ଶରୀରର କୌଣସି ସ୍ଥାନରେ ଆଘାତ ଲାଗିଲେ, ଫୁଲିଗଲେ କିମ୍ବା ଅନ୍ୟ କୌଣସି ସମସ୍ୟା ହେଲେ ସେଠାରେ ଥିବା ନର୍ଭ ବା ସ୍ନାୟୁ ଯନ୍ତ୍ରଣା ସମ୍ପର୍କିତ ସିଗନାଲ୍ ମସ୍ତିଷ୍କକୁ ପଠାଇଥାଏ । ଶରୀରର କୌଣସି ସ୍ଥାନରେ ଆଘାତ ଲାଗିଲେ, ଫୁଲିଗଲେ କିମ୍ବା ଅନ୍ୟ କୌଣସି ସମସ୍ୟା ହେଲେ ସେଠାରେ ଥିବା ନର୍ଭ ବା ସ୍ନାୟୁ ଯନ୍ତ୍ରଣା ସମ୍ପର୍କିତ ସିଗନାଲ୍ ମସ୍ତିଷ୍କକୁ ପଠାଇଥାଏ । ମସ୍ତିଷ୍କ ଏହି ସିଗନାଲକୁ ବୁଝିବା ପରେ ଆମକୁ ଯନ୍ତ୍ରଣା ଅନୁଭବ ହୁଏ । କିନ୍ତୁ ଏଠାରେ ଏକ ପ୍ରଶ୍ନ ଆସେ- ଆମେ ପେନ୍ କିଲର ଖାଇଲେ ଏହା କେମିତି ଜାଣେ ଯେ ଯନ୍ତ୍ରଣା ମୁଣ୍ଡରେ ଅଛି, ପେଟରେ ଅଛି ନା ଗୋଡ଼ରେ?
ସତ କଥା ହେଉଛି, ପେନ୍ କିଲରକୁ ଯନ୍ତ୍ରଣା କେଉଁଠି ହେଉଛି ତାହା ଜଣା ନଥାଏ । ତେବେ ଏହା ଶରୀରରେ ଯନ୍ତ୍ରଣା ସୃଷ୍ଟି କରୁଥିବା ପ୍ରକ୍ରିୟାକୁ କମାଇ ଆମକୁ ଆରାମ ଦେଇଥାଏ ।
ଶରୀରରେ ଆଘାତ କିମ୍ବା ଫୁଲା ହେଲେ କିଛି ରାସାୟନିକ ପଦାର୍ଥ ବା କେମିକାଲ୍ ତିଆରି ହୁଏ । ଏଥିରେ ପ୍ରୋଷ୍ଟାଗ୍ଲାଣ୍ଡିନ୍ ଏକ ମୁଖ୍ୟ ପଦାର୍ଥ। ଏହା ସ୍ନାୟୁକୁ ଅଧିକ ସମ୍ବେଦନଶୀଳ କରିଦିଏ । ଫଳରେ ଯନ୍ତ୍ରଣାର ସିଗନାଲ୍ ଶୀଘ୍ର ମସ୍ତିଷ୍କରେ ପହଞ୍ଚେ ଏବଂ ଆମକୁ ଅଧିକ ଯନ୍ତ୍ରଣା ଅନୁଭବ ହୁଏ । ଏହି ପ୍ରକ୍ରିୟା ପ୍ରକୃତରେ ଶରୀରର ଏକ ପ୍ରକାର ସୁରକ୍ଷା ବ୍ୟବସ୍ଥା । ଯନ୍ତ୍ରଣା ମାଧ୍ୟମରେ ଶରୀର ଆମକୁ ସଙ୍କେତ ଦିଏ ଯେ କୌଣସି ସ୍ଥାନରେ ସମସ୍ୟା ହୋଇଛି ଏବଂ ସେହି ସ୍ଥାନକୁ ଅଧିକ କ୍ଷତିରୁ ବଞ୍ଚାଇବା ଦରକାର ।
