ବନ୍ଧୁକ ମୁନରେ ୮ଭରି ସୁନା ଅଳଙ୍କାର ସହ ଟଙ୍କା ଲୁଟ ଅଭିଯୋଗ, ତଦନ୍ତ କରୁଛି ପୋଲିସ

ନବରଙ୍ଗପୁର : ବନ୍ଧୁକ ମୁନରେ ୮ଭରି ସୁନା ଅଳଙ୍କାର ଓ ଟଙ୍କା ଲୁଟ ଅଭିଯୋଗ । ନବରଙ୍ଗପୁରରେ ରାତି ଅଧରେ ଡକାୟତ କବାଟ ଭାଙ୍ଗି ଘର ଭିତରେ ପଶି ବନ୍ଧୁକ ଓ ମାରଣାସ୍ତ୍ର ଦେଖାଇ ଦମ୍ପତିଙ୍କ ଠାରୁ ଟଙ୍କା ଓ ସୁନା ଲୁଟିନେଇଛନ୍ତି । ଏନେଇ ନବରଙ୍ଗପୁର ଟାଉନ ଥାନା ରେ ଅଭିଯୋଗ ହୋଇଛି । ମିରିଗାନଗୁଡ଼ା ଆଶୀର୍ବାଦ କଲୋନୀର ଏସ. ଗୋବିନ୍ଦା ସୁବୁଦ୍ଧିଙ୍କ ଘରେ ଗତକାଲି ବିଳମ୍ବିତ ରାତିରେ ୭ରୁ ୮ଜଣ ଅଜଣା ମୁଖାଧାରୀ ଦୁର୍ବୃତ୍ତଙ୍କ ଘର କବାଟ ଭାଙ୍ଗି ଭିତରେ ପଶିଥିଲେ । ଏସ. ଗୋବିନ୍ଦା ସୁବୁଦ୍ଧି ଓ ତାଙ୍କ ସ୍ତ୍ରୀଙ୍କ ଆଖିରେ ଲେଜର ଲାଇଟ ପକାଇବା ପରେ ବନ୍ଧୁକ ଦେଖାଇ ଭୟଭୀତ କରିଥିଲେ । ସୁନା ଅଳଙ୍କାର ଦେବାକୁ କହିଥିଲେ । ୮ ଭରି ସୁନା ପ୍ରାୟ ୧୫ ହଜାର ଟଙ୍କା ଏବଂ ଦୁଇଟି ମୋବାଇଲ ଫୋନ ଦୁର୍ବୃତ୍ତମାନେ ନେଇଯାଇଛନ୍ତି । ଟାଉନ ପୋଲିସ ଖବର ପାଇ ଘଟଣାସ୍ଥଳ କୁ ଯାଇ ତଦନ୍ତ ଆରମ୍ଭ କରିଛି । ହେଲେ ଲୁଟେରାଙ୍କ ଟେର ପାଇପାରିନାହିଁ ।