଛନ୍ତି । ଟଙ୍କା ନେଇ ନକଲି ନିଯୁକ୍ତି କରାଯାଇଛି । ଫଳରେ ମେଧାବୀ ତଥା ଯୋଗ୍ୟ ପ୍ରାର୍ଥୀ ଠକାମୀର ଶିକାର ହୋଇଛନ୍ତି ବୋଲି ବିଜେପି ଅଭିଯୋଗ କରିଛି । ଏ ବାବଦରେ ପ୍ରତିକ୍ରିୟା ରଖିବାକୁ ଯାଇ ମମତା କହିଛନ୍ତି ଯେ ସେ ନ୍ୟାୟପାଳିକାକୁ ସମ୍ମାନ କରନ୍ତି କିନ୍ତୁ ଏଭଳି ନିଷ୍ପତ୍ତିକୁ ଗ୍ରହଣ କରିପାରିବେ ନାହିଁ । ଆହୁରି ମଧ୍ୟ ପଶ୍ଚିମବଙ୍ଗର ଶିକ୍ଷା କ୍ଷେତ୍ରକୁ ବିଜେପି ଦୁର୍ବଳ କରିଦେଉଛି ବୋଲି ସେ ବଡ଼ ଅଭିଯୋଗ କରିଛନ୍ତି ।