ଭାଇ-ଭଉଣୀଙ୍କ ଭଲପାଇବା, ସ୍ନେହ ଓ ପରସ୍ପରର ଯତ୍ନକୁ ପାଳନ କରିବାର ପର୍ବ ହେଉଛି ରକ୍ଷାବନ୍ଧନ। ଚଳିତ ବର୍ଷ ଅଗଷ୍ଟ ମାସରେ ରକ୍ଷାବନ୍ଧନ ପାଳନ କରାଯିବ। ତେବେ ଏଥର ରାକ୍ଷୀ ପାଇଁ ତାରିଖକୁ ନେଇ ଲୋକଙ୍କ ମନରେ ଟିକେ ଦ୍ୱନ୍ଦ୍ୱ ରହିଛି। କାରଣ ପୂର୍ଣ୍ଣିମା ତିଥି ଦୁଇ ଦିନ ରହୁଛି। ତେବେ ୨୭ ନା ୨୮ ଅଗଷ୍ଟ, କେଉଁ ଦିନ ଭାଇଙ୍କ ହାତରେ ରାକ୍ଷୀ ବାନ୍ଧିବେ?
ପାଞ୍ଜି ଅନୁସାରେ, ଚଳିତ ବର୍ଷ ୨୮ ଅଗଷ୍ଟ ୨୦୨୬, ଶୁକ୍ରବାର ଦିନ ରକ୍ଷାବନ୍ଧନ ପାଳନ କରାଯିବ। ପୂର୍ଣ୍ଣିମା ତିଥି ୨୭ ଅଗଷ୍ଟ ସକାଳ ପ୍ରାୟ ୯ଟା ୮ ମିନିଟ୍ରୁ ଆରମ୍ଭ ହୋଇ ୨୮ ଅଗଷ୍ଟ ସକାଳ ପ୍ରାୟ ୯ଟା ୪୮ ମିନିଟ୍ ପର୍ଯ୍ୟନ୍ତ ରହିବ। ଉଦୟ ତିଥି ଅନୁସାରେ ୨୮ ଅଗଷ୍ଟରେ ହିଁ ରକ୍ଷାବନ୍ଧନ ପାଳନ କରିବା ଶୁଭ ବୋଲି ମନେ କରାଯାଉଛି।
ରକ୍ଷାବନ୍ଧନ ଶ୍ରାବଣ ମାସର ଶୁକ୍ଳ ପକ୍ଷ ପୂର୍ଣ୍ଣିମାରେ ପାଳନ କରାଯାଏ । ଏଥର ପୂର୍ଣ୍ଣିମା ତିଥି ୨୭ ଅଗଷ୍ଟରୁ ଆରମ୍ଭ ହୋଇ ୨୮ ଅଗଷ୍ଟ ସକାଳ ପର୍ଯ୍ୟନ୍ତ ରହିବ। ତେଣୁ ରାକ୍ଷୀ କିଣିବାଠାରୁ ଆରମ୍ଭ କରି ପୂଜା ପ୍ରସ୍ତୁତି ପର୍ଯ୍ୟନ୍ତ ୨୮ ଅଗଷ୍ଟକୁ ଧ୍ୟାନରେ ରଖନ୍ତୁ।
ରାକ୍ଷୀ ବାନ୍ଧିବାର ଶୁଭ ସମୟ:
୨୮ ଅଗଷ୍ଟରେ ସକାଳ ସମୟରେ ରାକ୍ଷୀ ବାନ୍ଧିବା ଶୁଭ ବୋଲି କୁହାଯାଉଛି। ପାଞ୍ଜି ଅନୁସାରେ ସକାଳ ୫ଟା ୫୭ ମିନିଟ୍ରୁ ୯ଟା ୪୮ ମିନିଟ୍ ପର୍ଯ୍ୟନ୍ତ ରାକ୍ଷୀ ବାନ୍ଧିବାର ଶୁଭ ସମୟ ରହିଛି। ତେବେ ଭିନ୍ନ ଭିନ୍ନ ସହରର ସୂର୍ଯ୍ୟୋଦୟ ସମୟ ଅନୁସାରେ ଏଥିରେ କିଛି ମିନିଟ୍ର ଫରକ ହୋଇପାରେ।
୨୭ ଅଗଷ୍ଟରେ ରହିବ ଭଦ୍ରା କାଳ:
ରକ୍ଷାବନ୍ଧନ ସମୟରେ ଭଦ୍ରା କାଳକୁ ବିଶେଷ ଗୁରୁତ୍ୱ ଦିଆଯାଏ । ଚଳିତ ବର୍ଷ ୨୭ ଅଗଷ୍ଟ ସକାଳ ପ୍ରାୟ ୯ଟା ୮ ମିନିଟ୍ରୁ ରାତି ୯ଟା ୩୨ ମିନିଟ୍ ପର୍ଯ୍ୟନ୍ତ ଭଦ୍ରା ରହିବ ବୋଲି କୁହାଯାଉଛି।
ଧାର୍ମିକ ମାନ୍ୟତା ଅନୁସାରେ ଭଦ୍ରା ସମୟରେ ରାକ୍ଷୀ ବାନ୍ଧିବା ଭଳି ଶୁଭ କାମ କରିବା ଉଚିତ୍ ନୁହେଁ। ତେବେ ଭଲ କଥା ହେଉଛି,୨୮ ଅଗଷ୍ଟ ରକ୍ଷାବନ୍ଧନ ଦିନ ଭଦ୍ରା ରହିବ ନାହିଁ।
ରକ୍ଷାବନ୍ଧନର ଧାର୍ମିକ ମହତ୍ତ୍ୱ:
ରକ୍ଷାବନ୍ଧନ କେବଳ ରାକ୍ଷୀ ବାନ୍ଧିବାର ପର୍ବ ନୁହେଁ। ଏହା ଭାଇ-ଭଉଣୀଙ୍କ ମଧ୍ୟରେ ଥିବା ଭଲପାଇବା, ବିଶ୍ୱାସ ଓ ସୁରକ୍ଷାର ପ୍ରତୀକ ବୋଲି ମନେ କରାଯାଏ।
ରକ୍ଷାବନ୍ଧନ ସହ ଭଗବାନ ଶ୍ରୀକୃଷ୍ଣ ଓ ଦ୍ରୌପଦୀଙ୍କ କାହାଣୀ ମଧ୍ୟ ଜଡ଼ିତ। ମାନ୍ୟତା ଅନୁସାରେ, ଶ୍ରୀକୃଷ୍ଣଙ୍କ ଆଙ୍ଗୁଠିରେ ଆଘାତ ଲାଗିବା ପରେ ଦ୍ରୌପଦୀ ନିଜ ଶାଢ଼ିର କପଡ଼ ଚିରି ତାଙ୍କ ଆଙ୍ଗୁଠିରେ ବାନ୍ଧିଥିଲେ। ଏହା ପରେ ଶ୍ରୀକୃଷ୍ଣ ଦ୍ରୌପଦୀଙ୍କୁ ସୁରକ୍ଷା ଦେବାର ପ୍ରତିଶ୍ରୁତି ଦେଇଥିଲେ।
