ମଧୁମେହ ରୋଗୀଙ୍କ ପାଇଁ ଖୁସି ଖବର । ଏଣିକି ପ୍ରତିଦିନ ନେବାକୁ ପଡିବନି ଇନସୁଲିନ୍ । ସପ୍ତାହକୁ ମାତ୍ର ଥରେ ନେବେ ଇଞ୍ଜେକ୍ସନ। ଭାରତରେ ଲଞ୍ଚ ହେଲା ବିଶ୍ୱର ପ୍ରଥମ ଏବଂ ଏକମାତ୍ର ସପ୍ତାହକୁ ଥରେ ନେଉଥିବା ଇନସୁଲିନ୍ । ଡେନମାର୍କର ଔଷଧ ନିର୍ମାତା କମ୍ପାନୀ ନୋଭୋ ନରଡିସ୍କ ଲଞ୍ଚ କରିଥିବା ଏହି ଇନସୁଲିନ ହେଉଛି ଅୱିକଲୀ ବା ଇନସୁଲିନ୍ ଆଇକୋଡେକ୍ ।
ଟାଇପ୍ – 1 ଏବଂ 2 ମଧୁମେହ ରୋଗୀଙ୍କ ପାଇଁ ଏହି ଇନସୁଲିନ ଲଞ୍ଚ ହୋଇଛି । ଏହି ଚିକିତ୍ସାର ଲକ୍ଷ୍ୟ ହେଉଛି ଇଞ୍ଜେକ୍ସନ ଚିନ୍ତାକୁ କମ କରିବା ଏବଂ ମଧୁମେହ ପୀଡିତ ରୋଗୀ ଠିକ୍ ସମୟରେ ଇଞ୍ଜେକ୍ସନ ନେବା । ବାର୍ଷିକ ୩୬୫ ଦିନ ଇନସୁଲିନ୍ ଇଞ୍ଜେକ୍ସନରୁ ମାତ୍ର ୫୨ କୁ ହ୍ରାସ କରି ମଧୁମେହ ଚିକିତ୍ସାରେ ଏକ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ଆଣିଛି ନୋଭୋ ନରଡିସ୍କ । ରୋଗୀଙ୍କ ଶରୀରର ଗ୍ଲୁକେଜ୍ ସ୍ତରକୁ ଦେଖି ଡୋଜ୍ ସ୍ଥିରିକୃତ ହେବ।
ଭାରତରେ ପ୍ରାୟ ୧୦ କୋଟି ଲୋକ ମଧୁମେହରେ ପୀଡିତ । ପ୍ରାୟ ୧୩ କୋଟି ଲୋକଙ୍କ ପ୍ରାକ୍ ଡାଇବେଟିସ୍ ସ୍ଥିତି। ସେହିପରି ୯ ଲକ୍ଷରୁ ଅଧିକ ଲୋକ ଟାଇପ୍ 1 ମଧୁମେହରେ ପୀଡିତ । ପୂର୍ବରୁ ଆମେରିକା, ୟୁରୋପୀୟ ୟୁନିୟନ ସମେତ ଆଉ କିଛି ଦେଶରେ ଅନୁମୋଦନ ପାଇ ସାରିଛି ଏହି ସାପ୍ତାହିକ ଇନସୁଲିନ୍ ଇଂଜେକ୍ସନ।
