ପାକିସ୍ତାନର ସରକାରୀ ହସ୍ପିଟାଲରୁ ଏକ ଆଶ୍ଚର୍ଯ୍ୟଜନକ ରିପୋର୍ଟ ସାମ୍ନାକୁ ଆସିଛି। ପଞ୍ଜାବ ପ୍ରଦେଶର ଟାଉନ୍ସାରେ ଥିବା ଟିଏଚ୍କ୍ୟୁ ହସ୍ପିଟାଲର ଡାକ୍ତରଙ୍କ ଅବହେଳା ଯୋଗୁଁ, ୩୩୧ ରୁ ଅଧିକ ନିଷ୍ପାପ ଶିଶୁ ଦୁରାରୋଗ୍ୟ ରୋଗ ଏଚ୍ଆଇଭିରେ ଆକ୍ରାନ୍ତ ହୋଇଛନ୍ତି। ଗୋଟିଏ ସିରିଞ୍ଜର ପୁନଃବ୍ୟବହାର ଏବଂ ମୌଳିକ ପରିଷ୍କାର ପରିଚ୍ଛନ୍ନତା ପ୍ରତି ଅବହେଳା ଯୋଗୁ ପିଲାମାନଙ୍କ ଜୀବନ ଏବେ ବିପଦରେ ପଡ଼ିଛି । ବିବିସି ରିପୋର୍ଟ ଏହା ପ୍ରକାଶ କରିଛି। ଏହି ଭୟଙ୍କର କାହାଣୀର ସବୁଠାରୁ ଦୁଃଖଦ ଘଟଣା ହେଉଛି ଆଠ ବର୍ଷୀୟ ମହମ୍ମଦ ଅମିନଙ୍କର ମୃତ୍ୟୁ। ଏଚ୍ଆଇଭିରେ ଆକ୍ରାନ୍ତ ହୋଇଥିବା ଚିହ୍ନଟ ହେବାର କିଛି ସମୟ ପରେ ତାଙ୍କର ମୃତ୍ୟୁ ଘଟିଥିଲା । ଅମିନଙ୍କ ମାଆ କହିଛନ୍ତି ଜୀବନରଶେଷ ଦିନଗୁଡ଼ିକରେ ତାଭ୍କୁ ପ୍ରବଳ ଜ୍ୱର ଏବଂ ଯନ୍ତ୍ରଣା ହୋଇଥିଲା। ଅମିନଙ୍କ ମୃତ୍ୟୁ ପରେ, ତାଙ୍କ ଭଉଣୀ ଆସମା ମଧ୍ୟ ଏଚ୍ଆଇଭି ପଜିଟିଭ୍ ପରୀକ୍ଷା କରିଥିଲେ। ପରିବାର ଅଭିଯୋଗ କରିଛନ୍ତି, ସରକାରୀ ହସ୍ପିଟାଲରେ ଚିକିତ୍ସା ସମୟରେ ଦିଆଯାଇଥିବା ଦୂଷିତ ଇଞ୍ଜେକ୍ସନ ଯୋଗୁଁ ସେମାନଙ୍କର ପିଲାମାନେ ଏହି ଘାତକ ଭାଇରସ୍ ଦ୍ବାରା ଆକ୍ରାନ୍ତ ହୋଇଥିଲେ।
ଏହି ଭୟଙ୍କର ଘଟଣାର ପର୍ଦ୍ଦାଫାସ୍ ୨୦୨୪ ମସିହାର ଶେଷ ଭାଗରେ ହୋଇଥିଲା,ଯେତେବେଳେ ସ୍ଥାନୀୟ ଡାକ୍ତର ଗୁଲ କୈସରାନି ତାଙ୍କ କ୍ଲିନିକ୍କୁ ଆସୁଥିବା ପିଲାମାନଙ୍କ ମଧ୍ୟରେ ଅସାଧାରଣ ଭାବରେ ଅଧିକ ସଂଖ୍ୟକ ଏଚ୍ଆଇଭି ମାମଲା ଥିବା ଲକ୍ଷ୍ୟ କରିଥିଲେ। ଅଧିକ ତଦନ୍ତ ପରେ ଆଶ୍ଚର୍ଯ୍ୟଜନକ ତଥ୍ୟ ପ୍ରକାଶ ପାଇଥିଲା। ରିପୋର୍ଟ ଅନୁଯାୟୀ, ନଭେମ୍ବର ୨୦୨୪ ରୁ ଅକ୍ଟୋବର ୨୦୨୫ ମଧ୍ୟରେ ଟାଉନ୍ସାରେ ୩୩୧ ଜଣ ପିଲାଙ୍କ ନମୁନା ପରୀକ୍ଷା ଏଚ୍ଆଇଭି ପଜିଟିଭ୍ ଆସିଥିଲା। ଏହି ସଂକ୍ରମଣ ଅସୁରକ୍ଷିତ ଇଞ୍ଜେକ୍ସନ ବ୍ୟବହାର କରିବା ଦ୍ବାରା ବ୍ୟାପିଥିବା ଜଣାପଡ଼ିଥିଲା।
