ଆଳି : ବିବାହ ପ୍ରସ୍ତାବ ଦେଖିବାକୁ ଆସି ଯୁବତୀଙ୍କ ଗଳା କାଟିଦେଲେ ଯୁବକ । ଏଭଳି ଅଭାବନୀୟ ଘଟଣା ଘଟିଛି କେନ୍ଦ୍ରାପଡା ଜିଲ୍ଲା ରାଜକନିକା ଥାନା ଅନ୍ତର୍ଗତ କୁଜିପୁର ଗାଁରେ । କୁଜିପୁରୁ ଗାଁର କିଶୋର ଦାସଙ୍କ ଭାଣିଜୀ ପ୍ରିୟଙ୍କା ଦାସଙ୍କ ସହ ଗାରଡ଼ପୁର ଗାଁର ସୁବ୍ରତ ନାୟକଙ୍କ ସହିତ ବିବାହ ପ୍ରସ୍ତାବ ପଡିଥିଲା । ଆସନ୍ତା ମାସରେ ଉଭୟଙ୍କ ମଧ୍ୟରେ ବିବାହ ହେବାନେଇ ପରିବାର ମଧ୍ୟରେ ସହମତି ହୋଇଥିଲା ।
ହେଲେ ଆଜି ସୁବ୍ରତ ତାଙ୍କ ମାଆଙ୍କ ସହିତ ପ୍ରିୟଙ୍କାଙ୍କୁ ଦେଖା କରିବା ପାଇଁ ପ୍ରିୟଙ୍କାଙ୍କ ମାମୁ ଘରକୁ ଯାଇଥିଲେ । ସେଠାରେ ପହଁଚିବା ପରେ ଉଭୟ ପ୍ରିୟଙ୍କା ଓ ସୁବ୍ରତ କିଛି ସମୟ କଥାବାର୍ତ୍ତା ହୋଇଥିଲେ । କୌଣସି କଥାକୁ ନେଇ ଉଭୟଙ୍କ ମଧ୍ୟରେ ବଚସା ହୋଇଥିଲା । ଏହି ସମୟରେ ହଠାତ ସୁବ୍ରତ ଏକ ଧାରୁଆ ଅସ୍ତ୍ରରେ ପ୍ରିୟଙ୍କାଙ୍କ ବେକ କାଟି ଦେଇଥିଲେ ।
ପ୍ରିୟଙ୍କା ଚିତ୍କାର କରିବାରୁ ପରିବାର ଲୋକେ ଦୌଡ଼ି ଆସି ରକ୍ତ ଜୁଡୁବୁଡୁ ଅବସ୍ଥାରେ ଉଦ୍ଧାର କରି ପ୍ରିୟଙ୍କାଙ୍କୁ ରାଜକନିକା ଗୋଷ୍ଠୀସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ଅନ୍ୟପଟେ ପାଟିତୁଣ୍ଡ ଶୁଣି ଗାଁର ଲୋକମାନେ ରୁଣ୍ଡ ହୋଇ ସୁବ୍ରତକୁ କାବୁକରି ରାଜକନିକା ପୋଲିସ ଜିମାରେ ଦେଇଥିଲେ । ପୋଲିସ ସୁବ୍ରତକୁ ଗିରଫ କରିଅଧିକ ତଦନ୍ତ ଚଳାଇଛି ।
