ରାଉରକେଲା: ସ୍ମାର୍ଟ ସିଟି ରାଉରକେଲାରେ ଲଜ୍ଜା ପିଛା ଛାଡୁନି । ଦୁଇ ଆଦିବାସୀ ନାବାଳିକାଙ୍କୁ ଗଣଦୁଷ୍କର୍ମ, ନବମ ଶ୍ରେଣୀ ଛାତ୍ରୀଙ୍କୁ ଶିକ୍ଷକଙ୍କ ଅସଦାଚରଣ, ଡିପ୍ଲୋମା ଛାତ୍ରୀଙ୍କୁ ଗଣଦୁଷ୍କର୍ମ ଓ କଲେଜ ଛାତ୍ରୀଙ୍କୁ ଅପହରଣ ଘଟଣା ଲୋକଙ୍କ ମନରୁ ଏଯାଏଁ ଲିଭିନି । ଏହାରି ମଧ୍ୟରେ ଆଉ ଗୋଟେ ଲଜ୍ଜାଜନକ ଘଟଣା ଲୋକଲୋଚନକୁ ଆସିଛି । ଜଣେ ପିଜି ଛାତ୍ରୀଙ୍କୁ ଭୋକେସନାଲ୍ ଟ୍ରେନର ଅସଦାଚରଣ କରିଥିବା ଅଭିଯୋଗ ହୋଇଛି । ଦୀର୍ଘ ୯ ମାସ ଧରି ନ୍ୟାୟ ନମିଳିବାରୁ ଛାତ୍ରୀ ଜଣକ ପୁଲିସ ନିକଟରେ ଅଭିଯୋଗ କରିଛନ୍ତି । ରଘୁନାଥପାଲି ଥାନାରେ ଏହି ଅଭିଯୋଗ ହୋଇଛି । ପୁଲିସ ଭୋକେସନାଲ୍ ଟ୍ରେନର ପ୍ରକାଶ କୁମାର ସାହୁ(୩୯)ଙ୍କୁ ଗିରଫ କରି କୋର୍ଟ ଚାଲାଣ କରିଛି ।
ପୁଲିସ ସୂଚନା ମୁତାବକ, ପାନପୋଷ ସରକାରୀ ସ୍ୱୟଂଶାସିତ ମହାବିଦ୍ୟାଳୟରେ ପିଜି ପ୍ରଥମ ବର୍ଷରେ ପାଠପଢୁଥିବା ଜଣେ ଛାତ୍ରୀଙ୍କୁ ଗତ ଜାନୁଆରୀ ମାସରେ ଅଭିଯୁକ୍ତ ପ୍ରକାଶ ଅସଦାଚରଣ ଓ ନିର୍ଯାତନା ଦେଇଥିଲେ । ଏନେଇ ପୀଡ଼ିତା କଲେଜ ପରିଚାଳନା କମିଟି ନିକଟରେ ଅଭିଯୋଗ କରିଥିଲେ । ହେଲେ ଆଜି ଯାଏଁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନ ଥିଲା । ତେଣୁ ଗୁରୁବାର ପୀଡ଼ିତା ଥାନାରେ ଲିଖିତ ଅଭିଯୋଗ କରିଥିଲେ । ପୁଲିସ ଶୁକ୍ରବାର ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଥିଲା । ତେବେ ପୀଡିତା କଲେଜ ପରିଚାଳନା କମିଟି ଏବଂ ଅଧ୍ୟକ୍ଷଙ୍କୁ ଲିଖିତ ଭାବେ ଅଭିଯୋଗ କରିଥିଲା ବେଳେ ଏ ନେଇ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରି କଲେଜ କର୍ତ୍ତୃପକ୍ଷ ନିରବ ରହିବା ପଛରେ କି ରହସ୍ୟ ଲୁଚି ରହିଛି ତାହା ତଦନ୍ତ ପରେ ଲୋକଲୋଚନକୁ ଆସିବ ବୋଲି କୁହାଯାଉଛି ।