ପେନ୍ କିଲର ଖାଇବା ପରେ ଏହାର ସକ୍ରିୟ ଉପାଦାନ ପେଟ ଓ ଅନ୍ତନଳୀରୁ ଶରୀରରେ ଶୋଷିତ ହୋଇ ରକ୍ତରେ ମିଶିଯାଏ । ରକ୍ତ ଏହାକୁ ଶରୀରର ବିଭିନ୍ନ ଅଂଶକୁ ପହଞ୍ଚାଇଥାଏ । ତେଣୁ ପେନ୍ କିଲରକୁ ଯନ୍ତ୍ରଣାର ସ୍ଥାନ ଖୋଜିବାକୁ ପଡ଼େ ନାହିଁ । ଏହା ରକ୍ତ ମାଧ୍ୟମରେ ସାରା ଶରୀରରେ ପହଞ୍ଚିଯାଏ । ଅନେକ ସାଧାରଣ ପେନ୍ କିଲର ଶରୀରରେ ପ୍ରୋଷ୍ଟାଗ୍ଲାଣ୍ଡିନ୍ ତିଆରି ହେବା ପ୍ରକ୍ରିୟାକୁ କମାଇଥାଏ । ଫଳରେ ଯନ୍ତ୍ରଣା ଓ ଫୁଲା ଧୀରେ ଧୀରେ କମିଥାଏ । ପେନ୍ କିଲର ସାରା ଶରୀରରେ ଘୁରୁଥିଲେ ମଧ୍ୟ ଆରାମ ମୁଖ୍ୟତଃ ଯେଉଁଠି ଯନ୍ତ୍ରଣା ହେଉଛି ସେଠାରେ ଅନୁଭବ ହୁଏ ।
କାରଣ, ଆଘାତ କିମ୍ବା ଫୁଲା ହୋଇଥିବା ସ୍ଥାନରେ କେମିକାଲ୍ ଆକ୍ଟିଭିଟି ଅଧିକ ଥାଏ । ପେନ୍ କିଲର ଏହି ପ୍ରକ୍ରିୟାକୁ କମାଇଥିବାରୁ ସେହି ସ୍ଥାନରେ ଯନ୍ତ୍ରଣା କମିଥିବା ଅନୁଭବ ହୁଏ । କିଛି ମେଡିସିନ୍ ପ୍ରୋଷ୍ଟାଗ୍ଲାଣ୍ଡିନ୍ କମାଇଥାଏ, ଆଉ କିଛି ମେଡିସିନ୍ ସିଧାସଳଖ ସ୍ନାୟୁ କିମ୍ବା ମସ୍ତିଷ୍କର ଯନ୍ତ୍ରଣା ସିଗନାଲ୍ ଉପରେ ପ୍ରଭାବ ପକାଏ । ସେଥିପାଇଁ ସବୁ ପ୍ରକାର ଯନ୍ତ୍ରଣା ପାଇଁ ଗୋଟିଏ ପେନ୍ କିଲର ଉପଯୋଗୀ ହୋଇନଥାଏ ।
ପେନ୍ କିଲର ଖାଇବା ସବୁବେଳେ ସୁରକ୍ଷିତ କି?
ପେନ୍ କିଲରକୁ ବାରମ୍ବାର କିମ୍ବା ଅଧିକ ମାତ୍ରାରେ ଖାଇବା ଠିକ୍ ନୁହେଁ । କିଛି ପେନ୍ କିଲରର ଅଧିକ ବ୍ୟବହାର ପେଟ, କିଡନୀ ଓ ଲିଭର ଭଳି ଅଙ୍ଗ ଉପରେ ଖରାପ ପ୍ରଭାବ ପକାଇପାରେ।ତେଣୁ ଯନ୍ତ୍ରଣା ହେଲେ ନିଜ ଇଚ୍ଛାରେ ବାରମ୍ବାର ପେନ୍ କିଲର ଖାଇବା ପରିବର୍ତ୍ତେ ଡାକ୍ତର କିମ୍ବା ଫାର୍ମାସିଷ୍ଟଙ୍କ ପରାମର୍ଶ ନେବା ଉଚିତ । ସରଳ ଭାଷାରେ ବୁଝିବାକୁ ଗଲେ, ପେନ୍ କିଲର ଯନ୍ତ୍ରଣା କେଉଁଠି ଅଛି ତାହା ଜାଣେ ନାହିଁ । ମେଡିସିନ୍ ରକ୍ତ ମାଧ୍ୟମରେ ସାରା ଶରୀରରେ ପହଞ୍ଚି ଯନ୍ତ୍ରଣା ସୃଷ୍ଟି କରୁଥିବା ପ୍ରକ୍ରିୟାକୁ କମାଇଥାଏ । ଏହି କାରଣରୁ ଆମକୁ ଯନ୍ତ୍ରଣା ଥିବା ସ୍ଥାନରେ ଆରାମ ମିଳେ ।
